SALMOS 147
147
Aptamjaycam simpilapquiscama
1Innec ayaco Visqui ingac.
Tasic anco ningminaycmascama actemaclha ningayo Dios Visqui ingac.
Sas anco actemaclha ningilayo.
2Visqui ingac aptomja apquillanay tingma Jerusalén.
Aptomjac apcansayclha mocjam apquilhpaneycam siclho apquilmomap ingnaymacoc.
3Aptamilquiscacmec mataa, acyitna inlhojo alipvoyam apquilvalhoc.
Appilhquitquic mataa apquilyimsem.
4Aptomja apyascamco apquilvamlha apyova.
Aptimem apquilvisay moclhama apyova.
5Apyimtalhnamo apanco Dios Visqui ingac.
Acyivey apmopvan apanco.
Apyascamco apanco cotmongvoyam nelha.
6Apyimnatesquic mataa apquilvalhoc, acyitna inlhojo conjamalhca apquilvalhoc.
Aptovasacpec mataa enlhit apyimtalhnesomacpo apanco.
7Elminaycmas sat ningayo Visqui ingac.
Elpayvas sat arpa ningayo Visqui ingac.
8Visqui ingac alinyema yipjopay.
Ayinyema yingmin acmamay.
Visqui ingac ayinyema paat alyimseleycaoc netin inquilhe.
9Visqui ingac ayinyema actoycaoc ninatoscama.
Najan aptoycaoc mama apquitcoc.
10Am eyispac Visqui ingac, apvita inlhojo nolhing apyimnatem apanco.
Am eyispac Visqui ingac, apvita inlhojo apyavaoc enlhit.
11Apyispaquic mataa Visqui ingac apquiltomja apquilayo.
Mepqui apquilyasquiyam aptemaclha singasicjayo Visqui ingac.
12Quellhip co Jerusalén.
Eltime apquilayo Visqui ingac.
Quellhip co Sión.
Eltime sat apquilayo Dios Visqui ingac.
13Aptomja apquiltamilquiscama quellhip napatavo cotnaja ingmoc.
Apquilmiyovacpec mataa apquitquic as tingma.
14Visqui ingac ayinyema actamilaycam ingvalhoc (mepqui ningilnapomalhca).
Visqui ingac ayinyema cotlaycaoc nintom (trigo apactic).
15Visqui ingac ayinyema singanamaclha acpayjayclha ayapajangvaycmo as nalhpop.
16Visqui ingac ayinyema piyam aptiyam, malha nipquesic apva, malha tajap acpaliyam.
17Visqui ingac ayinyema yingmin alyayem.
Piyam aptomja apyimnatescama yingmin.
18Visqui ingac ayinyema appayvam, yoyam copayjiclhac mocjam actomja acyimnatem.
Visqui ingac ayinyema alhcajayam acyimnatem.
Conyejic sat yingmin.#Job 37.9-11.
19Visqui ingac ayinyema singanamaclha, apquillhoy nic nat Jacob apquilmolhama (Israel).#Ro 3.2.
20Am elvitayac enlhitaoc metnaja nintemolhama aptamjaycam Dios Visqui ingac.
Am nic nat elyasingvocmoc singanamaclha poc enlhitaoc.
Innec ayaco Visqui ingac.
Currently Selected:
SALMOS 147: ENHL
Highlight
Copy
Compare
Share
Want to have your highlights saved across all your devices? Sign up or sign in
