Korent borey bataga 2to 3

Amaana taagaa goykey

1Ir mma šintin ka yee kʼir boŋ saabu wala? A mma too ir ma bataga hantum war se kaŋ gʼir saabu sanda takaa kaŋ boro fooyaŋ gʼa tee, wala mo ka duu bataga ka hun war do wala? 2War hunday ti batagaa kaŋ gʼir saabu, a hantumandi ir biney ra, adamizey kul gʼa bay i gʼa caw. 3A ga kaaray kaŋ war manʼti kala Almasihu batagaa kaŋ ir goyoo nʼa tee. Manʼti dawa nda a hantumandi, Irkoy hunantaa Hundoo kʼa hantum. Manʼti tondi walha ga a hantumandi, baši walhayaŋ ga a hantumandi kaŋ goo war biney ra.

4Woo kaŋ ir nʼa har, ir ga naanay ka bay kaŋ ir mana duu a kala Almasihu albarkaa ra Irkoy jine. 5Manʼti ir mma hongu kaŋ ir goo nda hini kaŋ ir duu a ir boŋ ra, ir hinoo si hun kala Irkoy do. 6Nga no kʼir noo hini ir ma tee amaana taagaa se goykaw. Amaanaa woo mana hun ašariyaa hantumoo harfu ra, Irkoy Hundoo ra a hun, zama ašariyaa hantumoo harfoo mma wiiya, Irkoy Hundoo ga hunayan noo.

7Buuyan goyoo#3.7 Ne ra «buuyan goyoo» manʼti kala ašariyaa kaŋ nondi Izirayel borey se, Fattaroo 34.29–30. žeerandi ka hantumandi tondiyaŋ ga, de annuura gʼa kuubi kʼa bere hala nongu kaŋ ra Izirayel borey si hin ka moo kanji Musa ndumoo ga, annuuraa kaŋ goo ndumoo ga se, ka gar haya bisante no. 8De Irkoy Hundoo goyoo si annuura cebe kaŋ bisa woo wala? 9Nda zukandoo goyoo goo nda darža, goyoo kaŋ ga kate šerretaray ga hanse ka bisa a darža. 10Ka sawa nda woo, ba darža bisantaa manʼti baffoo darža beeroo woo jine. 11Zama nda haya bisantaa duu darža, de woo kaŋ ga duumi si hanse ka bisa a darža wala?

12Naataa dumoo woo kaŋ goo ir se, nga se ir goo nda naanay timmante. 13De mo ir si Musa takaa tee kaŋ na sanfiti daŋ nga ndumoo ga hala Izirayel borey masi dii annuuraa benyanoo kaŋ ti haya bisante. 14Amma ngi lakkaley šendi, hala hõ, nda i ga amaana žeenaa caw sanfitoo follokaa no ma cindi moɲey ga. Sanfitoo woo si hun, amma Irkoy gʼa kaa Almasihu albarkaa ra. 15Hala hõ, waati kaŋ i ga Musa citaaboo caw, sanfiti ga guma biney ga. 16Amma waati kaŋ boro bere ir Koyoo here, sanfitoo ga hun, 17ka gar «ir Koyoo» manʼti kala Irkoy Hundoo, de mo nongu kaŋ ra ir Koyoo Hundoo goo, borcintaray goo no din. 18Ir kul, ir ndumey si guma, ir ga dii ir Koyoo annuuraa sanda diji ra#3.18 ir ga dii ir Koyoo annuuraa sanda diji ra, Grek šenni ra, almaganaa faa ti ir Koyoo annuuraa ga dii garaw ir ga sanda diji.. Ir goo ma bere ka tee nga himakasinaa darža ra kaŋ mma koy de a ga tonton ir Koyoo kaŋ ti Irkoy Hundoo albarkaa ra.

Currently Selected:

Korent borey bataga 2to 3: ses

Highlight

Copy

Compare