रोमी 15
15
मेपिन्त यायेमाःगु वास्ता
1थथे झी बल्लाःपिन्सं बमलाःपिन्त विश्वासी जुयाः म्वानाच्वनेत ग्वाहालि यायेमाः, झीत जक यःथें याना जुइ मज्यू। 2झी फुक्कसिनं थः जःलाखःलापिन्त भिं जुइगु मतिइ तयेमाः, अले जक इमिगु विश्वास बल्लानावइ। 3मुक्ति बीम्ह ख्रीष्टं नं थःत यःथें याना मजूगु खँ धर्मशास्त्रय् थुकथं च्वयातःगु दु – “छितः क्वह्यंकिपिन्सं जितः नं क्वह्यंकाहःगु दु।”#भज ६९:९ 4न्हापा न्हापा जूगु च्वयातःगु फुक्क खँ झीत स्यनेत खः। धर्मशास्त्रय् च्वयातःगुपाखें ग्वाहालि कयाः सह यानाच्वन धाःसा झीत आशा दइ।
5सह याये फय्कादीम्ह अले ग्वाहालि बियादीम्ह परमेश्वरं छिपिं सकसिनं छप्पँ जुयाः येशू ख्रीष्टयागु लँपुइ वने फय्कादीमा। 6थथे छिपिं फुक्कं छप्पँ जुयाः छगू हे सलं झी प्रभु येशू ख्रीष्टया बाः परमेश्वरयात जयजय याये फयेमा।
7परमेश्वरयात जयजय यायेमा धकाः ख्रीष्टं छिमित नालादी थें तुं छिमिसं नं बल्लाःपिं व बमलाःपिं दाजुकिजापिन्त नाला कायेगु या। 8जिं छिमित धाये – परमेश्वर भरोसा याये बहःम्ह खः धकाः सीके बीत ख्रीष्ट हे यहूदीतय् च्यः थें जुयादिल। इमि तापाःबाज्यापिन्त बचं बियादीगुलिं 9यहूदीमखुपिन्सं नं परमेश्वरं दया माया यानादीगुलिं वय्कःयात जयजय यायेमा धकाः ख्रीष्ट झायादीगु खः। धर्मशास्त्रय् नं थथे च्वयातःगु दु –
“यहूदीमखुपिं दुथाय् नं
जिं छितः जयजय याये
छिगु नां कयाः भजन हाले।”#२ शमू २२:५०; भज १८:४९
10धर्मशास्त्रय् नं थथे च्वयातःगु दु –
“हे जातित!
वय्कःया मनूत नाप
लय्ताया च्वँ।”#व्य ३२:४३
11हानं थथे च्वयातःगु दु –
फुक्क यहूदीमखुपिन्सं नं
प्रभुयात जयजय या।
फुक्क जात जातियापिन्सं नं
म्ये हालाः
वय्कःया प्रशंसा या!#भज ११७:१
12अले यशैयां नं थथे धाःगु दु –
“यिशैया सन्तान दइ,
वं यहूदीमखुपिन्त राज्य याइ।
अले इमिसं वय्कःयाके हे आशा तइ।”#यशै ११:१०
13छिमिसं विश्वास याःगुलिं भरोसा याये बहःम्ह परमेश्वरं छिमिगु नुगलय् आनन्द व शान्ति जाय्कादीमा। थुकथं पवित्र आत्मायागु शक्तिं छिमिगु आशा व भरोसा अप्वः दयावनेमा।
यहूदीमखुपिन्थाय् पावलं याःगु ज्या
14यःपिं दाजुकिजापिं, छिपिं तसकं भिंपिं अले बुद्धिं जाःपिं जूगुलिं छम्हं मेम्हय्सित स्यनेकने याये फुगुलिं जि लुधं। 15परमेश्वरं जितः दया माया यानाः अधिकार बियादीगुलिं छिमित हानं छुं मू खँ लुमंकाबीत मग्यासे थथे च्वयाच्वना। 16जितः यहूदीमखुपिन्त परमेश्वरयागु भिंगु खँ कनेत ख्रीष्ट येशूयाम्ह च्यः यानादीगुलिं पुजाहारीं छाःथें जिं नं परमेश्वरयात यःगु पवित्र आत्मां शुद्ध यानातःपिं यहूदीमखुपिन्त छाये हयागु दु। 17थथे येशू ख्रीष्टलिसे परमेश्वरया ज्या याये दुगुलिं जिगु छ्यं धस्वाः। 18ख्रीष्टं जिगुपाखें यहूदीमखुपिन्त परमेश्वरयात मानय् याकेत यानादीगु वचन व ज्याखँ बाहेक मेगु खँ ल्हायेगु आँट जिं मयाना। 19जिं अजू चायापुगु चिं व ज्या नं याना, पवित्र आत्मायागु शक्तिं यरूशलेमंनिसें इल्लुरिकन तक फुक्कभनं ख्रीष्टयागु भिंगु खँ न्यंकागु दु।
