AMÓS 5
5
Enlhitaoc layi
1Aptomjac alhta mocjam: Quellhip enlhitaoc Israel. Elaylhojo apquiliclhangveycam apquillhenacpo apquilitsepma quellhip.
2Apquilyitsomacpo quellhip quilvana acmatnam, ayitcoc alhta actamila anco, colhaticjangvomejec sat mocjam. Acyitnama nasa nalhpop, paj lhama enlhit comopvan etnimsic netin ayitsepma — alhta aptomjac.
3Aptomjac alhta mocjam Dios Visqui ingac: Mil enlhitaoc natingma apvanyam apquilanyacpo ellanac apquilimpocjay, elaymacpoc sat apquilvamlha cien mepqui apticyovam. Apquillanac sat ancoc apquilimpocjay cien enlhitaoc, elaymacpoc sat apquilvamlha diez mepqui apticyovam, elvotac sat mocjam — alhta aptomjac.
4Aptomjac alhta mocjam: Jeltingya sat coo, yoyam colhic acyimnatem apnenyaoc.
5Noeltingya nasa acyitnamaclha quilaycmasquiscama tingma Betel. Noeltingya nasa payjoc Gilgal.#Os 4.15; Am 4.4. Noeltingya nasa payjoc Beerseba. Elmacpoc sat apyovoclhojo co Gilgal, enatovasacpoc sat apyovoclhojo co Betel — alhta aptomjac.
6Aptomjac nic nat profeta: Eltingya sat Dios Apyimtalhnamo, yoyam colhic acyimnatem apnenyaoc. Am sat ancoc elyajaclhoc quellhip, ingyapajacsic sat talha Dios Apyimtalhnamo enatovacsic enlhitaoc Israel. Paj lhama co Betel comopvan esponsic talha.
7Quellhip layi, apnatovascama nintemaclha acpeyvomo najan nintemaclha nimpeyvescasquiclha.
8-9Dios Apyimtalhnamo nic nat apquillanay apyová Pléyadas najan apyová Orión. Aptimescasquic nic nat alhtaa cotniclha acnim. Aptimescasquic acnim cotniclha alhtaa. Aptimescasquic yingmin acvanyam, yoyam comamá as nalhpop. Aptimescasquic yoyam colhic acnatovasa apquilmopvancaa payjoc apquilyilhanmomaclha najan tingma apquilvanyam. Apvisay apanco Dios Apyimtalhnamo Visqui ingac.
10Quellhip layi. Apquiltanovquic mataa quellhip nintemaclha acpeyvomo najan nintemaclha nimpeyvescasquiclha actomja nasoc anco.
11Apnatovasquic quellhip enlhit mepqui asoc, apquilanyomap elsantimquisic trigo apactic actemaclha impuesto. Melhnamejec quellhip tingma apquiltamila. Melyinamquejec sat uva ayingmenic ayinyema ayimjaclha uva actomja quellhip apancaoc.
12Acyasamcoc coo apquiltemaclha quellhip apquilmapsomcaa, najan apquilsilhnanomap apanco quellhip cotningvoyam nelha. Apquiltovasquic mataa quellhip enlhit appeyvomo, apcanyomap eyinyoc acyanmongam. Apquiltovasquic mataa quellhip macpeyvescasquiclha enlhit mepqui asoc.
13Incaymalhquic evanma enlhit apyascamco, apvita inlhojo nintemaclha acmasom.
14Eltingya quellhip nintemaclha actamila, jave acmasom. Colhic sat acyimnatem apnenyaoc. Cotnejic sat nasoc anco apquilpayvam: Singilpasmom Dios Apyimtalhnamo - apquiltomjac quellhip.
15¡Eltanov sat nintemaclha acmasom! ¡Elyiplovcasojo nintemaclha actamila! Elpeyvescasiclha mataa amyaa cotnejic nasoc anco. Ilasicjiclhojo sat mocjam Dios Apyimtalhnamo apquilaymomap mepqui apticyovam enlhitaoc Israel — alhta aptomjac Dios Apyimtalhnamo.
16Aptomjac alhta mocjam: Colngalhcac sat natingma apquiliclhangveycam najan apquilpalhamaycam, apquillhenacpo apticyovam. Enlhit apquiltamjaycam amyip elanyacpoc sat elpasingvota apquiliclhangveycam, alpasmeyquiclha quilvanaa altemaclha anco aliclhangveycam.
17Elyapcalhic sat apnaycam ayimjaclha uva lhalhma anco, sicvactamo inlhojo yoyam oyanmongsiclha apquiltemaclha apancaoc — alhta aptomjac Dios Apyimtalhnamo.
18Enlhit layi apquiljalhanma, yoyam covac as acnim acyimtalhnama. ¿Apquilyasamco ya quellhip yavamlha cotnejic as acnim apanco Dios Visqui ingac? Elvitac sat yatescamalhma as acnim, mepqui ayitsayolhma.
19Sat cotnejic malha enlhit apyamasomap ayinyema yamacmeyva. Cotyamoc sat apvalhoc aptajanya inlhojo oso asoc navjac aclom. Malha aptalhnayclha tingma pac enlhit, metay congne acyeyva, yoyam coticlhic apyimpejic.
20Naso, yatescamalhma sat cotnejic acnim apanco Dios Visqui ingac, jave ayitsayolhma. Jalh olhma, mepqui lhama asoc ayitsasquiscama — alhta aptomjac Dios — nic nat aptomjac profeta.
21Aptomjac alhta mocjam: Actanovquic coo fiestas apancaoc, am colcac evalhoc sicvita apcanayclha quellhip.
22Actanovquic asoc selmescama coo acyanmongam melyascalhma. Actanovquic asoc selmescama coo trigo apactic. Mongvasicjiclhejec sat quellhip, sicvita inlhojo acticyovam vayqui acnamilay, selmescama coo acyanmongam melyascalhma.#Is 1.11-14.
23¡Elvatsaoc sat apquilminaycmascama apquilayo sicvisay! ¡Eyastinquic coo apquilpayvascama arpa quellhip!
24Eltingya sat mataa nintemaclha acpeyvomo najan nimpeyvescasquiclha acpeyvomo, malha ayinyem yingmin sat cotnejic cotningvoyam nelha.#1 S 15.22; Pr 21.3; Jer 7.22-23; Os 6.6; Mi 6.6-8.
25Quellhip apquilmolhama Israel. Naysicsa apquileyvam alhta yoclhilhma actamopeycaoc acvaycmo cuarenta años. ¿Apquilanyacpe ya quellhip jelmecsic asoc acticyovam najan moc asoc selmescama coo? Ayinayc coo paj. 26Naso, elsovc sat quellhip quilaycmasquiscama acyitsomalhca dios acvisay apvisqui Sicut najan apyová apvisay Quiyún, quellhip alhta apquillanay. 27Onaliclhac sat quellhip yoclhilhma actamopeycaoc, tap tingma Damasco#Hch 7.42-43. — alhta aptomjac Dios Visqui Apyimtalhnamo — nic nat aptomjac profeta.
Currently Selected:
AMÓS 5: ENHL
Highlight
Copy
Compare
Share
Want to have your highlights saved across all your devices? Sign up or sign in
