ZACARÍAS 1

Dios appayvam aplingascama profeta

1Apvocmec nic nat piltin octavo (ocho). Aptimec nic nat apvisqui Darío segundo año. Aptomjac nic nat Dios Visqui ingac apcanya Zacarías,#Esd 4.24—5.1; 6.14; Neh 12.16. apyap nic nat Berequías, apyata ilhnic nat Ido, eycaso appayvam:

2-3Coo sicvisay Dios sicyimtalhnamo. Avanjec alhta siclho siclom sictanoncama apquilyeyjamcaa quellhip. Ilngas sat lhip sicpayvam nipyesicsa apnaymacoc: Elpayquim sat quellhip jelyota coo, coo sat najan opaycomoc, yoyam omoc tacja quellhip.#Is 55.7; Mal 3.7. Naso coo sicpayvam sicvisay Dios. 4Noelvajaniclhojo nasa quellhip apquiltemaclha apancaoc apquilyeyjamcaa. Apquillingasquic nat profetas sicpayvam, apquiltomja apquilanya: Elpayquim sat quellhip, elvatsaoc sat apquiltemaclha apancaoc - nat apquiltomjac. Am nat eljalhnoc apquilyeyjamcaa sicpayvam. Naso coo sicpayvam sicvisay Dios. 5¿Co laa apquilyasa apquilyeyjamcaa quellhip? ¿Apquileyve ya mocjam profetas? - paj. 6Am nat comascac sicpayvam apquillingascama profetas. Inquilmec nat apquilvalhoc apquilyeyjamcaa. Apquilpaycacmec nat maa, apquiltomja apquillhanma: Apvitac mataa Dios Visqui apyimtalhnamo nintemaclha inganco, yiplovcoc apyanmongsayclha nintemaclha inganco, yiplovcoc apyanmongsayclha nintemaclha inganco — nat apquiltomjac apquilyeyjamcaa — nic nat aptomjac profeta.

Amyaa nolhing apcapaoc

7Ayanyalhquic alhta olngacsic Dios appayvam acnim veinticuatro najan piltin once, moc apvisay Sebat, naysicsa aptimem apvisqui Darío segundo año. 8Invitac alhta sicvanmoncama alhtaa: Enlhit apna nolhing apcapoc, apyilhvasem alhta apquinamtem. Apquiljalhnec alhta payjoc alvata, ayimjaclha yamit acvisay arrayanes. Apquilyancac alhta maa tap poc grupo nolhing, napocja apquilyilhvasem, napocja yamapquilyilhvasem, najan napocja apquilmopoy.#Zac 6.2-3; Ap 6.2-4. 9Actomjac alhta siyanya: Visqui, ¿soc enlhit qui nolhing apcapaoc? — alhta actomjac coo. Aptomjac alhta ángel apcatingmavo: Quilhvoc sat olhicmocsic — alhta aptomjac. 10Apcatingmavoc alhta nolhing apcapoc, payjoc ayimjaclha yamit arrayanes: Apquilvisay Dios apquilasinancama, elsavojoc sat as nalhpop, elyasamcojo apquiltemaclha enlhit — alhta aptomjac.

11Apquiltomjac alhta nolhing apcapaoc apquilanya ángel Visqui apcasinancama, payjoc ayimjaclha yamit arrayanes: Ninsovjoc alhta ninlhingam as nalhpop. Mepqui amyaa nipyesicsa enlhit, inquiltasic apquilvalhoc — alhta apquiltomjac. 12Apcatingmavoc alhta ángel Visqui apcasinancama: Dios Visqui apyimtalhnamo. Apquillingamcoc lhip aplom pac co Jerusalén najan tingma apquilvanyam co Judá acvaycmo setenta años.#Jer 25.11; 29.10; Zac 7.5. ¿Co sat acvam ingyimlimojoc sat lhip as enlhitaoc? — alhta aptomjac.

13Apcatingmavoc alhta Visqui ingac actemaclha aptamilquisquiyam apvalhoc ángel siyinmaycamó lhama. 14Aptomjac alhta seyanya olngacsic: eycaso appayvam ayinyema Visqui apyimtalhnamo: Avanjec coo siyasicjayo co Jerusalén najan co Sión. 15Avanjec alhta siclom napatavo enlhit cotnaja ingmoc. Asilhtec alhta siclho siclom, inyangvocmec alhta apquiltemaclha acmasom nipyesicsa enlhitaoc cotnaja ingmoc. 16Naso coo sicpayvam sicvisay Dios: Ongvimlimojoc sat co Jerusalén, otnesquisic sat, yoyam ellanacpoc mocjam tingma apvanyam najan tingma apponquinomap — alhta aptomjac.

17Aptomjac alhta ángel seyanya: Ilngas sat mocjam amyaa: Naso coo sicpayvam sicvisay Dios: Cotamiliclhac sat mocjam apquileyvam enlhitaoc tingma apquilvanyam, najan co Sión. Olngacsic sat: Coo tingma ajac mocjam Jerusalén — sat otnejic — alhta aptomjac — nic nat aptomjac profeta.

Amyaa vayqui inquipetaoc

18Invitac alhta sicvanmoncama cuatro vayqui inquipetaoc. 19Actomjac alhta siyanya ángel siyinmaycamó lhama: ¿So acvisay qui? — alhta actomjac coo. Apcatingmavoc alhta ángel: Inquipetaoc alyitsomalhca cotnaja ingmoc apnatovascama alhta co Judá, co Israel najan co Jerusalén — alhta aptomjac.

20Invitac alhta sicvanmoncama selhicmoscama Visqui ingac cuatro ticpamaclha tava apac. 21Actomjac alhta siyanya: ¿So apquiltingya yi herreros ticpamaclha tava apac? — alhta actomjac coo. Apcatingmavoc alhta: Elintacsic sat inquipetaoc (apquilyitsomacpo apquilyimnatem) cotnaja ingmoc, apnatovascama alhta co Judá apquilhpaneycam lhalhma anco. Apquilvaac herreros, yoyam elmascocsic apquilmopvan cotnaja ingmoc, yoyam elavojo — alhta aptomjac — nic nat aptomjac profeta.

Currently Selected:

ZACARÍAS 1: ENHL

Highlight

Copy

Compare