Ɛsedɔ 29
29
Mɛni-ŋai bîlaŋɔɔi Eelɔŋ da ǹônii dísee-mɛni mai
(Levetekɔ 8:1-36)
1“M̀ɛnii ŋí ƃé ƃa pɔ̂ri gɛ̂i a Eelɔŋ da ǹônii sinaai a gɛɛ dí sâla láa-soŋ-tii kɛ́ mî. Niŋa-sirɛ naɣa tɔnɔ siɣe da ƃála-sirɛ feerɛ nyii-ŋai kɔlɔ-fela fé diai. 2Tɛ́-sɛŋ-fe-zu kpolo siɣe da tɛ́-sɛŋ fé zu kpolo nyii gbɛtɛɛ̂i a wúlɔi, da tɛ́-sɛŋ fé zu kpolo nyii wúlɔ siâi mai. Díkpɛtɛ a felaƃa lɛ́lɛɛ. 3Dípu kpɔ̂lɔ tɔnɔ su í dílɛɛ zu í pá a dia é pɛ́lɛ ǹiŋa-sirɛi ma da m̀ála-sirɛ feerɛi í díkula mâ a sâla.
4“Pá a Eelɔŋ da ǹônii Ŋásua kɔlɔ seɣe pɛrɛ maa waai lá í díwaa a yá. 5Zeɣe-ŋai síɣe í ǹyɛkɛ̂i tóo Eelɔŋ ma da ǹyokpoi. Í ɛfɔi tóo ma da geŋe lá seɣe kpuai. Í ɛfɔi ma bɛ̂tii lá tóo mà. 6M̀ɔrɔi sée ŋ̀ûa í gôo kalaŋ ɣiri mà. 7Nàa pôlu ma í ŋ̀úlɔi síɣe í bú ŋ̀ûa.
8“Pá a Eelɔŋ ǹônii í díyɛkɛ-ŋai tóo dîa. 9Í bɛ̂ti too díleŋei í ƃɔrɔ sée díŋûa. Da pâi kɛ̂i a ŋásâla láa-soŋ-ƃela wɔlɔ-wɔlɔ da wɔlɔ-wɔlɔ yɛ̂ɛ berei ŋá mò lai. Bere sii ŋí ƃé í Eelɔŋ da ǹônii see la dítii mɛi.
10“Pá a niŋa-sirɛi Ŋásua kɔlɔ-seɣe pɛrɛi láƃelei. Tɔɔ Eelɔŋ da ǹônii dí díyee pɛ́lɛ ŋuŋ ma. 11Niŋa-sirɛi páa bɛ́rɛi láƃelei ŋɛ́i-tuɛ. 12Niŋa ŋãai da siɣe í zia ŋ̀âla-teƃelei ŋɔƃeɣêŋ-ŋai dîa a íyee-gbua. Í gbéli pú ŋ̀âla-teƃelei kɔ́ɔ mu. 13Niŋa wulɔi kúla goi-sãai kélee ma. Ǹíi ma-wulɔ da goi-kɔni-kao feerɛi dímaa wulɔi kúla í díkereŋ a sâla ŋ̀âla-teƃelei ŋá. 14Kɛ́lɛ ǹiŋai zua, gɔlɔ da gbó kéreŋ a ŋɔŋ mûui pôlu-pere. Gáa a sɔnyɔ̂ŋ sala.
15“M̀ála-sirɛi dɔnɔ siɣe, Eelɔŋ da ǹônii dí díyee pɛ́lɛ ŋuŋ ma. 16M̀álai páa í ŋãa táɣa ŋ̀âla-teƃelei mâ í dínaŋ ma. 17M̀ála suai tee-tee a gbua-kpua í goi-sãai kélee wáa da gbɔ̂rɔ í bú gîe ma da ŋuŋ. 18Gélee kéreŋ a sâla ŋ̀âla-teƃelei ŋá. Gáa a kéreŋ-sala da sâla kúŋ nɛ̃ɛ ḿɛni ma.
