रोमी 10
10
1यःपिं दाजुकिजापिं, यहूदीत नं बचय् जुइमा धयागु जिगु इच्छा दुगुलिं परमेश्वरं इमित बचय् यानादीमा धकाः प्रार्थना यानाच्वनागु खः। 2परमेश्वरयागु निंतिं इमिके जोश दु जिं थुकिया साक्षी बी। अय्नं इमिसं बांलाक थुइका सय्कातःगु मदु। 3परमेश्वरयागु धार्मिकतायात थुइके सीके मफुगुलिं इमिसं थःपिनिगु हे धार्मिकतायात दय्केत स्वल। अय्जूगुलिं इपिं परमेश्वरयागु धार्मिकताया अधीनय् मच्वं। 4ख्रीष्टं हे व्यवस्था पूवंका दीगुलिं वय्कःयात हे विश्वास यानाः मनूत धर्मी जुइ।
सकसितं दइगु उद्धार
5मोशां थथे च्वया थकूगु दु – “व्यवस्था मानय् यानाः धर्मी जुइत स्वइम्ह मनू व्यवस्थां हे म्वाइ।”#लेवी १८:५ 6ख्रीष्टयात विश्वास याना हे जक मनूत परमेश्वरया न्ह्यःने धर्मी ठहरय् जुइ। अय्जूगुलिं विश्वासं धर्मी ठहरय् जूपिं छिमिसं थथे मतिइ तये मते – “ख्रीष्टयात क्वत हयेत स्वर्गय् सु वनी?” 7हानं “सीम्ह ख्रीष्टयात म्वाका हयेत पातालय् सु क्वहां वनी?” धकाः नं मतिइ तये मते। 8परमेश्वरयागु वचन छिमिगु न्ह्यःने हे दु, छिमिगु म्हुतुइ व नुगलय् दु। जिमिसं न्यंकागु भिंगु खँ हे थ्व विश्वासयागु खः।#व्य ३०:१२-१४ 9येशू हे प्रभु खः धकाः छिमिगु म्हुतुं धाल धाःसा व सीम्ह येशूयात परमेश्वरं म्वाकादीगु खः धकाः विश्वास याःसा छिमिगु उद्धार जुइ। 10मनूतय्सं नुगलंनिसें विश्वास याःसा धर्मी जुइ, अले म्हुतुं स्वीकार याःसा उद्धार जुइ। 11वय्कःयात विश्वास याइपिं सुनानं लज्या चाय् माली मखु धकाः न्हापां हे धर्मशास्त्रय् च्वयातःगु दु।#यशै २८:१६ 12वय्कःयात विश्वास याइपिन्त यहूदीत व यहूदीमखुपिं धकाः पाकी मखु, छाय्धाःसा वय्कः सकसियां प्रभु खः। अले थ्व हे प्रभुं वय्कःयागु नां काक्वसित यक्व आशिष बियादी। 13थुकथं प्रभुयागु नां काइपिं सकसिगु उद्धार जुइ।#योए २:३२
14अय्सा वय्कःयात विश्वास या हे मयाःपिन्सं गथे यानाः वय्कःयागु नां काये फइ? अले वय्कःयागु खँ गुबलें हे मन्यंपिन्सं गथे यानाः विश्वास याये फइ? सुनानं मधाय्कं इमिसं गथे यानाः न्यनी? 15मछ्वय्कं गथे यानाः मनूतय्सं न्यंकः वनी? यशैयायागु सफुलिइ थथे च्वयातःगु दु –
“भिंगु खँ न्यंक वःपिं मनूत
वयाच्वंगु गुलि बांलाः।”#यशै ५२:७
16अय्नं यहूदीत फुक्कसिनं भिंगु खँय् न्हाय्पं मब्यूनि। थ्व हे खँ यशैयां नं च्वया थकल – “प्रभु, जिमिसं न्यंकागु खँय् सुनां विश्वास याःगु दु?”#यशै ५३:१ 17अथे जूगुलिं विश्वास न्यनाः दइ, अले न्यनेगु खँ ख्रीष्टयागु वचनं वइ। 18अय्नं जिं न्ह्यसः याये – छु इमित त्वहः तयेगु लँ दु ला? छु इमिसं गुबलें हे मन्यंनि ला?
“धात्थें धायेगु खःसा
इमिगु सुचं संसार न्यंक
न्यनाच्वंगु दु।
अले संसारया कुंकुलामय् थ्यंक
ताये दयाच्वंगु दु।”#भज १९:४
19जिं हानं धाये – अय्सा छु इस्राएलीतय्सं थ्व खँ थुइके मफुत ला? थु ला थू, अय्नं वास्ता मयाः, छाय्धाःसा दकलय् न्हापां मोशां थथे धया थकल –
“जिं नं थः मखुपिं मनूतपाखें
इमिगु नुगः मुइके,
छगू मूर्ख जातियापाखें
इमित तं चाय्के।”#व्य ३२:२१
20यशैयां अज्ज मग्यासे धाल –
“जितः माला मस्वःपिन्सं
जितः लुइकल।
जितः न्यनेकने मयाःपिन्त
जिं हे जि सु खः धकाः
क्यनाबिया।”#यशै ६५:१
21इस्राएलीतय्त धाःसा परमेश्वरं थथे धाःगु दु –
“धयागु खँ मानय् मजुइपिं
व मखुगु जक यानाजुइपिं
अतेरि मनूतय्त न्हिच्छि जिं ल्हाः
ब्वय्काच्वनागु दु।”#यशै ६५:२
Currently Selected:
रोमी 10: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
