ZACARÍAS 6
6
Amyaa cuatro carros apquilimpocjay
1Invitac alhta mocjam sicvanmoncama. Inquilvitalhquic alhta cuatro carros actemaclha apquilimpocjay, payjoc anit inquilhe alvinatem, malha bronce. 2Lhama alhta apquilyinyovascama nolhing apquilyilhvasem, najan segundo carro apquilyinyovascama nolhing apquilpasyam. 3Najan tercer carro apquilyinyovascama nolhing apquilmopoy, najan cuarto carro apquilyinyovascama nolhing apquilpilhpopoy.#Zac 1.8; Ap 6.2-5.
4Actomjac alhta coo siyanya ángel: Visqui, ¿so acvisay qui? — alhta actomjac coo. 5Apcatingmavoc alhta ángel: Acvisay alhcajayam ayinyema cuatro nicja;#Ap 7.1. ayinyema nilhqueyja, ayinyema actiyapmaclha acnim, ayinyema piyam, ayinyema actalhningvamlha acnim. Apcapajascama Visqui ingac as nalhpop lhalhma anco. 6Payjoc nilhqueyja apquilyasac nolhing apquilpasyam apquilyinyovascama carro. Payjoc actalhningvamlha acnim apquilyascama nolhing apquilmopoy. Najan payjoc nipiyam apquilyascama nolhing apquilpilhpopoy apquilyinyovascama carro.
7Nolhing apquilpilhpopoy alhta apquilapajasacpo elsavojo lhalhma anco as nalhpop. Aptomjac alhta ángel apquilanya: Elsavojo apquilinyem lhalhma anco as nalhpop — alhta aptomjac. Apquilinyajamquic alhta.
8Aptomjac alhta ángel seyanya apyimnatesa appayvam: Quip ilanojo apquilyascama nilhqueyja, colhic sat acmascosa maa aplom pac Dios Visqui ingac — alhta aptomjac.
Mayayoclha Josué sacerdote
9Aptomjac alhta Visqui ingac seyanya, yavamlha otnejic: 10Ingyansiclha sat asoc apquilsayquinta apquilmomap alhta Babilonia, apquilvactama mocjam: apvisay alhta Heldai, Tobías najan Jedaías. Imyaclha sat as acnim apnaclha Josías, Sofonías apquitca. 11Illana sat lhama corona appocanma allanomalhca oro najan plata. Ipquin sat apyitsicsic Josué, Josadac apquitca, aptomja apvisqui sacerdote. 12Itne sat ingyanic maa: Eycaso appayvam Visqui ingac apyimtalhnamo: enlhit apvisay Retoño (apvisay David aptavin niptamin) etacpoc sat nipyesicsa maa, ellanac sat tingma apponquinomap. 13Ellaniclhac sat tingma apponquinomap aptovasomap alhta siclho. Colhic sat ayaco, acno mayayo apvisqui apyimtalhnamo. Elhic sat netin apvisqui aptajanem, elhojoc sat lhama sacerdote, cotnejic sat actamilaycam apquilvalhoc apcanit. 14Colhnam sat tingma apponquinomap coronas apquilpocanma, actemaclha acyitnama ingatic mayayo Heldai, najan Tobías, najan Jedaías najan Josías, Sofonías apquitca — alhta aptomjac.
15Mocjay elinyemac sat elpasingvota apquillanayclha tingma aponquinomap. Elyasingvomoc sat quellhip, aptomja seyapajascama Dios Visqui ingac. Nasoc sat cotnejic, apquiljalhno inlhojo quellhip najan apquilyiplovquisa appayvam Dios Visqui ingac.
Currently Selected:
ZACARÍAS 6: ENHL
Highlight
Copy
Compare
Share
Want to have your highlights saved across all your devices? Sign up or sign in