20ख्रीष्टयागु नां मस्यूपिन्थाय् वनाः ख्रीष्टयागु भिंगु खँ न्यंकेगु जिगु इच्छा खः। मेपिन्सं जग स्वना तये धुंकूथाय् वनाः छेँ दनेथें मेपिन्सं न्यंका तये धुंकूथाय् वनाः हानं न्यंके मास्ति मवः। 21थथे च्वयातःगु नं दु –
“वय्कःयागु खँ गुबलें हे मन्यनिपिन्सं
वय्कःयात खनी।
वय्कःयागु खँ गुबलें हे मताःनिपिन्सं
वय्कःयागु खँ थुइकी।”#यशै ५२:१५
पावलया रोमय् वनेगु ग्वसाः
22थथे जुयाच्वंगुलिं तःकः मछि जि छिमिथाय् वये मास्ति वःसां वये मफुगु खः।#रोम १:१३ 23आः थन फुक्कभनं ज्या याये धुंगूलिं, अले यक्व दँ न्ह्यवंनिसें जि छिमिथाय् वये मास्ति वय्का च्वनागुलिं 24स्पेनय् वनेत वयेबलय् लँपु लाकाः छिमित नापलाः वये। छन्हु निन्हु जि छिमिथाय् हे च्वनेगु इच्छा दु, नापं स्पेनय् वनेत जितः छिमिसं छुं भचा ग्वाहालि बी धकाः जिं आशा यानागु दु।
25आः धाःसा जि यरूशलेमय् विश्वासीतय्त ग्वाहालि यायेत वनेत्यना। 26यरूशलेमय् च्वंपिं चीमिपिं विश्वासीतय्त ग्वाहालि बीत माकेडोनियाय् व अखैयाय् च्वंपिं मण्डलीयापिन्सं लय्तातां भेटी बिल।#१ कोर १६:१-४ 27इमिसं धाये म्वाय्क थःपिन्सं हे भेटी ब्यूगु खः। इमिसं थथे ग्वाहालि याये हे माः, छाय्धाःसा यहूदीतय्पाखें हे यहूदीमखुपिन्सं परमेश्वरया आशिष काये खंगु खः। अथे हे यहूदीमखुपिन्सं नं माल कि यहूदीतय्त ग्वाहालि यायेमाः।#१ कोर ९:११ 28थ्व ज्या सिधय्काः जिं कयाः हयागु भेटी लःल्हाना बीधुंकाः छिमित नाप लानाः जि स्पेनय् वने। 29जि छिमिथाय् वयेबलय् ख्रीष्टं बियादीगु यक्व आशिष नं ज्वनाः वये दइ धकाः जिं स्यू।
30यःपिं दाजुकिजापिं, झी प्रभु येशू ख्रीष्टया नामं व पवित्र आत्मां बियादीगु मायां जिगु निंतिं जिलिसें मदिक्क परमेश्वरयात प्रार्थना यानाब्यु धकाः बिन्ति यानाच्वना। 31यहूदियाय् च्वंपिं विश्वास मयाःपिं मनूतय्पाखें जि बचय् जुइमा धकाः व यरूशलेमय् जिगु सेवा अन च्वंपिं विश्वासीतय्त ययेमा धकाः परमेश्वरयात प्रार्थना या। 32अले परमेश्वरयागु इच्छा दुसा जि लय्लय्तातां छिमिथाय् वये, अले छिपिंनाप आनन्दं च्वने।
33शान्ति बियादीम्ह परमेश्वर छिपिंनाप दयेमा। आमेन।
Currently Selected:
रोमी 15: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
