SAN MATEO 20
20
Apyitquiscama Jesús apquiltamjaycam enlhit (uva avjac)
1Visqui netin apquilnancascama acyitsomalhco apmolhama apyap malha apvisqui. Aplhinquic nic nat alhtooc anco, yoyam etingyam enlhit apquiltamjaycam uva avjac. 2Apquiltimnasquic nic nat emquesic lhama solyayem acyiviy acyanmongam aptamjaycam moclhama acnim. Am nic nat elvinamcoc acyanmongam enlhit. Yejemoc nic nat apquilapajasa eltamjam uva avjac. 3Invaac nic nat netin acnim apmiyaclho mocjam natingma. Apvitangvoclhec nic nat enlhit apcanaycam mepqui apquiltamjaycam. 4Aptomjac nic nat apquilanya: “Ingva, eltiyaningvomjo quellhip lha eltamjam.” 5Ingyitsicso acnim nic nat aptingyangveclho mocjam enlhit, yoyam eltamjam. Najan maa actalhnam. 6Yicpintama actalhnama acnim nic nat apvitangveclho mocjam enlhit mepqui apquiltamjaycam. Aptomjac apvisqui apquilanya enlhitaoc: “¿Soctomja apcanamcaa nac aso aclhamoclhojo acnim mepqui apquiltamjaycam?” —nic nat aptomjac. 7Apquilatingmavoc nic nat: “Am evac lhama, yoyam jingilanic ongiltamjam” —nic nat apquiltomjac. Yejemoc nic nat apquilanyamcaa: “Ingva, eltiyaningvomjo quellhip lha eltamjam uva avjac. Olmesic sat acyanmongam acvamlha siclhanma olmesic” —nic nat aptomjac. 8Intalhnec nic nat acnim. Aptomjac nic nat apvisqui apcanya apquimja apmamyi: “Ilevam sat apquiltamjaycam enlhit. Ilmes sat acyanmongam apquiltamjaycam.#Lv 19.13; Dt 24.15. Ilmes sat apmamyi acyanmongam apquiltomja apquiltamjaycam alhayi. Alhayi sat ilmes acyanmongam apquiltomja apquiltamjaycam apmamyi” —nic nat aptomjac. 9Lhama ilhnic nat apquilvactamo apquiltomja apquiltamjaycam alhayi. Apquillhovamquic nic nat moclhama acyanmongam apquiltamjaycam. 10Yejemoc nic nat apquilvactamo apquiltomja apquiltamjaycam apmamyi. Apquilanayquic nic nat coyeycajangvomjo apquillhoy acyanmongam apquiltamjaycam. Apquillhovamquic nic nat mataa lhama solyayem acyiviy. 11Lhama ilhnic nat almalhco solyayem. 12Yejemoc nic nat apquiltamjoc enlhit apquilanya apvisqui: “¿Soctomja apnaso lhip ningillhoy acyanmongam enlhit apquiltamjaycam alhayi? Apquiltamjaycam acvamlha lhama hora. Avanjec nincoo ningiltamjaycam acnim anco naysicsa acmajat” —nic nat apquiltomjac. 13Aptomjac alhta apvisqui apcanya lhama enlhit: “Lhip emoc, am otvasac lhip. ¿Apvinamco ya lhquip siclhenaclha acyanmongam aptamjaycam? 14Ilic solyayem pac, itajiclha. Altamjoc coo olhnasojoc apquillhoy acyanmongam apquiltamjaycam alhayi. 15¿Movanqueje ya otlhaoc solyayem ajac acno aclhanma evalhoc? ¿Eyasipcasqui ya lhquip sictemaclha sictamila coo?” —nic nat aptomjac. 16Aptomjac alhta Jesús: —Eycaso siclhena lhac: Apquilimja alhayi elaniclhac sat apmamyi najan apquilimja apmamyi elaniclhac sat alhayi. Aplhamo inyicje enlhit apquilanyomap, apcanito eyca apquilyacyesomap —alhta aptomjac.#Mt 19.30; Mr 10.31; Lc 13.30.
Moc aplhenayclha Jesús yoyam ematong
(Mr 10.32-34; Lc 18.31-34)
17Apmiyaclhec alhta Jesús tingma Jerusalén. Nicja amay alhta apquilyascasa doce apquiltamsoycaoc. Aptomjac alhta Jesús apquilanya:
18—Quip elanojo quellhip. Ningmiyaclhec nincoo tingma Jerusalén. Omalhcac sat sicvisay Sictiyam Sictomja Enlhit. Colhic sat seyantama apnaclha apquilimja apmamyi sacerdotes najan apquilyascamco apquiltemaclha. Olhenalhcac sat sicmasom. Elpamejitsacpoc sat, yoyam jelajic. 19Colhic sat alanya metnaja judíos, yoyam jelmoc coo. Ongvasmesalhcac sat maa. Colhic sat selyicpilhquitamcaa. Oyipitsalhcac sat asoc timyescama. Natqui acnim sat cotnejic olhaticjangvomoc mocjam —alhta aptomjac.
