PROVERBIOS 9
9
Apyascamco apanco, poc mepqui apyascamco
1Apquillanac alhta tingma enlhit apyascamco apanco. Siete alhta poste altamila apnalhimquiscama tingma.
2Apquilnapquic alhta apnatoscama, eltovamcoc maycaa. Aptingyascasquic uva ayingmenic actamila, actemaclha ningyam.
3Apcapajasquic alhta apquilasinancama, ellingacsic amyaa tingma nitno:
4¡Ellhingma jilip, quellhip apquitcavoc mepqui acyascamco apquilvalhoc! Apquilanyacpec alhta enlhit mepqui acyascamco apquilvalhoc:
5Ellhingma jilip eltasomoc nintom najan ningyam acpenesomalhca.
6Elvatsaoc sat quellhip apquiltemaclha mepqui apquilyascamco. Eltime sat apquilyascamco, coytic sat acyimnatem apnenyaoc — alhta intomjac amyaa.
7Evennacpoc mataa enlhit, aptomja apquiltamescama enlhit apmapsom.
8Etanovacpoc mataa enlhit, aptomja apquiltamescama enlhit apmapsom. Ingyasicjacpoc mataa enlhit, aptomja apquiltamescama enlhit apyascamco.
9Ningyascasingvocmec sat ancoc enlhit apyascamco, coyangvomoc sat aptemaclha apyascamco. Ningyascasingvocmec sat ancoc enlhit aptamila, coyangvomoc sat aptemaclha apyascamco.
10Acyascamco ingvalhoc ayinyema ningilayo Dios Visqui ingac.#Job 28.28; Sal 111.10; Pr 1.7. Acyascamco ingvalhoc ayinyema ningyicpilquemo Visqui ingac apyimtalhnamo.
11Acyascamco ingvalhoc actomja acyimnatescama ingnenyic. Acyascamco ingvalhoc actomja acvinatescama nintiyascam aclhamoclhojo años.
12Acyascamco apvalhoc innac lhip aptomja maltamescama aptamila. Mepqui acyascamco apvalhoc lhip, ingyanyac poc sat lhip elngamcojo acmasom.
13Mepqui acyascamco apvalhoc enlhit acyeyjamelhma, mepqui apmancactama.
14Apnaclhec tingma apatong netin aptajanem, payjoc netin inquilhe.
15Aptomja apyimnatescama appayvam apcanya enlhit apquillhingam amay:
16¡Ellhingma jilip quellhip apquitcavoc mepqui acyascamco apquilvalhoc! Apquilanyacpec alhta enlhit mepqui acyascamco apquilvalhoc:
17¡Atsic anco ningyam yingmin acminyilhamalhca! ¡Apsisic apanco pan, nintova inlhojo actemaclha ningyilhamalhca! — alhta aptomjac enlhit acyeyjamelhma.
18Apquiltiyaningvocmec sat ancoc enlhit, elpalhavomoc sat apquiljangaoc alanyomalhca coltasomoc. Acvisay alyascamaclha ingjangaoc.
Currently Selected:
PROVERBIOS 9: ENHL
Highlight
Copy
Compare
Share
Want to have your highlights saved across all your devices? Sign up or sign in
