PROVERBIOS 14
14
1Inquillanac tingma ac quilvana, acyitna inlhojo acyascamco avalhoc. Intovasquic tingma ac quilvana, acyitna inlhojo acyeyjamelhma avalhoc.
2Ningayoclha Visqui ingac ayinyema nintemaclha ningilpeyvomo. Ningvennéycam Visqui ingac ayinyema nintemaclha inganco acmasom.
3Enlhit acyeyjamelhma appayvam ayinyema ayajamalhco apvalhoc apanco. Enlhit apyascamco appayvam ayinyema aptemaclha aptamilcasomacpo apanco.
4Mongvityejec mataa acyilhna, mepqui inlhojo ninatoscama vayqui alyinyovascama. Colhamiclhac sat acyilhna, ningvita inlhojo altamjaycam vayqui.
5Mepqui ningmovan amyaa asoc ningvitaycamco, acyitna inlhojo acpeyvomo ingvalhoc. Apmopvan amyaa asoc apvitaycamco, acyitna inlhojo acmasom apvalhoc enlhit.
6Mongvityejec mataa acyascamco ingvalhoc, ningiltomja inlhojo ningvennéycam poc. Quilhvoc ningvitay acyascamco ingvalhoc, ayinyema ningilyasingvoyam.
7Pac ongilyamyiclha enlhit acyeyjamelhma, am conyemac maa singyascasingvoyam.
8Actamila nintemaclha ayinyema ningyasingvoyam asoc ningvitaycamco. Aptemaclha apanco enlhit acyeyjamelhma, aptomja apyinimsomap apanco najan apyinimquiscama apnaymacoc.
9Apquillhenacpec mataa apquilsilhnanomap apanco enlhit apquilmapsomcaa. Actamilaycam ingilvalhoc mataa, acyitna inlhojo nintemaclha acpeyvomo.
10Inlingamcoc mataa ingilvalhoc actemaclha singinmelhaycam. Mepqui mataa ningillhanma acpayjayclha ingilvalhoc napato poc enlhit.
11Etvasacpoc mataa tingma pac enlhit apmapsom (apquilmapsomcaa). Emyovacpoc mataa tingma pac enlhit apquilpeyvomo.
12Ningyiplaclhec mataa amay ninganem acpeyvomo. Pilapcasquic nintajanyaa ningitsepma.#Pr 16.25.
13Yitne inyicje ningilasmescama, naysicsa aclingaycamco ingvalhoc. Natamin ningilitsovascama coyiplovjoc acmayovsa ingvalhoc.#Ec 2.2.
14Apyispaquic aptemaclha apanco enlhit apmapsom. Apyispaquic aptamjaycam enlhit actamilaycam apvalhoc.
15Am ongilyascacmoc mataa amyaa, acyitna inlhojo acyeyjamelhma ingvalhoc. Ongilyipconic mataa ninlingay amyaa, acyitna inlhojo acyascamco ingvalhoc.
16Ningilacac mataa nintemaclha acmasom, acyitna inlhojo acyascamco ingvalhoc. (Am ingyacac mataa nintemaclha acmasom enlhit acyeyjamelhma.) Am ongilacac nintemaclha acmasom, acyitna inlhojo acyeyjamelhma ingvalhoc.
17Nintemaclha ninlom ayinyema actemaclha acmasom ingvalhoc. Mepqui nintamongvaycmolhma nincoo, acyitna inlhojo actamilaycam ingvalhoc.
18Mepqui ningyasingvoyam mataa ayinyema acyeyjamelhma ingvalhoc. Ningilyasingvocmec mataa acyovoclhojo, acyitna inlhojo acyascamco ingvalhoc.
19Colhic sat ayaco apquilpeyvomo, eljalhic sat enlhit apquilmapsomcaa. Elanyacpoc sat apquilpeyvomo melmiyovejec nintom, apquililmalhna inlhojo apquilmapsomcaa.
20Ningiltanovalhquic nipyesicsa ingnaymacoc, mepqui inlhojo ningilnatam. Aplhameclhec mataa ingnaymacoc, acyitna inlhojo ningilnatam (cascama ningilnatam).
21Ongilsilhnanalhcac inganco, ningiltanova inlhojo ingmoc. Copayjiclhac mataa ingvalhoc, acyitna inlhojo ningamliyam enlhit mepqui asoc.#Sal 41.1.
22Ongillhnanmoc sat mepqui amay, acyitna inlhojo alquitamsama ingvalhoc almasomcaa. Ongilasicjalhcac sat mataa, acyitna inlhojo actamilaycam ingvalhoc.
23Colhamiclhac sat mataa asoc inganco, acyitna inlhojo ningvascapma ningiltamjaycam. Mepqui mataa asoc inganco, acyitna inlhojo ningillhamasomalhca ningilyataycam.
24Acyascamco ingvalhoc acyitsomalhca corona nimpocanma actamila. Acyeyjamelhma ingvalhoc acyitsomalhca corona nimpocanma acmasom, actanovmalhca.
25Ongilvomsic sat tap ingnaymacoc, ningiltomja inlhojo ningvitaycamco nasoc anco. Eticyoc sat ingnaymacoc, ningiltomja inlhojo ningvitaycamco movan amyaa.
26Colhic nincoo aljalhneycam ingvalhoc, acyitna inlhojo ningayo Dios, elmiyovacpoc sat najan inquitquic.
27Acyimnatem ingnenyic ayinyema ningayo Dios. Ongilvomsalhcac sat tap, naysicsa singilmam acvisay ningitsepma.#Pr 13.14.
28Mayayo aptomja apvisqui, apvita inlhojo aplhamayclha enlhitaoc apnaymacoc. Comascoc sat aptimem apvisqui, apvita inlhojo apmasilhte apnaymacoc.
29Colhic sat ningyascamco nincoo, acyitna inlhojo actamilaycam ingvalhoc. Mepqui mataa ningyascamco, acyitna inlhojo actamjaycam ingvalhoc.
30Acyimnatem mataa ingyimpejic, acyitna inlhojo actamilaycam ingvalhoc. Malha pascapma actovascama ingyimpejic, ayinyema aclhenseycam ingvalhoc.
31Ningyimtalhnescama apquilvalhoc mepqui apquilnatam, acvisay ningvennéycam. Dios apquilantipquiscama aclhamoclhojo asoc. Ningamliyam ingnaymacoc acvisay ningayo Dios Visqui ingac.
32Ongiltovasalhcac sat, acyitna inlhojo nintemaclha inganco acmasom. Ongmiyovalhcac sat, acyitna inlhojo nintemaclha acpeyvomo.
33Coyangvomoc sat actemaclha ningyascamco, acyitna inlhojo ningayo Dios. Mepqui mataa apquilyascamco enlhit acyeyjamelhma apquilvalhoc.
34Colhic sat ayaco apyovoclhojo enlhit, acyitna inlhojo apquiltemaclha acpeyvomo. Colhic sat acmanquesa enlhitaoc, acyitna inlhojo melyascalhma apancaoc.
35Colhic sat singaco ayinyema Visqui ingac, acyitna inlhojo ningvascapma ningiltimesaycam. Ongiltanovalhcac mataa, mepqui inlhojo ningvascapma ningiltimesaycam.
Currently Selected:
PROVERBIOS 14: ENHL
Highlight
Copy
Compare
Share
Want to have your highlights saved across all your devices? Sign up or sign in
