DANIEL 12

Actamongvamlha nelha acnim

1Aptomjac alhta mocjam ángel: Etacpoc sat ángel apyimtalhnamo apvisay Miguel,#Jud 9; Ap 12.7. aptomja apmasma lhip apnaymacoc israelitas.

Cotnejic sat apquillingaycamco acyimtalhnama enlhitaoc. Am nic nat cotamalhcac actema nac jay nipyesicsa enlhitaoc.

Covac sat acnim, elvomsacpoc sat tap apyovoclhojo lhip apnaymacoc, acyitna inlhojo acnatalhesamalhca apquilvisay vaycajac apanco Dios.#Mt 24.21; Mr 13.19; Ap 7.14; 12.7.

2Enalhaticjangvomoc sat apquilmasquingvaycmo nano, apquilatoynamap malhic. Elmiyovacpoc sat napocja, colhic sat acyimnatem apnenyaoc cotmongvoycamlha nelha. Elyinyovacpoc sat poc, elmancangvomoc sat, ellingamcojoc sat acyimtalhnama cotmongvoycamlha nelha.#Mt 25.46; Jn 5.29.

3Colhic sat ayaco enlhit apquillhicmoscama, apquilyascasingvoyam nintemaclha acpeyvomo. Colhojoc sat apquilapongmatem malha apyová ningvita alhtaa.#Mt 13.43.

4Lhip Daniel, iyilhasquis as amyaa. Ingyapiclha sat candado as vaycajac. Copvanquejec enlhit elyipsitic acvaycmo actamongvomlha nelha acnim. Elquitmoc sat enlhitaoc lhalhma anco, yoyam elyasingvomoc najan coyangvomoc apquilyascamco — alhta aptomjac ángel.#Ap 22.10.

5Coo sicvisay Daniel. Invitac alhta sicvanmoncama apcanit enlhit, lhama apquinmam nicja vatsam, poc alhta moc nicja vatsam. 6Aptomjac alhta lhama enlhit apcanya poc, apma apava apmopoy, apquinmam tacjalhit yingmin vatsam: ¿Co sat acvam cotningvomoc sat nelha acnim? — alhta aptomjac. 7Apmiyaseclhec alhta netin apmeoc enlhit apma apava apmopoy. Aptomjac alhta aplhanma apvisay Dios memasquingvoyam, apcatingmavo: Acvaycmo tres años y medio. Comascoc siclho apquillingaycamco acyimtalhnama Dios apquilyacyescama, cotningvomoc sat nelha acnim — alhta aptomjac.#Ap 10.5.,#Dn 7.25; Ap 12.14.

8Aclingac alhta inyicje, am eyca oyasamcoc amyaa aplhanma. Actomjac coo siyanya: —Visqui, ¿co laa incotnejic natamin as asoc, actamongvomlha nelha acnim? — alhta actomjac coo. 9Apcatingmavoc alhta: Lhip Daniel, vamlha itne. Acyilhamalhca as amyaa acvaycmo actamongvamlha nelha acnim. 10Ellingamcojoc sat acyimtalhnama aplhamoclhojo enlhit. Elyanmongsic sat moc apquilvalhoc, coytic sat actamilaycam apquilvalhoc. Elyiplovcasojoc sat mocjam apquiltemaclha apancaoc enlhit apquilmapsomcaa. Am elyasamcoc mataa, yavamlha sat cotnejic. Elyasingvomoc sat acyovoclhojo amyaa apquiltomja apquilyascamco.#Ap 22.11. 11Comascoc sat apquiltemaclha macmescama Dios, acyiplomo apquilayo quilaycmasquiscama acyitsomalhca dios congne Dios tingma pac apponquinomap. Ayenmo maa, cotnejic sat mil doscientos noventa acnim.#Dn 9.27; 11.31; Mt 24.15; Mr 13.14. 12Apquilinyejemo nac enlhit apquilinlhanyacmo acvaycmo mil trescientos treinta y cinco acnim. 13Lhip Daniel, ilhing maa, ilovquis sat apyampay. Elhaticjangvomoc sat lhip actamongvamlha nelha acnim. Elhcac sat acyimnatem apnenyic ayinyema Dios Apyimtalhnamo — alhta aptomjac — nic nat aptomjac profeta.

Currently Selected:

DANIEL 12: ENHL

Highlight

Copy

Compare