PROVERBIOS 21
21
1Ingvanquic ongillhingsic ayinyem yingmin, ningillana inlhojo yingmin atamnic. Dios Visqui ingac aptomja aplhinquiscama actemaclha apvalhoc apvisqui rey.
2Ninganayquic mataa actamila anco ningiltomjaclha lhalhma anco. Apyasamcoc Visqui ingac actemaclha anco ingilvalhoc.#Pr 16.2.
3Apyispaquic Visqui ingac nintemaclha acpeyvomo. Asilhtec apyisponcama asoc macmescama Dios.#1 S 15.22; Am 5.22-24; Os 6.6; Mt 9.13; 12.7.
4Ayajamalhco ingvalhoc najan ningajamalhco inganco. Ayapongmatem nipyesicsa apquilmapsomcaa acvisay melyascalhma.
5Ongvitac sat actamilaclha, acyitna inlhojo aclhanma ingilvalhoc planes, yavamlha ontimjic. Ongvitac sat acmasom, mepqui inlhojo aclhanma ingilvalhoc planes.
6Alhto inyicje nintingyey cascama ningilnatam ayinyema ningmovan amyaa. Malha tava apac singilmam sat cotnejic, yoyam onticyoc.
7Ongnatovasalhcac sat ayinyema nintemaclha inganco, mepqui inlhojo ningyiplovquiscama actemaclha acpeyvomo.
8Actajem amay, mepqui acpeyvomo nintemaclha, ayinyema actemaclha ingvalhoc acmasom. Impeyvoc mataa nintemaclha, acyitna inlhojo actemaclha ingvalhoc acpeyvomo.
9Tasi inyicje onlhic tingma aplhancoc ayitcoc, am colhno nimpasmeyquiclha tingma apyivey, acmaclha quilvana acmasom.#Pr 25.24.
10Nintingyac mataa nintemaclha acmasom, acyitna inlhojo ingvalhoc acmasom. Mepqui mataa aclhanma ingvalhoc ongimlimojo ingnaymacoc.
11Ongilyasingvomoc mataa, ningvita inlhojo acyanmongayclha aptemaclha apanco apmapsom. Yitnec sat ancoc acyascamco ingvalhoc, quilhvoc sat comoc ingvalhoc asoc singyascasingvoyam.#Pr 19.25.
12Dios aptomja appeyvomo, apquilanoc tingma pac enlhit apquilmapsomcaa. Colhic sat acnatovasa enlhit apquilmapsomcaa.
13Am sat ancoc ongiljalhnoc singilmalhnaycam asoc enlhit mepqui asoc. Mejingiljalhnoyc sat ningilmalhnaycam nincoo, yoyam jingilpasmoc Visqui ingac.
14Comascoc sat aplom pac enlhit, ningmesa inlhojo asoc actamila acyilhamalhca.
15Payjeclhec ingilvalhoc ninlinga inlhojo singyicpilquemo acpeyvomo. Intiyacmec mataa ingilvalhoc, ninlinga inlhojo singyicpilquemo acpeyvomo, acyitna inlhojo acmasom ingilvalhoc.
16Ningyinyovquic sat ancoc nintemaclha acpeyvomo, ongilpalhavomoc sat nipyesicsa apquilmasquingvaycmo nano.
17Colhnanmoc sat ningilnatam, nintingya inlhojo ningnayvom, najan anmin, najan asoc acmasis ningatsisquiscama ingyimpejic.
18Elngamcojoc sat acyimtalhnama enlhit apmapsom, apya'monquiscama enlhit appeyvomo najan mayayo.
19Tasi inyicje nintiyascam yoclhilhma actamopeycaoc, am colhnoc ningmolhama quilvana aclhamasomalhca.
20Ningmiyovquic mataa asoc ingac najan asoc acmasis, acyitna inlhojo acyascamco ingvalhoc. Ningilhaquic mataa asoc ingancaoc, acyitna inlhojo acyeyjamelhma ingvalhoc.
21Nintingyac sat ancoc nintemaclha acpeyvomo, colhic sat singaco, colhic sat ningyimnatem.
22Ingyimpocjac sat tingma apvanyam enlhit apyascamco, comascoc sat apquiltemaclha apquilyimnatem.
23Nintamilcasoc sat ancoc ninlhanma nimpayvam, ongmiyovalhcac sat mepqui ninlingaycamco acmasom.
24Ningyimtalhnesomalho inganco acvisay ayajamalhco najan acyeyjamelhma ingvalhoc, ayinyema nintemaclha inganco.
25Jingajic sat ayitsepma ingnenyic, ayinyema jingilyacmoc ongiltamjam.
26Ningiljalhnec mataa ongillhocac asoc. Mepqui ningmasma asoc, acyitna inlhojo nintemaclha acpeyvomo.
27Intanovalhquic asoc macmescama Dios ayinyema nincoo ningilvisay ningilmasomcaa,#Pr 15.8. ningilposca inlhojo nintemaclha ningilmasom.
28Ongiltovasalhcac sat ningiltomja ningvitaycamco, acyitna inlhojo movan amyaa. Ingvanquic ongilpeyvescasiclha amyaa, acyitna inlhojo ningyascamco amyaa.
29Yitnec mataa ningyinimquiscama ningiltomja ningilmasomcaa. Peyvoc mataa nintemaclha ningilpeyvomo, mepqui ningyinimquiscama.
30Napato Dios comalhquejec mataa nintemaclha ningyascamco, paj najan acyascamco ingvalhoc, paj najan actemaclha ninlhanma actamila.
31Nimpenasquic inyicje ningiltajanquiscama nolhing ningilnamtem, ongilimpocjac sat maa. Visqui ingac aptomja singmescama ningilyimnatem.#Sal 20.7.
Currently Selected:
PROVERBIOS 21: ENHL
Highlight
Copy
Compare
Share
Want to have your highlights saved across all your devices? Sign up or sign in
