SAN MATEO 24

Jesús aplhanma etvasacpoc tingma apponquinomap

(Mr 13.1-2; Lc 21.5-6)

1Yejemoc alhta aptepa Jesús tingma apponquinomap. Aplhinquic alhta. Apquilyoctac alhta apquiltamsoycaoc. Apquililtamjoc alhta ellhicmocsic aptamila apyovoclhojo tingma apponquinomap. 2Apcatingmavoc alhta Jesús:

—¿Apquilvita ya quellhip as asoc? Actomjac coo silanya quellhip: Comoc sat acnim, yoyam etvasacpoc as tingma. Caymalhquejec sat lhama mataymong tacjalhit moc. Cosovjalhcojoc sat colhic alyanincasamcojo as mataymong —alhta aptomjac.

Asoc monquinatquiscama actamongvomlha nelha acnim

(Mr 13.3-23; Lc 21.7-24; 17.22-24)

3Apnaclhec alhta Jesús netin inquilhe acvisay Olivos. Yejemoc alhta apquilyoctamo apquiltamsoycaoc. Apquiltomjac alhta apquilanya Jesús:

—Visqui, ¿jalhco sat acvam cotnejic as asoc aplhena lhac? ¿Soc sat asoc ongvitac monquinatquiscama, yoyam cotmongvomoc nelha as asoc apvactamo sat lhip? —alhta apquiltomjac.

4Aptomjac alhta Jesús apquillhicmosa apquiltamsoycaoc:

—Elavojo quellhip. Noelyinimsap nasa. 5Elilhyemoc sat aplhamoclhojo enlhit ellhenic sat coo sicvisay: “Coo nac Cristo” —sat eltimjic. Elyinimsacpoc sat aplhamoclhojo enlhit. 6Apquillingac sat ancoc quellhip amyaa apquilnapacpilha najan quimpocjacme. Noela nasa quellhip. Mongvanquejec mongvita as asoc. Am covocmoc mocjam nelha acnim. 7Elnapacpoc sat enlhitaoc. Elnapacpoc sat najan apquilviscaa. Coyovjam sat lhop (nalhpop) lhalhma anco. Mayc sat colnapoc enlhitaoc. 8Eycaso actiyapmaclha siclhoc anco acmasca.

9‘Natamin elmacpoc sat quellhip. Colhic sat ayasquisa apyimpeoc quellhip. Elticyoc sat quellhip. Eltanovacpoc sat quellhip ayinyema apquillhanma sicvisay.#Mt 10.22. 10Elvatsamcoc sat apquiltemaclha melyasquiyam aplhamoclhojo enlhit. Elanic sat mataa emacpoc poc. Etanoveclhac sat mataa poc. 11Elvac sat apquilsoycam apquilmopvan amyaa. Elyinimsic sat aplhamoclhojo enlhit. 12Acmasom sat cotnejic nipyesicsa enlhitaoc. Natamin comascoc sat apquilasicjayo enlhit apnaymacoc. 13Apquilinlhanacmec sat ancoc enlhit actamongvomlha nelha, evomsacpoc sat tap.#Mt 10.22. 14Colngalhcac sat tasic amyaa Dios apquilnancascama lhalhma anco. Apsovjacpec sat ancoc enlhit apquillingay lhalhma anco, eyca pa incotmongvomoc sat nelha.

