PROVERBIOS 12
12
1Coyangvomoc sat actemaclha ningyascamco, ningyiplovquisa inlhojo singiltamescama. Acyeyjamelhma mataa ingvalhoc, ningiltanova inlhojo singiltamescama acpeyvomo.
2Innec singaco napato Dios, apvita inlhojo actamilaycam ingvalhoc. Ingiltanovquic mataa Dios, apvita inlhojo acyeyjamelhma ingvalhoc.
3Mepqui singanamaclha Dios, mongmiyovalhquejec sat mataa. Ningilyajayquiclho singanamaclha, ongmiyovalhcac sat, acno yamit acma inquipmenaoc (ayquipmenaoc).
4Malha apvisqui etnejic quilvana atava, ayinyema quilvana actemaclha altamsomalhca. Colhic actimesa apmapsom quilvana atava, ayinyema quilvana actemaclha mepqui altamsomalhca.
5Peyvoc mataa alquitamsama ingvalhoc, acyitna inlhojo nintemaclha acpeyvomo. Acmasom mataa alquitamsama ingvalhoc, acyitna inlhojo nintemaclha acmasom.
6Malha tava apac singilmam trampa, actomja appayvam enlhit apmapsom. Malha singmasma ayinyema appayvam enlhit appeyvomo.
7Apquiltimsacpec mataa enlhit apquilmapsomcaa, comascoc sat apquileyvam. Melmasquingvomejec mataa apquilmolhama enlhit apquilpeyvomo.
8Innec mataa ayaco enlhit, acyitna inlhojo acyascamco apvalhoc. Evennacpoc mataa enlhit, acyitna inlhojo acyeyjamelhma apvalhoc.
9Actamila inyicje ongiltamjam mepqui singayo ingnaymacoc. Paj cotamila nintemaclha mayayo, mepqui lha nintom nipyesicsa ingnaymacoc.
10Ningilvisay ningilpeyvomo, ongilyasamcojoc mataa allingaycamco (ongilimlimojo) ninatoscama. Mepqui apcamliyam apnatoscama enlhit apmapsom.
11Colhic sat mataa cotlaycaoc nintom, acyitna inlhojo ningiltamjaycam amyip. Colhic sat acyeyjamelhma ingvalhoc, nintingyey inlhojo asoc ayitsepma ingnenyic.
12Ayitsepma apnenyaoc acvisay apquiltemaclha apancaoc apquilmapsomcaa. Ningiltemaclha acpeyvomo alyitsomalhca yamit ayquipmenaoc alyimnatem.
13Enlhit apmopvan amyaa emacpoc sat, malha trampa acmam, ayinyema appayvam apanco. Enlhit appeyvomo eyca, emyovacpoc sat.
14Actamila sat ancoc nimpayvam,#Pr 13.2; 18.20. colhojoc sat acyilhna actamila, yoyam ontoc. Ongillhocac sat acyanmongam, acyitna inlhojo ningiltamjaycam.
15Ongiltimesalhcac inganco ningilpeyvomo, acyitna inlhojo nintemaclha acmasom. Ningiljalhnoc mataa singiltamescama, acyitna inlhojo acyascamco ingvalhoc.
16Invitalhquic mataa actemaclha ninlom, acyitna inlhojo acyeyjamelhma ingvalhoc. Comejec mataa ingvalhoc singvenéycam, acyitna inlhojo acyascamco ingvalhoc.
17Onlingacsic nasoc anco ningvitaycamco, naysicsa macpeyvescasquiclha amyaa. Onlingacsic ningmovan amyaa, acnamco inlhojo anit ingvalhaoc.
18Asquejec mataa poc enlhit appayvam, malha sovo acyimsascama. Actamilquisquiyam ingvalhoc ayinyema appayvam enlhit acyascamco apvalhoc.
19Comasquingvomejec mataa amyaa actomja nasoc anco, ayinyema enlhit appeyvomo. Acyavataclhojo mataa aptiyascam enlhit apmopvan amyaa.
20Acmasom mataa apquilvalhoc enlhit apquilmopvancaa amyaa. Apquiltasic enlhit apquilpamejitsomap actamilaycam apquilvalhoc, apquilpayesayclha ingilvalhoc.
21Mepqui ninlingaycamco acmasom ningilvisay ningilpeyvomo. Avanjec mataa apquillingaycamco acmasom enlhit apquilmapsomcaa.
22Ingiltanovquic mataa Dios, apvita inlhojo nintemaclha ningmovan amyaa. Innec singaco napato Dios, aplinga inlhojo ninlhanma mepqui ningyeycajascaoc.
23Mepqui ningilinlhanyacmo ningiltimnascama, acyitna inlhojo acyascamco ingvalhoc. Avanjec mataa aplingascama aptemaclha apanco enlhit acyeyjamelhma.
24Onlhojoc sat ningilviscaa, acyitna inlhojo ningilvascapma nintamjaycam. Onlhojoc sat ningilmomalhca, coyoyam inlhojo nintamjaycam.
25Ningiljalhemalhca ayinyema acnatjemo ingvalhoc, malha acyajapmo ingvalhoc. Acpayjayclha ingilvalhoc ayinyema actamila appayvam apanco ingmoc.
26Nintingyey ingmoc actomja nintemaclha ningilpeyvomo. Ongillhnanmoc amay, acyitna inlhojo acmasom ingvalhoc.
27Metejec mataa apyamonquilhma enlhit apmompaviyam, mepqui inlhojo apvascapma. Ongvitac mataa cotlaycaoc asoc acmamnave, acyitna inlhojo ningilvascapma.
28Colhic sat acyimnatem ingnenyic, ningyiplovquisa nintemaclha acpeyvomo. Comascoc sat acyimnatem ingnenyic, mepqui inlhojo ningyiplovquiscama nintemaclha acpeyvomo.#Ro 6.21-22.
Currently Selected:
PROVERBIOS 12: ENHL
Highlight
Copy
Compare
Share
Want to have your highlights saved across all your devices? Sign up or sign in
