Rom 9
9
Uwonbɔr nin U ninfob
1N pag ibamɔn le Masiya bu, maa por tibɔkari, le n potiɛl jin siɛra Kasi a naaŋin, 2n jɔɔ npoobiin le nin nan wu kan kaa jɔɔ diɛm n sufu ni. 3N bi ban ke Uwonbɔr a mɔpoolin bin jim wee min nin Masiya n yiɛr nin tab min tɔɔl a nabumin bu, ban wee min nin bi ma piɛ libolin, 4bi ma ye Iziral yaab. Bi ma le Uwonbɔr nan ta bi kpann U bimarim; ki che bi jɔɔ U tɔɔl a pag, ki poo tipoopɔnn sei bi, ki sei bi U siim, ki wɔɔn bi baah li jiɛn U man iwonjiɛn niin, le ki siin bi limɔsiinl. 5Bi yaab le ye ti yaajam ninkpeebin, ban nyan ti yaajamin a bolin nin Masiya tɔɔl nyan niin le u ninforin nin bu, U ma ye Uwonbɔr wan jon niwann biɛn, U ma kpaan npagim man kaa jɔɔ diɛm! Ibamɔn.
6Naa wɔɔn ke Uwonbɔr a mɔsiinlin kaa gbeen ni. Nan bu-n naa ye ban nyan Iziral a bolin nin le ye Iziral yaabi. 7Ni mu kaa wɔɔn ke ban ye u yaabili yin biɛn le ye Abiraham a buwaabi. Amaa Uwonbɔr nan bei Abiraham ke, “Azig a maalim ni li na yin ye a yaabili.” 8Ni ma wɔɔn ke Abiraham a yaabili yan wee bi ma bi tininforin ni-n kaa ye Uwonbɔr a buwaabi, amaa nbuwaab ban wee Uwonbɔr nan poo tipoor ke Abiraham li maa-n bi ma ye u maalim. 9Limɔsiinl nmɔn kaah nan len man sɔ: “Jirib a nayonanbu N li jirin ki miin a poo Sɛra ŋmag kibijag le.”
10Naa ye ni yaa binba, Ribiɛka a buwaabin nan ye baa uba a buwaab le, u ma ye ti baa Azig. 11Nin ni ma biɛn ni, baah kaa la nan ma njaanbum nmɔn nin, bee nin nbuwaab nmɔn n nan tun nan ŋan bee nan birin, ni ye Uwonbɔr kaah ban ki gann nan le n sir. 12Naa ye itoon ni amaa ni ye wan yin nin le, Uwonbɔr le nan bei nbuwaab nmɔn a na ke, “Uninkpel le na yin tun ki tenn kibig.” 13A li ke naah sɔb man Uwonbɔr a gbɔŋin nin: “Jekɔb le N jiɛ amaa Esɔɔ le N nan.”
14Ti ni yin len ke nii? Uwonbɔr kaa tun nan kpaan naa? Naa ye man ni! 15Uwonbɔr nan bei Moziz ke,
“Ban wee N ban N san bi kunyunyunbaagin bi ma le N yin san,
ban wee N ban N jogirin bi ma le N yin jogir.”
16Mambu naa ye uninfosaal a bamin bee u pɔɔninba bu, amaa ni ye Uwonbɔr a nyunyunbasanl bu le. 17Uwonbɔr a gbɔŋin u nan bei ubɔr Faro ke, “N jiŋ nnaam ni niɛ nan bu le, ke N ta N pɔɔm ki ŋa a ni ki che N yinlin mɔɔn dulinya nan a gbanann biɛn.” 18Mambu Uwonbɔr san ban wee U ban Un san kunyunyunbaag nle kunyunyunbaag, ki mann pɔɔg ban a tuli pɔɔ-n a tuli.
Uwonbɔr a ŋuul nin U nyunyunbasanl
19Ni ni uba li beim ke: “Ke ni ŋa nii wee Uwonbɔr le la biɛn nin galin taa? Ŋma li fir yii Uwonbɔr kaah ban man naa?” 20Amaa ke a mu ye ŋmaa, uninfosaalaa, ki pag jiin Uwonbɔr aa? “Niwann nan wee a naan nan li fir bei fin wan naan nin ke, ‘Ba ŋa wee a naanim man naa?’ ” 21Uyɔgmaar kaa jɔɔ npɔɔn nin un ta liyɔgkonl liba ki maa kuchiig daal a bool ki jin ta liyɔgkonl nmɔn ki maa libool lan wee bi jɔɔ tun itoon idaa biɛn naa?
22Ke ni ye Uwonbɔr gann ki wɔɔn U ŋuufiiŋ, ki che U pɔɔm nyan npaan ni, wee ki jɔɔ limɔril nin tiwann tan fiin U ŋuul wee ki bi kpaan nin Un bii ti-n naa? 23Ke ni ye U ŋa man ki ban bin biɛ U pag takpeŋ kan wee U ta ŋa bi ni-n, ban wee U nan chinn ŋa bi sili ki guun kupag nmɔn nin, 24hali tim, ban wee U yin nin mu, naa ye ban nyan Juu yaab a bolin nin a binba, amaa ban nyan ban kaa ye Juu yaab a bolin nin mu? 25A li ke waah len man Hozaya a gbɔŋin nin:
“N li yin ban kaa ye n ninfobin ke, ‘n ninfob;’
le ki yin maah kaa jiɛ libol lan nin ‘Maah jiɛ libol lan,”
26Le, “Ni li ŋa ke kitiŋ kan a ninfob wee N nan ke,
‘Naa ye N ninfobin,’
bi li yin bi ke, Uwonbɔr wan fo-n a buwaab,’
27Azaya nan mɔr Iziral yaab bu le:
“Nin Iziral yaab kaah le yab ke limɔgil a tanbiidil nmɔn biɛn ni,
bi ni wama nan le nan yin ŋmar.
28Nan bu-n Uyudaan li dar
dulinya nan yaab a tul ki diɛ weem.”
29Ni nann ke Azaya kaah pii nan len ke:
“Naa ye ipɔɔn biɛn daan Uyudaan
kaah nan guur U yaabili yin ke,
ti bi yin be le ke Sodom,
Ti bi yin be le ke Gomoriya n.”
Iziral yaab tɔɔl kpaan tibɔŋann nin na
30Ti yin len ke nii? Ti yin len le ke ban kaa ye Juu yaab, wee kaa nan nɔɔ nbuchin binben, bi nin kan nbuchin binben nin na, nbuchin binben man nyan yada kan wee bi jɔɔ-n. 31Amaa Iziral yaab, ban nɔɔ nsiimin a buchin binbem bu-n, kaa kan mi. 32Ba ŋa wee baa kan naa? Nan bu-n baa nan nɔɔ ke bi yada le yin che bin kan ni, amaa bi nan ŋaan le ke bi toon yin li yin che bin kan nin. Le ki gbiɛr “litangbagil gbiɛrikaal.” 33A li ke naah sɔb man Uwonbɔr a gbɔŋin nin:
“Lig, N ta litangbagil le bil Zayɔnn lan li che bininfob ngbiɛr
litangbagil takpenl lan li che bininfob nlu,
le wan gaa U ki jin ke waa li nyi ki ji ifa.”
Komba New Testament © Bible Society of Ghana, 2014.