DANIEL 8

Yataay apquinavo najan nipquesic apquinavo

1Invocmec alhta tercer año aptimem apvisqui rey Belsasar. Coo sicvisay Daniel. Invitac alhta mocjam sicvanmoncama moc asoc. 2Acnec alhta coo tingma apvanyam Susa, yoclhilhma Elam, nicja vatsam Ulai. 3Alyajam alhta coo, sicvita lhama nipquesic apquinavo apyanca nicja vatsam. Anit apquipetaoc alvinatem alhta innamcoc. Ajolhec alhta lhama apquipetic actiyapma alhayi, am colhno moc. 4Apquilnapacpec alhta payjoc actalhningvamlha acnim, najan payjoc nilhqueyja, najan payjoc nipiyam. Apyimnatem apanco, am elhno apnaymacoc. Am alhta emyovacpoc mataa lhama. Inyangvocmec alhta aptemaclha apyimnatem, apquillanac mataa apquiltamjoclha ellana.

5Inquitamquic alhta evalhoc asoc acvitay sicvanmoncama. Pilapcasquic alhta sicvita yataay apquinavo apquilhyam, apquinyema actalhningvamlha acnim. Avanjec alhta apquinyem, malha apquimpay tacjalhit lhopactic alhta intomjac. Yitnec alhta lhama apquipetic naysicsa apataoc. 6Apcamquitvaac alhta apyancaclha nipquesic apquinavo acma anit apquipetaoc. Apyancac alhta nicja vatsam. Apquimpocjac alhta yataay apquinavo ingyajic nipquesic apquinavo. 7Inquilintec alhta anit apquipetaoc nipquesic mepqui apyimnatem. Apquiltajanquic alhta yataay apquinavo, apquiltacmo apyamonquilhma, mepqui lhama yoyam epasingvota najan evomsic tap.

8Inyangvocmec alhta apyimnatem yataay apquinavo. Pilapcasquic alhta ayinta apquipetic yataay. Inquilantipquic alhta cuatro apquipetaoc apcatic yataay: lhama aclhicmosa nilhqueyja, moc aclhicmosa nipiyam, moc alhta actiyapmaclha acnim, moc alhta actalhningvamlha acnim. 9Invitalhquic alhta moc apquipetic ayitcoc, actiyapma apquipetic apvajac (malha alayjem). Invoncaclhec alhta apquipetic ayitcoc, aclhicmosa nipiyam, najan actiyapmaclha acnim najan payjoc Yoclhilhma Actamila, apquileyvomaclha Dios apquilyacyescama. 10Inticlhicvocmec alhta nitno apquipetic alhnancoc, acvaycmo apquileyvomaclha enlhit netin. Intovasquic alhta apyová, yoyam epalamoc as nalhpop. Inquiltacmec alhta, eltipilcacpoc apyová.#Ap 12.4. 11Inmiyaclhec alhta netin as apquipetic alhnancoc apnaclha apvisqui enlhit netin. Inquilvatescasquic alhta maa apquilvatnamaclha asoc macmescama Dios. Intovasquic alhta maa apquilmalhnancamaclha. 12Apquilnaclhec alhta singilpilhetemo payjoc siclhoc alhta apquilvatnamaclha asoc macmescama Dios. Innec alhta actovasa Dios appayvam actomja nasoc anco. Inyiplovcasquic mataa acmayjayoclha cotvacsic asoc. Inyangvocmec alhta actimem acyimtalhnamo.

13Aclingac alhta lhama ángel appayvam apcanya poc ángel: ¿Co sat acvam comascoc mactovascama apquilvatnamaclha asoc macmescama Dios? ¿Co sat acvam comascoc mactovascama apquilmalhnancamaclha najan macnatovascama Dios apquilyacyescama? — alhta aptomjac. 14Apcatingmavoc alhta: Acvaycmo dos mil tresciento apquilvatnama mataa alhtoo najan actalhnam, moc ningiltimem acvaycmo mil cientocincuenta acnim. Natamin colhic sat ayalhnasa apquilmalhnancamaclha — alhta aptomjac.

15Coo sicvisay Daniel. Inquitamquic alhta evalhoc oyasamcojo acvitay sicvanmoncama. Pilapcasquic alhta sicvita enlhit apcanvaa sicnaclha coo. 16Aclingac coo appayvam, malha enlhit appayvam ayinyema vatsam Ulai, aptomja seyanya coo: Lhip Gabriel Dios apcasinancama, ilhicmos sat lhip as enlhit acvitay apvanmoncama — alhta aptomjac.#Lc 1.19,26.

17Eyavectac alhta najato. Intiyacmec alhta evalhoc, sicticlha etapnaoc, acticlhicvocmo nalhpop payjaclha najat. Aptomjac alhta seyanya: Lhip enlhit, invitac lhip apvanmoncama actamongvomlha nelha acnim — alhta aptomjac.

18Ayitsepquic alhta sicyimnaclhojo sicyitna nalhpop, naysicsa sepamejitquiscama. Emamquic alhta senimseclho netin.

19Aptomjac alhta seyanya: —Pac olhicmocsic lhip asoc, yoyam covac sat actamongvomlha nelha acnim aplom pac Dios. Invitac lhac lhip apvanmoncama asoc actomjaclha nelha acnim — alhta aptomjac.

20Nipquesic apquipetaoc apquilyitsomacpo apquilviscaa co Media najan co Persia. 21Yataay apquinavo apyitsomacpo apvisqui co Grecia. Yataay apquipetic naysicsa apataoc apyitsomacpo apvisqui apmamyi. 22Inquintec alhta lhama apquipetic. Inquilantipquic alhta cuatro apquipetaoc, apquilyitsomacpo cuatro apquilviscaa, lhama mataa apya'monquiscama poc. Asilhtec mataa apquilmopvan apquilviscaa, am elhno apvisqui apmamyi — alhta aptomjac.

23Cotmongvomoc sat nelha apquilanamaclha apquilviscaa. Cotmongvomoc sat nelha apquiltemaclha apquilmapsomcaa. Eya'mongsic sat poc apvisqui apyimtalhnesomap apanco.

24Etnejic sat apyimtalhnamo, jave ayinyema apmopvan apanco. Enatovacsic sat lhalhma anco, acno aclhanma apvalhoc yoyam etvacsic. Elnapoc sat poc apquilyimtalhnamo, elnapoc sat najan aplhamoclhojo Dios apquilyacyescama.

25Avanjec alhta aptemaclha apyinimquiscama. Eyimtalhnesacpoc sat apanco, ingyanic sat eticyoc aplhamoclhojo. Eyimtalhnesacpoc sat apanco napato Apvisqui Apyimtalhnamo apna netin. Ematong sat maa — alhta aptomjac.

26Invitac alhta lhip apvanmoncama actemaclha alhtoo najan actalhnam apquilvatnama asoc macmescama Dios, nasoc as amyaa. Iyilhasquis sat lhip as amyaa, nanoc sat cotmongvomoc nelha — alhta aptomjac.

27Coo sicvisay Daniel. Yiplovcoc alhta acmasca eyimpejic anit acnim. Aclhaticjac alhta mocjam. Acyiplovcasquic alhta aptemaclha apcanama apvisqui nipyesicsa enlhit. Avanjec alhta alquitamsama evalhoc asoc acvitay sicvanmoncama. Am alhta oyasingvocmoc mocjam — nic nat aptomjac Daniel.

Currently Selected:

DANIEL 8: ENHL

Highlight

Copy

Compare