SAN MATEO 28

Aplhaticjangvoycamlha Jesús

(Mr 16.1-8; Lc 24.1-12; Jn 20.1-10)

1Lhama alhta acyeycaa acnim ningnayclha. Alhtooc anco alhnancoc semana intomjac. Inquilmiyaclhec alhta María Magdalena najan moc María acyitnaclha tacjalhop. 2Pilapcasquic alhta acyovjamcaa lhop. Netin alhta apquinyemac lhama ángel Dios apcasinancama. Apliquic alhta mataymong acyiviy ayapma atong tacjalhop. Apnacmec alhta netin mataymong. 3Apvitacpec alhta ángel malha apquilyinmayam. Apmopoy apanco alhta aptalhnama, am colhno moc asoc acmopoy. 4Apquilacac alhta singilpilhtetemo. Apquilpilhyinimquic alhta, am alhta elyimnac (malha apquilitsepma apquiltomja). 5Aptomjac alhta ángel apquilanya quilvanaa:

—Nojela nasa. Acyasamcoc coo, Jesús inquilquitamac quellhiya, apyipitsomap alhta asoc timyescama. 6Paj elhnac aso. Aplhaticjangvocmec lhac acno aplhanma alhta. Collhingma, colanojo apquilpiquenaclha alhta Visqui ingac. 7Coltajojo sat mocjam. Coltimnasquiclha sat apquiltamsoycaoc amyaa aplhaticjangviyam nipyesicsa apquilmasquingvaycmo. Emyaclhac sat apmamyi yoclhilhma Galilea. Elviticlhac sat maa. Acvamlha aso —alhta aptomjac.

8Inquiltajavoc alhta mocjam quilvanaa. Inquilacac alhta siclho, inquilitsovasoc najan. Innateymaoclhec alhta, yoyam coltimnasquiclha amyaa apquiltamsoycaoc. 9Pilapcasquic alhta altajanyaa Jesús nalhit amay. Aptomjac alhta Jesús: “Quellhiya nac” —alhta aptomjac. Yejemoc alhta almongvactamo quilvanaa apmancoc Jesús, alpayaso.

10Aptomjac alhta Jesús apquilanya quilvanaa:

—Nojela nasa. Coltimnasquiclha sat elyalhinga. Colane sat elmiyaclhac maa yoclhilhma Galilea, sat oltajanyac maa —alhta aptomjac.

Apquillhanma singilpilhtetemo

11Naysicsa allhingam alhta quilvanaa apquilvoclho tingma Jerusalén singilpilhtetemo apquiljalhanma tacjalhop. Apquililtimnasquic alhta apquilimja apmamyi sacerdotes amyaa apquilvitay tacjalhop. 12Yejemoc alhta apcaneyclho apquilimja apmamyi sacerdotes najan apquilyimtalhnamo judíos, yoyam elpamejitsacpojo. Apquilmesquic alhta cotlaycaoc solyayem yoyam eltimjic apquilmopvan amyaa singilpilhtetemo. 13Apquiltomjac alhta apquilanya:

—Eltime sat ellhenic quellhip: Alhtaa apquilvoctac apquiltamsoycaoc. Apquilminyilhquic alhta Jesús apyovoclhojo ningnatenaclha. 14Aplingangvoclhec sat anco amyaa yatapvisqui co Roma, nocoltamjam nasa apquilvalhoc quellhip. Nincoo sat ongilpamejitsalhcojo, yoyam melsilhnanacpejec quellhip —alhta apquiltomjac.

15Yejemoc alhta apquilma solyayem singilpilhtetemo. Apquilyajaclhoc alhta actomjaclha apquilanyomap eltimjic. Inlingalhquic alhta as amyaa nipyesicsa judíos. Inlhenalhquic as amyaa mataa acvocmo as ningvamlha nac jay.

Jesús nipyesicsa apquiltamsoycaoc

(Mr 16.14-18; Lc 24.36-49; Jn 20.19-23)

16Yoclhilhma Galilea alhta apquilmiyaclha once apquiltamsoycaoc.#Mt 26.32; Mr 14.28. Apquilpeyvoc alhta netin inquilhe actemaclha aplhanma Jesús. 17Lhama alhta apvitacpo Jesús, apquilpolintamo apquinmamcaclha. Apquilyascacmec alhta napocja. 18Yejemoc alhta apyoctamo Jesús apquiltamsoycaoc. Aptomjac alhta Jesús apquilanya:

—Emcasquic coo Dios Ingyapam sicmovan aclhamoclhojo asoc netin najan nalhpop. 19Ellhing sat quellhip nipyesicsa enlhit lhalhma anco. Eltamsaoc sat enlhitaoc, yoyam otnejic siltamsoycaoc.#Hch 1.8. Elyapasquisaoc yingmin naysicsa apquillhanma Ingyapam najan Apquitca najan Espíritu Santo. 20Ellhicmos sat enlhitaoc, yoyam elyiplovcasojo aclhamoclhojo asoc silanya eltimjic quellhip. Quip elanojo, molyinyovejec sat mataa quellhip acvocmo actamongvomlha nelha acnim as nalhpop —alhta aptomjac Jesús. Amén.

Currently Selected:

SAN MATEO 28: ENHL

Highlight

Compare

Copy