SAN MATEO 2
2
Apquilvoy maycaa apquilyascamco aptemaclha apyova
1Lhama alhta aptiyacmo Jesús tingma Belén yoclhilhma Judea. Herodes alhta aptomja apvisqui as yoclhilhma. Yejemoc alhta apquilmiyacmo tingma Jerusalén enlhit apquilyascamco aptemaclha apyova. Apquilinyemac alhta actiyapmaclha acnim. 2Apquiltomjac alhta apquilanya:
—¿Co lha apyitna sicaa quilhvo aptiyam, yoyam etnejic apvisqui nipyesicsa judíos? Ningvitac nincoo apyova apanco actiyapmaclha acnim. Nintiyaningvavoc nincoo asi, yoyam ongilpayicsojo Visqui apjalhnancoc —alhta apquiltomjac.
3Intamjam alhta apvalhoc apvisqui Herodes aplinga amyaa. Najan maa aplhamoclhojo enlhitaoc apnaycam tingma Jerusalén. 4Yejemoc alhta apquilanya apvisqui Herodes, yoyam ingyaniclhojo apquilimja apmamyi sacerdotes najan apquilyascamco apquiltemaclha. Apquiltamjoc alhta eyasamcojo yoycamlha etyamoc Cristo. 5Apquilatingmavoc alhta:
—Etyamoc sat tingma Belén yoclhilhma Judea. Eycaso actemaclha aplhanma ilhnic nat profeta Dios aplingascama aptalhescama vaycajac:
6Lhip tingma Belén yoclhilhma Judea.
Jave lhip tingma meyoy, am elhno aplhamoclhojo tingma Judá apcaoclha.
Sat ingyinyema Apvisqui as tingma.
Eltamilsic sat enlhitaoc Israel, coo enlhit ajancaoc#Mi 5.2.
—nic nat intomjac appayvam Visqui ingac.
7Yejemoc alhta apyilhacpo apvisqui Herodes apquilevamcaa co actiyapmaclha acnim. Apquilinlhanacmec alhta apquilmalhnaycam acvamlha acnim apvitamacpo siclho apyova. 8Yejemoc alhta apquilapajasa co actiyapmaclha acnim eltiyaningvomjo tingma Belén. Aptomjac alhta apvisqui Herodes apquilanya:
—Elyas maa. Eltiyaningvoclhojo maa sicaa ilhnic lhac. Apquilvitac sat ancoc sicaa, yejemoc sat eltajojo. Jeltimnasquita sat coo, yoyam opayicsojoc sat coo lha —alhta aptomjac.
9Lhama alhta apquillinga apvisqui Herodes appayvam, apquillhinga alhta eyca. Yejemoc alhta apquilvitaclho mocjam apyova apquilvitay siclhoc anco actiyapmaclha acnim. Malha aplhingam apmamyi alhta aptomjac apyova. Apyitnacmec alhta apyova tacjaplhit tingma apyitnaclha sicaa. 10Inquilpayjeclhec alhta apquilvalhoc co actiyapmaclha acnim apquilvitaclho mocjam apyova. 11Apquilantalhningvocmec alhta congne tingma. Apquilvitac alhta sicaa najan inquin María. Apquilticlhicvocmec alhta aptapnaoc apyitnaclha sicaa. Apquilpayasoc alhta sicaa. Yejemoc alhta apquiljalhyovasa asoc apquilsoyam. Apquilmesquic alhta oro asoc almamnave najan asoc masis najan yamit anic acmasis. 12Yejemoc alhta acvanmesa amyaa ayinyema Dios Ingyapam:
—Noeltajojo nasa apnaclha apvisqui Herodes —alhta intomjac acvanmescama. Apquiltajaclhec alhta apquilaoclha. Moc amay alhta apquilmiyaclha.
Mayinyajasquiscama Jesús apquitcoc yoclhilhma Egipto
13Lhama alhta apquiltajaclho enlhit co actiyapmaclha acnim. Invanmesquic alhta José lhama ángel Visqui ingac apcasinancama. Aptomjac alhta ángel apcanya José:
—Ilhaticja, iyantim sat sicaa najan inquin. Ingyinyajas yoclhilhma Egipto. Ilhnim sat maa acvocmo acnim, yoyam ongvanic mocjam lhip. Apquitamquic apvisqui Herodes, yoyam ingyajic as sicaa —alhta intomjac acvanmescama.
14Alhtaa alhta aplhaticja José. Apyantimquic alhta sicaa najan inquin. Apyasquic alhta yoclhilhma Egipto. 15Apnacmec alhta maa acvocmo acnim apquitsepma Herodes. Yoyam cotmongvomoc nelha Visqui ingac appayvam aplhanmaclha ilhnic nat profeta Dios aplingascama:
“Ayanyam coo Sictamongvoyam apna yoclhilhma Egipto (yoyam ingyilhyemoc)”#Os 11.1.
—nic nat intomjac appayvam.
Apcanem apvisqui Herodes eticyoc sicaa
16Am alhta elvoctac co actiyapmaclha acnim apnaclha apvisqui Herodes. Apquilyinimsam alhta. Aplovquic alhta apvisqui Herodes. Yejemoc alhta apquilapajasa singilpilhtetemo. Apquilanama alhta elnapoc sicaa apquiltomja apquilinava apnaycam tingma Belén najan poc tingma nipyava Belén. Apquilanama alhta elnapoc sicaa apvamlha anit años najan apsilhyavo. Acno acvamlha apquillhanma año co actiyapmaclha acnim apquilvitay siclhoc apyova. 17Invocmec alhta nelha aplhanmaclha ilhnic nat Jeremías profeta Dios aplingascama:
18Inlingalhquic acyinamam olhma tingma Ramá.
Avanjec acyipcalhomalhca najan alinlhayam.
Invinec Raquél ayinyema apticyovam ayitquic.
Am coyacmoc yoyam colhic actamilquiscaseclho avalhoc.
Ayinyemaclha apsovjacpoc alhta ayitquic#Jer 31.15.
—nic nat intomjac appayvam.
19Invocmec alhta acnim apquitsepma apvisqui Herodes. Apnec alhta mocjam José yoclhilhma Egipto. Yejemoc alhta acvanmesa José lhama ángel Visqui ingac apcasinancama. Aptomjac alhta ángel apcanya José:
20—Ilhaticja, iyantamenta mocjam sicaa najan inquin. Itajiclha sat mocjam apcaoclha Israel. Ayinyemaclha apquilitsepquic enlhitaoc, yoyam alhta elajic sicaa —alhta intomjac acvanmescama.
21Yejemoc alhta aplhaticja José. Apyantamentac alhta sicaa najan inquin. Apmiyantac alhta mocjam apcaoclha Israel. 22Aplingangvoctac alhta amyaa José aptomjayclha apvisqui yoclhilhma Judea apvisay Arquelao. Herodes apquitca alhta Arquelao apya'monquiscama apyap. Apcacac alhta José emyaclhac maa. Invanmesquic alhta mocjam José. Apcanya Dios Ingyapam eyacsic yoclhilhma Galilea. 23Lhama alhta apvoclho maa. Apnaclhec alhta tingma Nazaret.#Mr 1.24; Lc 2.39; Jn 1.45. Invocmec alhta nelha apquillhanma profetas Dios apquillingascama:
—Iltamjacpoc sat apvisay nazareno —nic nat intomjac appayvam.
Currently Selected:
SAN MATEO 2: ENHL
Highlight
Share
Copy
Want to have your highlights saved across all your devices? Sign up or sign in