ROMANOS 6
6
Mepqui ningilpasmom mongilyascalhma ningiltomja ningilpasmeyquiclha Cristo
1¿Jalhco sat ontimjic nincoo? Apquilquinatcasquic alhta napocja quellhip. Apquillhenquic mataa quellhip: “Ingvanquic ongilyiplovsic mongilyascalhma yoyam coyangvomoc Dios singaycaoc” —alhta apquiltomjac. 2Paj, mongvanquejec nincoo. Ayinyemaclha ningilvatsamquic nincoo ningyiplovquiscama mongilyascalhma, apno enlhit apquitsepma aptomja apquilvatescama. Mongvanquejec nincoo ongilyiplovsic mocjam mongilyascalhma. 3Apquilyasamcoc quellhip. Nincoo ningiltomja singilyapascaseycaoc yingmin yoyam ongiltimjic ninpasmeyquiclha Cristo Jesús. Najan lha yoyam colhojoc actemaclha apquitsepma naysicsa singyapascaseycaoc yingmin. 4Malha ningilatongnomalhca lhama Cristo ningiltomjac naysicsa singyapascaseycaoc yingmin. Malha ningnalhaticjangvaycmo lhama Cristo yoyam ongyiplovcasojo nintemaclha alhnancoc. Acno alhta aplhaticjangviyam Cristo nipyesicsa apquilmasquingvaycmo ayinyema aplhaticjasquiyam Apyap aptomja apyimtalhnamo.#Col 2.12.
5Ningilpasmec sat ancoc Cristo actemaclha apquitsepma, ongilpasmoc sat najan Cristo actemaclha aplhaticjangviyam nipyesicsa apquilmasquingvaycmo. 6Ningyasamcoc nincoo: Inmasquec nintemaclha nano acno apquitsepma Cristo netin asoc timyescama. Intovasalhquic nintemaclha ningyiplovquiscama mongilyascalhma, yoyam comascoc ningilyajayquiclho mongilyascalhma actomja malha singilmam.#Gá 2.20. 7Ayinyemaclha inmasquec singilanya mongilyascalhma naysicsa ningitsepma. 8Ningilpasmec sat ancoc Cristo actemaclha apquitsepma, colhojoc sat najan Cristo acyimnatem ingnenyic. 9Ningyasamcoc nincoo: Aplhaticjangvocmec alhta Cristo nipyesicsa apquilmasquingvaycmo. Copvanquejec ingyitsapoc mocjam. Paj mocjam acmovan ningitsepma yoyam cajic mocjam Cristo. 10Acvamlha lhama apquitsepma alhta Cristo acyanmongam melyascalhma aplhamoclhojo enlhitaoc. Quilhvoc aptomja apjalhnancoc, apyiplovcasquic mataa apmayjayoclha Dios. 11Collhen sat mataa apquilvalhoc quellhip: “Inmasquec ningyiplovquiscama mongilyascalhma, malha ningitsepma intomjac. Quilhvoc ningiltomja ingjalhnancaoc, yoyam ongilyiplovsic mataa apmayjayoclha Dios actemaclha ninpasmeyquiclha Jesucristo Visqui ingac” —sat cotne apquilvalhoc.
12Noelane nasa quellhip cotniclhac mocjam acmovan melyascalhma malha avisqui. Noelyiplovquis nasa apquilyovoclhojo quellhip. Noelyiplovquis nasa apquilvalhoc quellhip actemaclha ayitsepma apnenyaoc. 13Noelane nasa comoc mongilyascalhma apquilyovoclhojo quellhip, malha yoyam cotnejic acmaycam naysicsa allanay actemaclha acmasom. Elane sat emoc Dios apquilyovoclhojo quellhip, malha yoyam etnejic apmaycam naysicsa apquillanay actemaclha acpeyvomo. Elanam sat mataa Dios, malha apquiltomja apnalhaticjangviyam nipyesicsa apquilmasquingvaycmo, apjalhnancaoc apquiltamongvocmoc. 14Inmasquec acna acmovan mongilyascalhma, malha avisqui alhta nipyesicsa quellhip. Inmasquec apquilyiplovquiscama quellhip singanamaclha Moisés. Apquillhocac quellhip Dios apcaycaoc.
Sicyitquiscama actemaclha ningmomalhca ayinyema mongilyascalhma
15¿Jalhco sat ontimjic? Inmasquec ningyiplovquiscama singanamaclha. Ningillhocac nincoo Dios singaycaoc. ¿Pa ya ongilinlhanmojo ningyiplovquiscama mongilyascalhma? Paj, mongvanquejec nincoo. 16Apquilyasamcoc quellhip. Apquililtamjoc sat ancoc quellhip elanam lhama apvisqui, incaymalhquic elilyejiclhojo mataa actemaclha apcanama. Innoc najan lha melyascalhma actomja malha avisqui. Apquililyajaclhoc sat ancoc, coyiplovjoc sat ningitsepma. Apnoc najan lha Dios aptomja Apvisqui. Apquililyajaclhoc sat ancoc quellhip, ellhovac sat acyimnatem apnenyaoc. 17Pac ontimjic gracias Dios Ingyapam. Apquilyiplovcasquic alhta quellhip melyascalhma actomja malha singilmam. Quilhvoc eyca apquilyiplovcasquic quellhip actemaclha singillhicmoscama tasic amyaa ningiltimnascama alhta nincoo. 18Inmasquec actomja apquilmomap quellhip ayinyema melyascalhma. Quilhvoc apquiltomja apquilyiplovquiscama actemaclha acpeyvomo. 19Acnasoc coo actemaclha apquilpayvam enlhitaoc, ayinyemaclha am elyasamcoc mocjam quellhip as asoc. Apquilyiplovcasquic alhta quellhip apquilyovoclhojo actemaclha mongilyascalhma najan actemaclha acmasom. Quilhvo eyca elyiplovquis apquilyovoclhojo quellhip nintemaclha acpeyvomo, actemaclha ningiltamilcasomalhco inganco yoyam ongiltimjic ningiltamila napato Dios.
20Apquilyiplovcasquic alhta quellhip melyascalhma, actomja malha almam quellhip. Quilhvoc apquiltomja apquilyiplovquiscama actemaclha acpeyvomo. 21¿Soc alhta acyanmongam apquiltemaclha nano? Apquilmancaqui inyicje quellhip quilhvo nac jay. Ayinyemaclha ningitsepma alhta acvamlha acyanmongam. 22Moc actemaclha quilhvo nac jay. Inmasquec actomja apquilmomap quellhip ayinyema melyascalhma. Quilhvoc apquiltomja Apvisqui apancaoc Dios yoyam elanam quellhip. Cotnejic sat yoyam eltimjic quellhip apquiltamila napato Dios. Ellhovac sat acyimnatem apnenyaoc cotmongvoycamlha nelha.#Pr 12.28. 23Ningyiplovcasquic sat ancoc mongilyascalhma coyiplovjoc sat ningitsepma. Dios eyca aptomja singmescama nasa acyimnatem ingnenyaoc cotmongvoycamlha nelha ninpasmeyquiclha Jesucristo Visqui ingac.
Currently Selected:
ROMANOS 6: ENHL
Highlight
Copy
Compare
Share
Want to have your highlights saved across all your devices? Sign up or sign in
