Kabikona 6
6
Namoḡa Yasi Fufunagoyo
5 #
Madiu 24:37, Nuke 17:26, 1 Fita 3:20 Yave i kitiya namoḡa matatafusi yasi fufunagoyo i nakatamoka fwayafwayai, keta iba matatafuna si nuwenuwiya keta si vivinuwadadanisiya o goyona venemokena tova kana matatafu. 6Yave tauna i vinuwakuvaniya namoḡa i fufunisiya keta i tenisiya fwayafwayai, na fasinei nuwatana i dauna. 7Eketa Yave i bwaduwa, “Namoḡa matatafusi ana nuyaunisiya fwayafwaya nofe etanei. A vinuwakuvanikuwa uḡuna naki a fufunisiya. Na fasinei namoḡa kasi matatafu keta yomuyomu nakanakasisi matatafusi be musumususi si ooyaḡayaḡaḡa fwayafwaya etanei, yota manuwa matatafusi kawasasakaoḡowai ana nuyaunisiya.” 8Atu Yave o Nowaḡa i sebobowiya.
Nowa Sifusifufuna
9-10 #
2 Fita 2:5
Nowa keta ugunina sifusifufusi nofemaise.
Nowa natunatuna nasi tonu namoḡa kasi wava Semi, Ami, keta Yafeta. Nowa o namoḡa dewadewana, tanake kana kisimokena fwayafwaya etanei eyaeyana tovasima nenesiyai. Nowa Guyau i viunaniya.
11Atu Guyau i kitiya fwayafwaya matatafuna i goyowa eketa vikamunumunuwa i kataneneḡa. 12Guyau i toneiya fwayafwaya keta i kitiya naki i goyomoka uḡuna namoḡa matatafusi ke'ta goyona nenei si fakwafakwa.
13Keta Guyau Nowa i iyaviya i bwaduwa, “A vinuwadadana be namoḡa matatafusi ana nuyaunisiya uḡuna vikamunumunuwa fwayafwaya i vimaiya. Fwayafwaya kana matatafu etanei iba matatafuna ana nuyauniya.
14Na fasinei waka kitagoyona kuna yoniya tauḡu fasiweu. Kai fakinisi nenesiyai kuna yoniya. Sisiuna kuna kitutunaonota waka sinenei. Sinena keta kwauna kuna nutamaniya kibasi nenei. 15Kuna yoniya nofemaise. Kana fwafwa kana niva 140 mita, kana nafanafa kana niva 22 mita, keta yana vivivane kana niva 14 mita. 16Kudukudu kuna teweiya keta kawasasa kana niva 50 senitimita kuna teniya kudukudu keta fita kasi kawasasai ina fanakwaniuḡa. Waka niniunei kawa kuna fufuniya. Baionota tonusi kuna yonisiya — etana, sinefouna, keta sifuna.
17Ku vaneneḡa! Ukowasobu ana teweiya keta fwayafwaya kana matatafu ina unakafufuya be iba matatafuna na yawasina fwayafwaya etanei ina nuvimatisiya. 18Atu kaku dedeni a teneteniya neneweu. Kwaḡa, kawau, keta natunatuu nakakawasi kwana kanasuna waka sinenei. 19-20Yomuyomu tunisitunisi nakakawasi kuna totoisiya nukusi. Tamokaḡa namoḡa keta tamokaḡa gumayogu, manuwa tunisitunisi nenesiyai kuna nemiisiya keta yomuyomu nakanakasisi be musumususi si ooyaḡayaḡaḡa, kuna kitavikavinisiya ebe yawayawasisi sina fakwafakwa. 21Yota kabwaga tuninatunina yagwanina kuna totoiya, uguniu nukusi fasimiyai keta yota yomuyomu fasisiyai.”
22 #
Ibeniu 11:7
Eketa Nowa iba matatafuna i saviviniya Guyau i iyaviya maise.
Currently Selected:
Kabikona 6: WAT
Highlight
Share
Copy
Want to have your highlights saved across all your devices? Sign up or sign in
© 2016 Wycliffe Bible Translators, Inc.