EZEQUIEL 47
47
Yingmin actiyapma tingma apponquinomap
1Eyantamaclhec alhta mocjam as enlhit atong acyivey. Acvitac alhta coning atong acyivey actiyapmaclha yingmin,#Is 44.3; Jl 3.18; Zac 13.1; 14.8; Jn 7.38; Ap 22.1. ayinyem payjoc actiyapmaclha acnim napocja tingma apponquinomap. Inquinyec alhta yingmin napocja derecho acyeycajay acyitnamaclha altar apquilvatnamaclha. 2Eyantamaclhec alhta atong acyivey payjoc nilhqueyja acvaycmo atong payjoc actiyapmaclha acnim. Acvitac coo actiyapmaclha yingmin napocja tingma payjoc nipiyam atong acyivey. 3Apquilyipsatquic alhta as enlhit acvamlha acvinatem ayinyem yingmin payjoc actiyapmaclha. Vocmec alhta quinientos metros yingmin, acvocmo elhquipcoc sictoyam yingmin, siyanyomalhca omilanic. 4Apquilyipsatquic alhta mocjam quinientos metros, seyanem omilanic yingmin ayinyem. Vocmec etapnaoc sictoyam yingmin. Natamin mocjam quinientos metros acvocmo nelhit sictoyam yingmin (siclhingam), siyanyomalhca omilanic yingmin. 5Apquilyipsatquic alhta mocjam yingmin ayinyem quinientos metros, actomjayclho vatsam mongmovan ongmilanic. Congnoc alhta yingmin, acvamlha ningilmam yingmin ongmilanic as vatsam. 6Aptomjac alhta seyanya: ¿Apvita ya lhquip as asoc? — alhta aptomjac.
Eyantamaclhec alhta inquilhe vatsam. 7Acvitac coo nicja yingmin netin inquilhe alimjaclha yamtaa. 8Aptomjac alhta seyanya: Inquinyec as yingmin payjoc actiyapmaclha acnim acvaycmo alvata Jordán, acvaycmo acyitnamaclha yingmin acvisay Yingmin Apac. Intalhnec as yingmin maa, comascoc sat apac yingmin, cotniclhac sat acmasis. 9Actamila anco ayinyem as yingmin, acyinaycaoc asoc navjac, najan quilasma aleyvam as yingmin. Intimescasquic yingmin apac, cotniclhac mocjam acmasis, colyinamcoc aclhamoclhojo asoc. 10Eltingyac sat mataa quilasma enlhit apnaycam En-gadí najan En-eglaim, apquilyamascama yamyamayin apancaoc. Cotlaycaoc maa quilasma, acno quilasma aleyvam yingmin acvisay Mediterráneo. 11Coytic sat mocjam yasic yingmin yancomilh ciénagas najan pantanos, mepqui maa yingmin acmasis. Cotnejic sat maa acyitnamaclha yasic apquiltingyey enlhit. 12Anit nicja yingmin alimja yamtaa acma acyilhna, aclhamoclhojo altemaclha acyilhna. Mepqui mataa ava alyamay, inquilhnec mataa acyilhna cotningvoyam nelha. Inquilhnec acyilhna moclhama piltin, ayinyema ayictinquiscama yingmin ayinyema tingma apponquinomap. Atsic mataa ontoc acyilhna. Altamila mataa ava altomja panatem actamilquisquiyam enlhit melyimnatem — alhta aptomjac.#Ap 22.2.
Nicja yoclhilhma
13Eycaso sicpayvam sicvisay Visqui: Ingyilhpansic sat mocjam yoclhilhma#Nm 34.1-12. apquileyvomaclha israelitas, ellhovamcoc sat doce tribus apquilmolhama israelitas. (Apquilmolhama José ellhovamcoc sat doble anit nicja.) 14Siclhanma nano mepqui sicyeycajascaoc ellhovamcoc as yoclhilhma apquilyeyjamcaa quellhip. Elhnam sat quellhip, cotnejic sat apquileyvomaclha quellhip.
15Nicja yoclhilhma nilhqueyja, ayenmo yingmin acvanyam Mediterráneo acvaycmo tingma Hetlón, natamin acvaycmo tingma Zedad, 16najan tingma Berota, najan tingma Sibraim (payjoc yoclhilhma Damasco acvaycmo Hamat), najan Hazar-hatcón nicja yoclhilhma Haurán. 17Nicja yoclhilhma nilhqueyja ayenmo Mediterráneo acvaycmo Hazar-enán, payjoc nilhqueyja yoclhilhma Damasco najan Hamat.
18Nicja yoclhilhma payjoc actiyapmaclha acnim, ayenmo acyitnaclha yoclhilhma Haurán najan Damasco, acvaycmo tingma Tamar nicja yingmin acvisay Yingmin Apac, nicja vatsam Jordán, actomja nicja yoclhilhma apquileyvomaclha Galaad najan apquileyvomaclha Israel.
19Nicja yoclhilhma payjoc nipiyam, ayenmo tingma Tamar, natamin tingma apquitcoc Meriba-cades, acvaycmo vatsam acvisay Egipto, acvaycmo yingmin acvisay Mediterráneo.
20Nicja yoclhilhma actalhningvamlha acnim ayenmo yingmin Mediterráneo, ayenmo nicja yoclhilhma Egipto acvaycmo nicja yingmin payjoc Hamat.
21Incaymalhquic quellhip elilhpansic as yoclhilhma nipyesicsa doce tribus apquilmolhama israelitas. 22Acvisay apquilmayclha quellhip, najan apquilpalhcomap apquitquic. Cotnejic sat apquileyvomaclha maa, malha appaliyam siclho as yoclhilhma. Cotnejic sat actemaclha apquilpalhcomap israelitas najan apquilpalhaviyam nipyesicsa israelitas. 23Ellhovamcoc sat amyipayc metnaja israelitas as yoclhilhma apquilpalhavoycamlha apquilmolhama. Eycaso sicpayvam sicvisay Visqui apancaoc — alhta aptomjac Visqui ingac.
Currently Selected:
EZEQUIEL 47: ENHL
Highlight
Copy
Compare
Share
Want to have your highlights saved across all your devices? Sign up or sign in