19“M̀ála-sirɛi kpéli síɣe, Eelɔŋ da ǹônii dí díyee pɛ́lɛ ŋuŋ ma. 20M̀álai páa í ŋãa da sia Eelɔŋ da ǹônii-ni dílaa-mii yee mɛi woli-kpɛrɛi ma. Í da sia dílaa-mii yee kɔɔ-kpua zɛ-kponoi ma, da díkɔɔ yee kɔɔ-gbua kɛ́tɛi mâ. M̀ála ŋãai táɣa ŋ̀âla-teƃelei kɔ́ɔ mu í dínaŋ ma. 21Ŋãai gáa ŋ̀âla-teƃelei mai da siɣe í bù-ŋua ŋulɔi da siɣe í gbɛ́mɛŋ Eelɔŋ ma da ŋɔseɣei. Í da kpɛ́mɛŋ Eelɔŋ ǹônii dîa da díseɣe-ŋai. Bere sii ŋí ƃé ǹyaa da ǹônii é pɛ́lɛ díseɣe-ŋai dîa dímaa a pâi kɛ̂i la a ŋwaa.
22“M̀álai ŋ̀úlɔ kúla í ŋ̀óŋ síɣe da goi-sãa ma wulɔi. Ǹíi ma wulɔi kúla, goi-kɔni-kao feerɛ da dímaa wulɔi, í naa-mii yee mɛi wɛrɛi síɣe, kpɛ́ni fêi, gáa a sâla láa soŋ-ƃela seɛɛ dítii mɛi ḿaa ƃála. 23Gbɔ̂lɔi gáa ŋɛ́i-tuɛ nyii dɛ́-sɛŋ fé zu kpoloi káa zui, kpólo kpua tɔnɔ kula naa da kpólo kpûa tɔnɔ nyii gbɛtɛɛ̂i a wúlɔi, da kpólo ƃela tɔnɔ. 24Zãai ŋí kélee pú Eelɔŋ yêei da ǹônii dí dísoŋ díyee ŋá a soŋ-nyee-ŋa sala-sɛŋ ŋɛ́i-tuɛ. 25À kɛ̀ tí í dísoŋ díyêei í díkereŋ ŋ̀âla-teƃelei ma géreŋ salai mɛi a gɛɛ é kɛ́ a kéreŋ sala kúŋ nɛ̃ɛ ŋɛ́i. Gáa a ŋɔŋ sala ŋɛ́i-tuɛ.
26“Eelɔŋ see ƃalai keŋe lá síɣe í zoŋ íyee ŋá a soŋ-nyee-ŋa sala ŋɛ́i-tuɛ. M̀ála suai íwɔ̂i ká ŋí.
27“Eelɔŋ da ǹônii see ƃalai keŋe lá sóŋ íyee ŋá a soŋ-yee-ŋa sala, da ŋ̀wɛ́rɛ nyii gáa zâla láa soŋ-ƃelai mɛni mai. 28Gáa a ŋatɔ̂ŋ kpanaŋ a gɛɛ zua kpua-ŋai ŋí dí kɛ́ a Eelɔŋ da ǹônii dípɔɔ a tãi kélee, nyii-ŋai kùla Eezuɛ-ŋai yêei a sama-sãai. Eezuɛ-ŋai dí gùla dílii-see sama sãai su dí nâai kɛ́ zâla láa soŋ-ƃelai mɛni ma. Gáa a dísama-sɛŋ ḿɛni ma.
29“Tãi Eelɔŋ a pâi saâi lai ŋɔseɣe maa-waa-ŋai da pâi kɛ̂i a ǹônii pɔ́ɔ a gɛɛ dí doo dîa dí wúlɔ pú díŋûa. 30Ǹóŋ nyii pâi bɔ́ɔ ŋá siɣêi fɛ̂ɛ é zeɣe-ŋai tí tóo mà a ɣele-kûu lɔ́ɔlu mɛi feerɛ, a tãi a lɔ̂ la Ŋásua seɣe-pɛrɛ maa waai mu a gɛɛ é tíi kɛ́ naai.
31“Fɛ̂ɛ í zâla láa-soŋ-ƃelai see ƃalai lúu nɛ́ŋ kwaa ma waai ma. 32Fɛ̂ɛ Eelɔŋ da ǹônii dí m̀ála suai míi Ŋásua kɔlɔ seɣe-pɛrɛ maa waai láƃelei da gbóloi gáa gbɔ̂lɔi sui. 33Fɛ̂ɛ dí zãai míi nyii-ŋai dí tíi kɛ̀ a dîa dísɔnyɔ̂ŋ-ŋai su-mɛni lɛ́ɛ mɛni ma a dílɛ tãi da dísee tãi. Sâla láa-soŋ-ƃela nɔ́ ƃa mii-sɛŋ ŋí da m̀ii. Kpɛ́ni fêi, maa waâi. 34À kɛ̀ zuai da gbóloi da à lɛ̀ɛ ɣele à ƃɔ̀, fɛ̂ɛ ká géreŋ. Núu da fé mìi ŋɔ́nɔ, kpɛ́ni fêi, maa waâi.
