Malakai 3
3
1Ŋ̀wála-wâla kélee Yâwɛɛ a môi ǹyɛɛi, “Ŋa pâi ŋáworɛ̂-woo ƃó-nuui tɛɛ̂i a gɛɛ é ŋáperei su kpɛtɛ. À kɛ̀ tí, Ŋ̀âlai ka gɔ̂rii a pâi pâi Ŋɔpɛ́rɛi Kɛ́tɛi mu a maa félaa. Gɛ̀ ní ŋ̀orɛ̂-woo ƃó-nuui ka wɔ́lɔ berei kâai, a pâi pâi é ŋáworɛ̂-wooi ƃó kâa.”
2Kɛ́lɛ ŋ̀elei a pà lai, gbɛ̂ɛ ƃa pɔ̂ri tɔɔ̂i dúɛi? Tãi à pà lai, gbɛ́ɛ ƃé pâi ƃâloi? A pâi kɛ̂i yɛ̂ɛ seɣe-waa-kpolo ŋá liɛɛ, yɛ̂ɛ ŋɔŋ nyii a kpɛ̃́ɛ sèɣeŋ kɔli mai. 3A pâi é mɛni ŋá tée yɛ̂ɛ kɔli ɣale-nûu a kpɛ̃́ɛ kùla káne ma. Yɛ̂ɛ berei kɔli-ɣale-nûu a kpɛ̃́ɛ kùla la káne ma da gôoi, berei nɔ́ ƃé Yâwɛɛ ŋɔworɛ̂-woo ƃó-nuui a pâi zâla láa-soŋ-ƃelai maa waâi la é lɛ́ɛ la zu dí pá a sama-sɛ̂ŋ lɛ́lɛɛ Yâwɛɛ pɔ́. 4À kɛ̀ tí, zama-sã̂ai Zuda lɔii su-ƃelai da Zerusâlɛŋ-ƃelai da pâi lai, a pâi Yâwɛɛ líi lâai yɛ̂ɛ berei da kâa ǹíi laa la a bɔlɔi.
5Ŋ̀wála-wâla kélee Yâwɛɛ a môi ǹyɛɛi, “Ŋa pâi pâi kápɔ ŋá kámɛnii ŋá tée, ŋá sêre-faa kɛ́ ŋɔ́nɔ é pîlaŋ bóniŋ kɛ́-ƃelai dîa da ŋ̀ulu-wulu kɛ́-ƃelai, ǹɛ́ɛ-sere-faa kɛ́-ƃelai, da diai da díi-kɛ́-ƃelai dífela-fei mîi a wôya perei, diai da díŋɛi nàɣiŋ bɔɔ-nɛyãai mɛi, dee-lônii, ǹɔii da kpɛ́ni su-ƃelai, é pɛ́lɛ diai dîa dífa ƃaa-kɛ́-maa tɛ̀ɛ ḿbɔi.
Núu-kɔ̃̂liŋ-buu tɛɛ-mɛ̂ni Ɣâla pɔ́
6“Ńyãa ƃa Yâwɛɛ, fá ḿaa fâleŋ. M̀ɛni ma káai a Zeeka Ŋɔkáayɔɔ-ŋai, káŋuŋ la fé niî kpɛɛ ní a pilíɛɛ. 7Kámaa mɛ̂ni kɛ̂ɛi nɔ́ yɛ̂ɛ kánuu-pɔ̂lɔ-ŋai, ka kápôlu tɔɔ ŋátɔ̂ŋ-ŋai dîa káfe niî dímɛi káa ní. Ka tínaŋ ḿbɔ-naa pêre ńyaŋ ŋa pâi tínanîi kápɔ-naa pêre. Kɛ́lɛ ka môi kâa, ‘Kwa pâi tínaŋ-pere kɛ̂i léŋ ípɔ-naa pêre?’ 8Ŋa kámarê kɛ̂i, gáa a mɛni lɛ́lɛɛ a gɛɛ núu é Ɣâla fili? Tɔ̃yâ ma, kpáo, kɛ́lɛ kákaa nɔ́ ḿvilîi. Kákaa ḿarê kɛ̂ɛ kɛ̂i kâa, ‘Kwa ífilîi léŋ?’ Ka ḿvilîi kákɔ̃liŋ buu-ɣelei tɛɛ mɛ̂ni su da zama-sã̂ai tɛ́ɛ mɛni ma ḿbɔ. 9Fóo-wôo káa kákelee kâa, kpɛ́ni fêi, káai a ǹɔii-ƃelai kélee ka ḿvilîi. 10Ka pá a kákɔ̃liŋ buu-ɣêlei kélee Ŋ̀âla-pɛrɛi Kɛ́tɛi mu, gɛ̀ ní mii-sɛ̂ŋ támaa a pâi kɛ̂i naa. Ka ńzu kɔ̂ɔŋ, ǹyaŋ ka pâi gâai, ŋa pâi Ɣâla-taa wêna-ŋai láa ƃôi ŋá sɛŋ lɛ́lɛɛ sii támaa tɛ́ɛ kápɔ. 11Fé pâi ŋɔ́nɔ gotó-ŋai lɛɛ̂i naa díka-sí-sɛŋ-ŋai kara, ǹyaŋ kákpɔmɔ-ƃa kpɔlɔ-ŋai da pâi ƃâi a dámaa. 12À kɛ̀ tí gɛ̀ ní ǹɔii-ŋûŋ-ŋai kélee da pâi kátôlii a lii-nɛ̃̂ɛ-ƃela.”
Ɣâla ŋɔmalôŋ-kâa kono-teei
13Yâwɛɛ ǹyɛɛ, “Ka mɛni nyɔ́mɔɔ támaa ƃó a ńaa. Kɛ́lɛ ká marê kɛ̀ kâa, ‘Lé ƃé kú mò é pîlaŋ yâi?’ 14Ka mò kâa, ‘Núu à tíi kɛ̀ Ɣâla mì gáa nɔ́ kpɛ́ni-kpɛni. Lé ƃé kwa zɔlɔ ƃô à kɛ̀ a mɛni ƃô kûa kú kɛ̀ gɛ, kpaa máŋ kwaa kɔ́ kú ǹɛ́ Ŋwála-wala kélee Yâwɛɛ ma a gɛɛ kú maloŋɔɔ̂i mɛnii gwa gɛ́ lai mɛni ma? 15Kwa ǹyoŋka-ƃelai sîɣe a Ɣâla ŋɔƃɛlɛ sêe sɔlɔ ƃó-ƃela. Sɔnyɔ̂ŋ-ƃela dífa mɛni lɛ́lɛɛ sɔlɔ ƃô nɔ́, kɛ́lɛ da Ɣâla ŋɔlii kpêlei su-kɔɔŋ a díŋwana-lɔ̂ɔ tua-kɛ́ɛi, da kɛ́ gaai a gɛɛ mɛni da fé pâi kulâi zu.’ ”
16Diai da yào Yâwɛɛ mai, dí lòno díkîe-ni pɔ́. Yâwɛɛ è ŋ̀óli tɔ̀ɔ é díwoo mɛ́ni, ǹyaŋ diai da yào Yâwɛɛ ma dí ƃaa-kɛ́-maa tɛ́ɛ bɔ́i, dí kili-too-ŋa kɔlɔ pɔ̃̀yɛ a dílaa. 17Ŋ̀wála-wâla kélee Yâwɛɛ a môi ǹyɛɛi, “Da pâi kɛ̂i a ḿbɔɔ kpîŋ-kpiŋ, ŋ̀ele-kûui ŋa pâi pâi lai. Ŋa pâi dímalôŋ kâai yɛ̂ɛ berei ǹaŋ-nuui a ǹóŋ malôŋ kàa la nyii a tíi kɛ̀ mìi. 18Ŋánûai da pâi ŋɔ́nɔ mɛni sîi feerɛ loai kɔ́lɔnîi, zɔnyɔ̂ŋ-ƃelai da zɔŋ lɛ̂lɛ-ƃelai, ǹúui va ŋ́oo mɛnii da ǹúui a ŋ́oo mɛnii.”
Currently Selected:
Malakai 3: KWB
Highlight
Share
Copy
Want to have your highlights saved across all your devices? Sign up or sign in