Litoonl 11

Piita kaah tan wɔɔn Jerusalam a wonjiɛm a laguŋ man

1Iyaayoo Yisa a tooi nin biwonjiɛm ban be Judiya a tingbɔŋin biɛn gbir ke ban kaa ye Juu yaab n mu gaa Uwonbɔr a bɔrin na. 2Ni bu Piita kaah nan jon Jerusalam nan, le ban tiɛr ke lipunl a jiim kpaa ki sei biwonjiɛm biɛn ni, nan pag bii u, 3ki bei u ke, “A kɔɔ ban kaa jii bi pun a niin le, ki ji lagin jin nin bi.”

4Le Piita piin ki pag wɔɔn bi a li ke naah tun man nin: 5“N nan be Jopa a tiŋin le ki miɛ Uwonbɔr, le ki kan zii, le n kan niwann niba nyan papaab. Ni nan nann likinkenl le, ki peen, ki jɔɔ imɔgban ina ki jiirin ki nan sir n ban. 6Le n lig ki kan tiwankor tan jɔɔ itaa ina, nin ipiɛl, nin tiwanfuul wann nin nnɔɔm man laan paab. 7Le n gbir likukɔl len ke, ‘Piita fiiu, ki ku ki ŋman.’

8Le n ke, ‘Ibamɔn buu Uyudaan! Maa la nyi jin niwann nan kaa be kasi bee niwann nan kaa ŋan ni.’

9Le likukɔl ji mann nyan paab ki len ke, ‘Laa yin nan wee Uwonbɔr ŋa ni kasi, ke naa ŋan ni.’ 10Ni nan ŋa man le ki tan kpaa nfimitaa, le ki ji jir don paab.

11“Libol nmɔn le baah nan tun bijab bita ban n ban nin, nan sir maah be iniin yan yaan nin. Bi nan nyan Sizariya a tiŋin le. 12Le Kinaaŋ beim ke n nɔɔ bi ki laa yii. Le biwonjiɛm ban be Jopa a tiŋin nin, bi biloob mu nan chiɛnim le ti jon Sizariya, le ti biɛn foo ki kɔɔ Kɔnelu a niin. 13Le u bei ti malaka kaah foon u niin man ki nan bei u ke un tun uba Jopa, wee un tan yin uja wan wee bi yi u ke Simɔnn, wee u yinl liba ji ye Piita nan. 14U li pag tibɔr ki seiŋ wee fin nin a niin yaab biɛn n kan feeja.

15“Maah piin tibɔr nan a pagim n-yonn man nin, le Kasi a Naaŋ jiirin bi bu, ke waah pii nan jiirin ti bu npiinimin man nin. 16Le n tiɛr Uyudaan kaah nan len man nin, ‘Jɔnn nan fun ni Uwonbɔr a nyunful le, amaa nim ma yin gbee nin Kasi a Naaŋ le.’ 17Ke, ni ye Uwonbɔr sin pu bi ke waah pu tim ban ŋa Uyudaan Masiya yada-n ke, n mu ye ŋma wee ki ke n yii wee Uwonbɔr kaah len man n laa tun naa?”

18Baah nan gbir man n-yonn man nin, le bi jiɛn tifur, le ki don Uwonbɔr a yinl, ki len ke, “Uwonbɔr che ban kaa ye Juu yaabin kpenn bi binbema, ke bi mu n kan limiɛfol.”

Antiɛg a wonjiɛm a laguŋ

19Yisa a bɔɔnɔɔb ban nan kan limugil Sitifin a kum a yonn nin, bi nan worin le ki jon ntim man fɔg, ki tan kpaa Fonisiya, nin Saipuru, nin Antiɛg ki jɔɔ Yisa a bɔr ki mɔɔn tenn Juu yaab a binba. 20Le Yisa a bɔɔnɔɔb biba nyan Saipuru, nin Sarene ki jon Antiɛg, ki tan be mɔɔn ti Uyudaan Yisa a bɔŋann nin ki tenn ban kaa ye Juu yaabin. 21Le Uyudaan a pɔɔm be nin bi, le bininfob takpem ŋa yada ki kpenn bi binbem ki sei Uyudaan.

22Biwonjiɛm a laguŋ kan be Jerusalam nan gbir tibɔr nmɔn le ki tun Banabasi jon Antiɛg a tiŋin. 23Waah nan tan foo niin ki kan Uwonbɔr kaah sei bi literil man nin, le ni mɔŋ u, le u kɔɔn bi biɛn lipoobil, ki bei bi ke bi li nɔɔ Uyudaan nin bi sufu biɛn nin ibamɔn. 24Banabasi nan ye uninfoŋan le, ki gbee nin Kasi a Naaŋ nin yada, le ki nan ta-n bininfob takpem ki sei Uyudaan.

25Le Banabasi jon Tarsusi a tiŋin, ke un tan ban Sɔɔl, 26waah nan tan kan win, le u ta u jirin Antiɛg. Libinmunl le Banabasi nin Sɔɔl nan be nin biwonjiɛm a laguŋ ki wɔɔn bininfob takpem. Bi bɔɔnɔɔb nmɔn le nan ye chinchinn a wonjiɛm Antiɛg a tiŋin.

27Iyaayoo nmɔn le bilinlem biba nyan Jerusalam, ki dan Antiɛg a tiŋin. 28Bi ni uba a yinl le nan ye Agabu. Le Kinaaŋ nan che u len ke nkom takpem li lu Rom yaab a tingbɔŋin. (Le nkom nmɔn sin nan lu n-yonn man wee Kuladiyasi nan ye uyudaan nin). 29Le Yisa a bɔɔnɔɔbin lol ke bin ter biwonjiɛn tab ban be Judiya a tiŋin uninfo biɛn kaah li fir man a tarig. 30Le bi sin nan ŋa man, ki ta bi teril nmɔn tun Banabasi nin Sɔɔl, ke bin ta tan sei biwonjiɛn sanliib n na.

Currently Selected:

Litoonl 11: KUGL

Highlight

Copy