15‘Aptalhesquic nic nat Daniel profeta Dios aplingascama. Aclhenomalhca acyitnaclha acpasyamlha najan actovascamaclha.#Dn 9.27; 11.31; 12.11. Apquilvitac sat ancoc quellhip as asoc tingma apponquinomap (apquilyipsatquic sat ancoc amyaa, elyasamcojo anco). 16Enlhit apnaycam yoclhilhma Judea, elyas sat inquilha, yoyam elyilhanmoc. 17Apnacmec sat ancoc enlhit tingma netin, nongyane nasa etyapoc, yoyam evoclha asoc apanco congne tingma. 18Apnacmec sat ancoc enlhit amyip, nongyane nasa etajiclha, yoyam evoclhac apquilantalhnama.#Lc 17.31. 19¡Quilvanaa sat layi actomja inlovsavo najan inalavaa! 20Elilmalhna sat quellhip Dios Ingyapam, yoyam melinyejec sat nipyesicsoc piyam najan acnim ningnayclha. 21Coyajapoc sat apquilvalhoc enlhitaoc apquilvita sat acmasca. Am nic nat cotamalhca actema nac jay ayenmo apquilantipquiscamaclha asoc Dios Ingyapam.#Dn 12.1; Ap 7.14. Najan cotalhquejec sat mocjam actema nac jay. 22Am sat ancoc eyavatasoc Dios Ingyapam acmasca, melvomejec sat tap enlhitaoc. Dios apquitquic apquilyacyesomap ayinyemaclha apyavatescasac acmasca.

23‘Aptomjac sat ancoc lhama apquilanya quellhip: “Quip elanojo Cristo apvaa,” najan lha “Apnec maa Cristo” —sat etnejic. Noelaylhojo nasa, elyasquim anco. 24Elilhyemoc sat enlhit apquiltimesomap apanco Cristo najan apquilsoycam apquilmopvan amyaa. Ellhicmocsic sat asoc monquinatquiscama najan apquiltamjaycam sinpilapquiscama. Apquililtamjo inyicje elyinimsic Dios apquitquic apquilyacyesomap. 25Altimnasquic lhac ajanco yicpintama cotnejic as asoc. 26Apquiltomjac sat ancoc apquilsoycam apquilmopvan amyaa apquilanya quellhip: “Quip elanojo, apnec Cristo yoclhilhma actamopeycaoc” —sat eltimjic. Noeltiyaningvomjo nasa quellhip. Eltimjic sat elanic quellhip: “Quip elanojo, apnec Cristo congne tingma” —sat eltimjic. Noelaylhojo nasa. 27Coo sicvisay Sictiyam Sictomja Enlhit. Invocmec sat ancoc acnim sicvoyctamlha,#Lc 17.23-24. malha quilyinmayam sat cotnejic. Colsacsic sat olhma lhalhma anco. 28Apquiltemaclha mama, appasmec mataa acyitnaclha asoc ápac.#Lc 17.37.

Apvoyctamlha sat apvisay Aptiyam Aptomja Enlhit

(Mr 13.24-37; Lc 21.25-33; 17.26-30,34-36)

29Natamin acsovjomalhca acnim acmasquilha, cajancac sat acnim,#Is 13.10; Jl 2.10,31; 3.15; Ap 6.12. ingyajancac sat piltin.#Is 13.10; Ez 32.7; Jl 2.10; 3.15. Epalentac sat apyova,#Is 34.4; Ap 6.13. colyovjam sat asoc alyimnatem netin.#Jl 2.10. 30Cotalhcac sat asoc monquinatquiscama netin, sicvactamo sat sicvisay Sictiyam Sictomja Enlhit. Elyipcalhic sat aplhamoclhojo enlhitaoc as nalhpop. Otalhcac sat sicvisay Sictiyam Sictomja Enlhit sicvactamo sat naysicsa yipjopay.#Dn 7.13; Ap 1.7. Coyiplovjoc sat sicmovan najan gloria siyapongmatem ajanco. 31Olapajacsic sat ayilhtingyovam apquilpayvascama ángeles. Elansiclhac sat apquitquic apquilyacyesomap. Elinyintac sat lhalhma anco. Elinyintac sat netin najan nalhpop.

