Zôo 29
29
Zôo ŋɔmɛni saai gbɛɛ-ŋai
1Naa kɛ́ɛ tíi, Zôo è ŋɔ́nɔ pɛ̀lɛ lónoɔɔ ma ǹyɛɛi,
2“Ŋákɛ-ɣeniɛi èei máŋ kɛ̀ a ǹɛ́lɛɛ yɛ̂ɛ berei è kɛ̀ la
tãi Ɣâla è wɔ́lɔ kɛ̀ mɛi kâai lai.
3Ɣâla ŋɔkwaa ponoɔɔi è kɛ̀ ŋ́gɔ̀lɛ a ɣele kélee
gɛ́ ḿɛi kâa ńzia-pere su a kpíni.
4Ŋá wɔ́lɔ kɛ̀ a ŋ́gbonôi kpanaŋɔɔ,
Ɣâla kɛ́ ŋápɛrɛi mɛi kâa.
5Ŋ̀wála-wâla kélee Ɣalai è kɛ̀ ŋ́gɔ̀lɛ,
ŋá ńîa-pɛlɛɛi tínaŋɔɔ ḿâ.
6Ŋá niŋa-ŋai díkɛ̀ ŋíni-ya támaa tɛɛ̂i,
ŋáɔle wuru-ŋai wúlɔ kɛ́ yèŋ yɛ̂ɛ ya lêe.
7Tãi ŋá kâa lì la daa nuu-pɔlɔ-ŋai díkɔ̃yɛŋ sui,
ŋá sée daa mɛi káa-ƃelai díkɔ̃yɛŋ too kwaai mai,
8ǹyaŋkpa-ŋai ŋ́gâai da kûla pôlu.
Ǹúu-pɔlɔ-ŋai da ŋ́gàa,
dí dímu siɣe dítɔɔ ɣelêi a ƃaa kɛ́-maa pere.
9Ǹúu láa túɛ-ƃelai da ŋ́gàa,
da kpêra lônoi, dí díyee pɛ́lɛ díla.
10Daa nua kpaya-kpaya-ŋai máŋ da dímɛi sâa.
11“Diai kélee kpɔ́ ḿaa mɛ̂ni mɛnii, dí wɔlɔ sɛɣɛ-fei tɛ̀ɛ ḿbɔ.
Diai kélee ŋ́gâai dímɛni lɛ́lɛɛ ƃó é pîlaŋ ḿâ.
12Gôlo-ƃelai da dee lôŋ-ŋai kélee da kâa ḿarê kɛ̀ kpɔŋ mâa mɛni mai,
ŋa kâa dɛ̀ɛ dípɔ.
13Diai nyii-ŋai kɛ̀ saa-wolo lai, dí lûwa tòo ḿâ.
M̀ɛnii ŋá gɛ̀ bɔɔ-nɛyãai dîɛi è gɛ̀ dílii-nɛ̃ɛ kula.
14M̀ɛni lɛ́lɛɛi ŋá gɛ̀i, è kɛ̀ yɛ̂ɛ ŋáseɣe tôo ŋ́gɔŋ ḿâ.
Ŋá mɛni ŋá tèe a ǹɛ́lɛɛ, ǹyaŋ è kɛ̀ yɛ̂ɛ ŋà kɛ̀ ḿaa ɣirîi.
15Ŋá kɛ̀ a ŋ̀ɛ́i-pu-ƃelai ŋɛ́i-gao,
ŋ́gɛ ƃò a gɔɔ-pu-ƃelai kɔ́ɔ.
16Ŋá gôlo-ƃelai maa kɔ̃ɔ,
ŋ́gɛ ŋɔ̃ya-ŋai maa kɔ̃ɔ m̀ɛni sâa ƃó-kerei mu.
17Ŋá ŋ̀wana-lɔ̂ɔ-ƃelai díwala-wala-laai kûla díyêei.
Ŋá díkpɔara-ƃelai kùla díyêei.
18“Kili kɛ-zu káa ńyêei a gɛɛ ŋa pâi tûai ɣele ma
ŋá sáa ŋápɛrɛi mu lii-see su.
19Ŋá kɛ̀ yɛ̂ɛ wúru nyii gáa tɔɔ̂ni yá kɔ̀lɛ
nyii lúu a pû ǹáa mà a kpínii.
20Ǹûai díkɛ̀ kpɔ́ nɔ́ ƃaa kɛ́-maa tɛɛ̂i ḿbɔ.
Ŋáwala-wala-laai su fé niî wɔ́lɔ saa ní.
21Ǹûai da kâa ḿaa kpɛ̂ŋ,
dí díwoli tɔ́ɔ ǹia-wooi mâ ŋa kâa dɛ̀ɛ dípɔi.
22M̀ɛnii ŋa kâa mò dîai, núu da fa kâa zîa tòo.
Ŋ́oo a kâa làa kpɔ́ dílii ma yɛ̂ɛ tuna-kao a pìlaŋ lɔii kpâla ma.
23Da kâa kɛ̀ ḿaa kpɛ́nii yɛ̂ɛ nûa ƃé tuna maa kpɛ́nîi,
díŋɛi kɛ́ ƃò ḿberêi yɛ̂ɛ kpâlaŋ ŋá tii-kɛ-nuu à kɛ̀ dunai maa-ŋuŋ maa kpɛ̂nii.
24À kɛ̀ ŋà ɣɛ̀lɛ ńa kɔlɛ, kili kɛ-zu a kɛ̂ díyêei.
Ŋ́ɛlɛ-ŋɛi a dílii mu sîɣe.
25Ńyãa ƃé kɛ̀ a dílaa túɛ-nuu ŋ́gɛ díteniŋ tɔ̀ɔ.
Ŋá kɛ̀ dísama yɛ̂ɛ kâloŋ ƃé ŋɔkɔ-kuluƃa-ŋai sáma,
ŋ́gɛ díŋa-nɛnɛ yɛ̂ɛ núu à kɛ̀ saa wɔ̂lɔ kɛ́-ƃela ŋánɛnɛ̂i.”
Currently Selected:
Zôo 29: KWB
Highlight
Share
Compare
Copy
Want to have your highlights saved across all your devices? Sign up or sign in