35“Mɛni-ŋai ŋá mò yâ a gɛɛ í díkɛ a Eelɔŋ da ǹônii, díkɛ. Dísee dítii mɛni ma a ɣele-kûu lɔ́ɔlu mɛi feerɛ. 36Niŋa-sirɛ kula a sɔnyɔ̂ŋ sala a ɣele kélee sɔnyɔ̂ŋ su-mɛni-lɛɛ mɛni ma. Ƃà sɔnyɔ̂ŋ sala kùla, gɛ̀ ní ƃa sɔnyɔ̂ŋ waa ŋ̀âla-teƃelei ma. Gɛ̀ ní ƃa pɔ̂ri wúlɔ pûi ma í zee díi maa waai kɛ́-mɛni ma. 37Sɔnyɔ̂ŋ su-mɛni-lɛɛ sala kula ŋ̀âla-teƃelei mɛni ma a ɣele-kûu lɔ́ɔlu mɛi feerɛ í zee díi maa waa kɛ́-mɛni ma. Gɛ̀ ní a pâi kɛ̂i a maa waa. Ǹyaŋ núu da sɛŋ kélee pâi lɛɣɛ̂i mai, a pâi kɛ̂i a maa waa.
Ŋele kélee salai
(Nɔŋba 28:1-8)
38“Zâlai ŋí ƃé fɛ̂ɛ í gula ŋ̀âla-teƃelei ma. Fɛ̂ɛ í kóraŋ tɔnɔ ƃála-lonii feerɛ kúla a sâla ŋ̀âla-teƃelei ŋá a ɣele kélee. 39Dɔnɔ kùla a sâla a ɣele-wala í dɔnɔ kula a ɣele-wulii. 40Fɛ̂ɛ í felaƃa fũa lɛ́lɛɛ ŋɔpãi lɔ́ɔlu mɛi saaƃa sumo a ɔle-wúlɔ lɛ́lɛɛ pãi saaƃa í díkula a sâla a mála-loŋ maa-ŋuŋ. Fɛ̂ɛ í ŋwãai pãi saaƃa kúla máŋ a kpele-sɛŋ sala. 41Ye m̀ála-loŋ veerɛi kúla a sâla a ŋ̀ele-wulii. Fɛ̂ɛ í mii-sɛŋ sala kula la da kpele-sɛŋ sala yɛ̂ɛ berei í gɛ̀ la a Ŋ̀ele-wâlai, a gɛɛ é kɛ́ a sâla kúŋ nɛ̃ɛ da kéreŋ sala mɛ̂ni ma. 42Ká géreŋ salai ŋí kúla a tãi kélee káfulu-laai su da kásuui, ŋásua-kɔlɔ seɣe pɛrɛ maa waai láƃelei ƃɛ́ ḿɛni ma. Nàa ƃé ŋa pâi kákâai naa ŋá lóno kápɔ. 43Nàa ƃé ŋa pâi Eezuɛ-ŋai kâai naa. Nàa ƃe ŋa pâi m̀aa waâi a ŋáfolo-laai. 44Ŋa pâi ŋásua-kɔlɔ seɣe pɛrɛi maa waâi da ŋ̀âla-teƃelei. Ŋa pâi Eelɔŋ seêi da ǹônii a gɛɛ dí sâla láa soŋ-tii kɛ́ mî. 45Ŋa pâi kɛ̂i Eezuɛ-ŋai sáma. Ŋá kɛ́ a Díɣâla. 46Da pâi gɔ́lɔŋ-nîi a gɛɛ ńyãa ƃa Yâwɛɛ Díɣâlai nyii díkùla Ize lɔii su a gɛɛ ŋá kɛ́ dísama. Ńyãa ƃa Yâwɛɛ nyii gáa a Díɣâlai.”
Currently Selected:
Ɛsedɔ 29: KWB
Highlight
Copy
Compare
Share
Want to have your highlights saved across all your devices? Sign up or sign in
