रोमी 6
6
पापपाखें मृत्यु व ख्रीष्टपाखें जीवन
1थथे खः धयागु जूसा आः झीसं छु धायेगु लय्? परमेश्वरं झीत दया माया अप्वः यायेमा धकाः छु झीसं पाप याना हे च्वनेगु ला? 2अथे मखु। पापयागु निंतिं झीपिं सीधुंकाः हानं पापय् तुं गथे म्वानाच्वनेगु? 3झी फुक्कसिनं ख्रीष्ट येशूयागु नामं बप्तिस्मा कयागुलिं झीसं बप्तिस्मा कयाबलय् झीपिं नं वय्कः थें तुं सी धुंकल धकाः छिमिसं मस्यू ला? 4थुकथं झीसं बप्तिस्मा कयाबलय् झीपिं नं वय्कः थें तुं सी धुंकूगुलिं वय्कः नाप झीत नं थुने धुंकल। थथे सीधुंकाः ख्रीष्टयात परमेश्वर बाःयागु अजू चाइपुगु शक्तिं म्वाकादीगुलिं झीपिं नं न्हूगु जीवनया पहलं म्वानाच्वनेमा।#कल २:१२
5वय्कः सी थें झीपिं नं सी धुंकल धयागु खःसा वय्कः सीम्हं म्वाना वः थें झीपिं नं सीसां म्वाना वइतिनि। 6झीगु पापी जीवन नाश जुयावनेमा धकाः झीगु पुलांगु जीवन वय्कःलिसें क्रूसय् यख्खाना बी धुन धकाः झीसं स्यू। अय्जूगुलिं आः झीसं पापी ज्याखँ याना जुइ जि हे मज्यू। 7सी धुंकूम्ह मनू पापं मुक्त जूगु दु। 8थुकथं ख्रीष्टलिसे झीपिं सी धुंकल धाःसा वय्कःनापं च्वने दइगु विश्वास झीके दु। 9सिनाः हानं म्वानादी धुंकूम्ह ख्रीष्ट गुबलें हे सी मखुत धकाः झीसं स्यू। मृत्युं वय्कःयात गुबलें हे नं बुके फइ मखुत। 10फुक्कसिगु पापयागु निंतिं वय्कः छक्कलं सिनादिल। आः धाःसा वय्कः परमेश्वरया लागि हे म्वानादी। 11थथे जूगुलिं छिपिं नं पापयागु निंतिं सिनाः ख्रीष्ट येशूं यानाः परमेश्वरया लागि म्वाय् दत धकाः लुमंका च्वँ।
12अय्जूगुलिं छिमिसं सी मानिगु शरीरयागु निंतिं पापी ज्या याना जुइ मते। छिमिसं शरीरयात यःथें याना जुइ मजिल। 13शरीरय् च्वंगु छुनं म्हब्वयात छिमिसं पापी ज्या यायेगु ज्याभः याये मते। सिनाः हानं म्वाके धुंकूपिं मनूत जूगुलिं छिपिं थथःम्ह हे परमेश्वरं धाःथें मानय् जुयाच्वनेमाः। अले छिमिगु शरीरया म्हब्वत भिंगु ज्याखँ यायेगु ज्याभःकथं परमेश्वरयात देछाया ब्यु। 14पापयागु अधीनय् छिपिं च्वनेमाली मखुत, छाय्धाःसा छिपिं व्यवस्थाया अधीनय् च्वनेमाःगु मन्त, बरु परमेश्वरयागु दया मायां म्वानाच्वंपिं खः।
15थथे खः धयागु जूसा आः छु यायेगु लय्? झीत परमेश्वरं दया माया यानादीगुलिं झीपिं व्यवस्थां धाःथें च्वनेम्वाः धकाः झीसं पाप यानाजुइगु ला? अहं, थथे ला ख हे मखु। 16दासतय्सं मालिकयात मानय् याःथें छिमिसं सुयात मानय् यात छिपिं वया हे दास जुइ, नरकय् यंकीगु पापयात मानय् याःगु छाये मजुइमा, अथवा परमेश्वरया न्ह्यःने धर्मी ठहरय् जुइत मानय् याःगु छाये मजुइमा, छुं पाइ मखु। 17छिमिसं दुनुगलंनिसें छिमित स्यना थकूगु तःधंगु खँयात मानय् याःगुलिं न्हापा थें छिपिं आः पापया दास मखुत। उकिं परमेश्वरयागु जय जुइमा। 18छिमित पापयागु पन्जां त्वःतका बी धुंकूगुलिं छिपिं परमेश्वरया दास जुल।
19छिमिसं बांलाक थुइके थाकुइ धकाः जिं मनूतय्सं थें धयाच्वनागु खः। न्हापा छकः छिमिसं पापी ज्याखँ जक यायेगुलिं अप्वः मन तया जुइ धुंकू थें आः भिंगु ज्याखँय् अप्वः मन तया जु। आः पवित्र जुइत छिमिगु जीवन परमेश्वरया निंतिं लःल्हानाब्यु।
20छिपिं पापयागु दास जुयाच्वंबलय् धार्मिकतापाखें स्वतन्त्र खः। 21न्हापा लज्या चायापुगु ज्या जक याना जुयाबलय् छिमित छु इनाम दत? थथे लज्या चायेमाःगु ज्याखँ यानाजुइपिं मनूत लिपा नरकय् वनी। 22आः धाःसा छिमित पापं त्वःतका बी धुंकूगुलिं छिपिं परमेश्वरया दास जुल। थथे छिमिसं वय्कःयात यःथें जक याःगु पलेसाय् छिमित अनन्त जीवन दइ। 23पापया ज्याला मृत्यु खः। परमेश्वरं सितिकं बियादीगु वरदान झी प्रभु येशू ख्रीष्टयाके अनन्त जीवन खः।
Currently Selected:
रोमी 6: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