32‘Elyasamcojo quellhip actemaclha higo yamit. Inyimselec sat ancoc naváyc yamit, eyca pa elyasamcojo, camquitvocmec mocjitma. 33Najan lha quellhip. Apquilvitac sat ancoc as asoc siclhena lhac, elyasamcojo sat, ayamquito sicvoyctamlha. Ningatoc, malha tingma apatong. 34Actomjac coo silanya quellhip: Naso, colvitalhcac sat as asoc yicpintama esovjacpoc as enlhitaoc. 35Comascoc sat netin najan nalhpop, comasquejec sat coo sicpayvam.

36‘Mongyasamquejec acvamlha acnim yoyam cotnejic (yoyam ovotac). Am najan elyasamcoc ángeles Dios apquilasinancama netin. Am najan eyasamcoc Dios Apquitca. Ingyapam eyca apvamlha apanco apyasamcoc.

37‘Innoc actema ilhnic nat apmaclha Noé,#Gn 6.5-8. sat cotnejic sicvactamo sat sicvisay Sictiyam Sictomja Enlhit. 38Eycaso apquiltemaclha enlhitaoc amamyi ilhnic nat yingmin acvanyam. Apquiltovcamquic nic nat, apquilyinamquic nic nat, inquilyimjapamquic nic nat, acvocmo acnim aptalhnama Noé yamit aysicsic acyiviy actiyascam nayingmin. 39Am nic nat elyasamcoc enlhitaoc, yoyam covac yingmin acvanyam. Invaac nic nat yingmin acvanyam. Apsovjacpoc nic nat enlhitaoc.#Gn 7.6-24. Sat cotnejic sicvactamo sat sicvisay Sictiyam Sictomja Enlhit. 40Elhnam sat amyip apcanit enlhit. Lhama sat colhic acyantama, etamopamcoc sat poc. 41Colhnam sat anit quilvanaa alticlhiclhama. Lhama sat colhic acyantama, cotamopamcoc sat moc.

42‘Elalh anco quellhip. Am elyasamcoc quellhip acvamlha acnim, yoyam evotac Apvisqui apancaoc. 43Elyasamcojo quellhip actemaclha sicyitquiscama. Apyasamcoc sat ancoc enlhit apmolhama apyap acvamlha alhtaa yoyam evac apminyilhma, eyca pa elaylhic mataa, yoyam elyacsilhma apminyilhma. 44Elpenacsojo sat quellhip lha. Apquilanayquic sat ancoc quellhip movota sicvisay Sictiyam Sictomja Enlhit, cotlapsic sat ovota —alhta aptomjac.#Lc 12.39-40.

Lhama apquilancam apquilyajayquiclho, poc eyca melyajayquiclho

45Aptomjac alhta mocjam Jesús:

—¿Soc enlhit apyitsomacpo apquilancam apquilyajayquiclho najan apyascamco? ¿Jave ya apquilancam apcanyomap etamilsic apvisqui tingma pac, aptema laa apmilasictem aptoycaoc apquiltamjaycam enlhit? 46Apvactamo sat apvisqui, etangvotac sat aptamjaycamcaclha apcanyomap elana apquilancam. Apquilinyejemoc anco apquilancam nac maa. 47Actomjac coo silanya quellhip: Naso, ingyanyacpoc sat etamilsic aclhamoclhojo apvisqui apquilnatam. 48Intomjac sat ancoc apvalhoc apquilancam: Mevotayc sat lhaja quilhvo visqui ajac —sat cotnejic apvalhoc. 49Eyca pa elyicpilhquetamcoc enlhit apquiltamjaycamo lhama. Appasmec mataa aptoycaoc najan apyinaycaoc anmin ato. 50Evotac sat apvisqui pac naysicsa meljalhanma. Cotlapsic sat evota. 51Ingyascacsojoc sat apyimpejic acyanmongayclha, acno acyanmongayclha apquiltemaclha apquilaycmascam. Elyipcalhic sat maa, cotovamcoc sat apmaoc —alhta aptomjac.

Currently Selected:

SAN MATEO 24: ENHL

Highlight

Compare

Copy