Actemaclha acpayvam Jacobo najan Juan inquin
(Mr 10.35-45)
20Yejemoc alhta acvaa Zebedeo aptava najan ayitquic. Inquilticlhicvaac alhta atapnaoc apquinmamcaclha Jesús. Inquiltamjoc alhta colmalhna lhama asoc. 21Aptomjac alhta Jesús apcanya quilvana:
—¿So actingya yi lhiya? —alhta aptomjac.
Incatingmavoc alhta quilvana:
—Quip ilanojo eyitquic. Ingyane sat elhojoc lhama eyitquic lhip apquilnancascama. Lhama sat elhic napocja actamilaclha, poc sat elhic nipsancalvelha lhip.
22Apcatingmavoc alhta Jesús:
—Am elyasamcoc quellhip asoc actomjaclha selmalhnaycam. Oynic sat coo asoc acmasca. ¿Apvancaa ya quellhip lha elyinamcoc? Colhic sat seyapasquisa yingmin actemaclha mayasquiscama eyimpejic. ¿Apvancaa ya elhnasojoc quellhip lha? —alhta aptomjac.
Apquilatingmavoc alhta:
—Ingvanqui —alhta apquiltomjac.
23Aptomjac alhta Jesús apquilanya:
—Naso, elyinamcoc sat quellhip asoc acmasca, yoyam oynic coo. Colhic sat najan acyapasquisa yingmin actemaclha mayasquiscama apyimpeoc quellhip, acno coo lha. Movanquejec coo ongvanic elhic selyascamaclha najan nesancalvelha. Apquilanescasqui inyicje apquiltajanem coo Tata, yoyam elhnam enlhit apquilanyomap —alhta aptomjac.
24Lhama alhta apquillinga apnaymacoc diez apquiltamsoycaoc. Apquiltanovacpec alhta Jacobo najan Juan. 25Apquilevam alhta Jesús. Aptomjac alhta Jesús apquilanya apquiltamsoycaoc:
—Apquilyasamco inyicje quellhip apquiltemaclha apquilviscaa lhalhma anco. Apquilasinaquic mataa apquilancam. 26Noelvajanaoc nasa quellhip apquiltemaclha maa.#Lc 22.25-26. Apquiltamjoc sat ancoc lhip etnejic apyimtalhnamo, itne sat apquilancam apnaymacoc. 27Apquiltamjoc sat ancoc lhip etnejic apquimja apmamyi, itne sat apquilancam apnaymacoc.#Mt 23.11; Mr 9.35; Lc 22.26. 28Acvaac coo sicvisay Sictiyam Sictomja Enlhit, yoyam olanam enlhitaoc.#Lc 22.27; Jn 13.12-15. Am oltamjoc jelanam enlhit malha visqui. Altamjoc oyinyoc sicyimnatem acyanmongam aplhamoclhojo enlhitaoc —alhta aptomjac.
Jesús apquiltamilquisquiyam apcanit mepqui apataoc
(Mr 10.46-52; Lc 18.35-43)
29Apquilquimpaclhec alhta mocjam tingma Jericó. Apquilyiplaclhec alhta aplhamoclhojo enlhit. 30Apquilvitacpec alhta apcanit enlhit mepqui apataoc apnaycam nicja amay. Apquillingoc alhta apvisay Jesús naysicsa apquilyeycajangviyam. Yejemoc alhta apquilpalhamamcaa:
—¡Visqui, David apquitca, jingimlimojo nincoo! —alhta apquiltomjac.
31Apquilasquic alhta enlhitaoc. Apquilanyacpec alhta elvanma inyicje. Inyangvocmec alhta apquilpalhamaycam:
—¡Visqui, David apquitca, jingimlimojo nincoo! —alhta apquiltomjac.
32Yejemoc alhta apquiningvocmo Jesús. Apquevamcaa alhta mepqui apataoc. Aptomjac alhta Jesús apquilanya mepqui apataoc:
—¿Soc asoc apquililtamjoc ollana? —alhta aptomjac.
33Apquilatingmavoc alhta:
—Visqui, ningiltamjoc ongilviticlha olhma —alhta apquiltomjac.
34Apyovsec alhta Jesús apquilano. Yejemoc alhta appatningvocmo apataoc. Yejemoc alhta acnaclho apataoc. Apquilyiplaclhec alhta Jesús.
Currently Selected:
SAN MATEO 20: ENHL
Highlight
Share
Compare
Copy
Want to have your highlights saved across all your devices? Sign up or sign in
