Yaasawey 3
3
Lakkal nda Irkoy hunburay
1Ay izʼaroo, masi dirɲa cawandoo kaŋ ni duu a ay ga,
ni binoo mʼay yaamarey dii,
2zama i ga tonton ni zaarey hinnaa ga,
nda ni aloomuroo ga, nda ni alaafiyaa ga.
3Masi borohennataray nda laadirtaray naŋ,
i haw ni jindoo ga, i hantum ni binoo walhaa ga.
4Nda woo teendi, nʼga duu alhormo nda lakkal henna
Irkoy do nda adamizey do.
5Ma ni binoo kul ka ni naanaa daŋ Abadantaa ra,
masi felle ni fahamaa ga.
6Ma Abadantaa bay ni fondawey kul ra,
nga no ma ni fondawey šerrandi.
7Masi ni boŋ dii lakkalkoyni,
hunbur Abadantaa, ni boŋ moorandi ifutu.
8Gaaham baani no ma ne,
albarka no ni birey se.
9Abadantaa beerandi nda ni kabehayey,
a beerandi nda ni hegawey kul ize jinawey.
10Nda woo teendi, ni taasu fanjidogey ga too ka mun,
ni alaneb hari moora jinawey ga too ka mun.
11Ay izʼaroo, masi wanji Abadantaa aladaboo kaŋ ni duu a a ga,
masi konna kaŋ a ga ni daŋ fondaa ra.
12Zama boraa kaŋ Abadantaa ga bagʼa, nga no a gʼa daŋ fondaa ra
sanda izʼaru kaŋ ga baaboo yadda.
Lakkal bisa alman
13Boraa kaŋ duu lakkal nda boraa kaŋ duu fahamay duu gomni.
14Zama albahaa kaŋ a ga duu a a ra baa nzorfu kaaray albahaa,
albahaa kaŋ a ga kate a bisa wuraa.
15Nga hayoo bisa hiiri caadante,
haya kul kaŋ nʼga bagʼa si toorʼa alkadar.
16Aloomur goo nga kabe gumaa ra,
alman nda beeray goo nga kabe waawaa ra.
17Nga fondawey ga boori,
nga lolawey kul manʼti kala alaafiya.
18Tuuri no kaŋ ga hunayan noo boro se kaŋ nʼa dii,
boro kaŋ gaabu a ga duu gomni.
19Lakkal nda Abadantaa na laboo gorandi,
fahamay nda a na beenaa daaru.
20Nga bayraa ka aduɲɲa guusu beerey feeri,
de duulawey ga harandaŋ loti-loti.
Irkoy ga lakkalkoyni hawgay
21Ay izʼaroo, lakkal nda miile henna dii,
i masi mooru ni moɲey cire.
22I ga ni hundoo noo hunayan,
i ga ni jindoo taalam.
23Woo ra, nʼga koy ni fondaa ra nda lakkalkanay,
de mo ni cewey si cabu haya kul ga.
24Nda nʼga kani, haya kul si ni hunburandi,
nda ni kani, ni jirboo ga kom.
25Masi hunbur haya kul
ba halaciroo kaŋ boro futawey gʼa ka ni kar,
i masi ni jitandi.
26Zama Abadantaa ga tee ni naanaa,
a ga ni cewey ganji i ma kaŋ kumsay ra.
Ma baa ni cinaa
27Boro kaŋ ga hima nda haya henna, masʼa wanji a se
nda ni goo nda nga hinoo.
28Masi nee ni cinaa se: «Koy ka kaa, suba ay gʼa noo ma ne»,
ka gar hayaa goo ma ne.
29Masi dabari futu soolu ni cinaa se,
ka gar a goo ma goro ni jere lakkalkanay ra.
30Masi yenje boro bande bila addalil,
ka gar a mana baffoo tee ma ne.
31Masi canse boro futu ga,
masi nga fondo kul zaa.
32Zama Abadantaa se almuhal ti goy šiirante teekaw,
amma nga sirrey si nondi kala boro šerrante se.
33Abadantaa dangayanoo goo boro futu hugoo ra,
amma a ga albarka daŋ boro šerrante gorodogoo ra.
34A ga ɲooɲokey ɲooɲo,
amma a ga alhormo tee borey se kaŋ ga ngi boŋ yeeti ganda.
35Lakkalkoyney ga beeray tubu,
lakkal jaŋantey ga duu haawi.
Currently Selected:
Yaasawey 3: ses
Highlight
Copy
Compare
Share
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
