हितोपदेश 2
2
बुद्धिं यानाः मभिंपाखें बचय् जुइ
1हे जिकाय्!
छं जिगु वचन न्यन
अले जिगु उजं नुगलय्
तल धाःसा,
2बुद्धियागु खँय् ध्यान बिल धाःसा
अले छंगु नुगः दुग्यांपाखे बिल धाःसा,
3ज्ञानयागु खँ फ्वन धाःसा,
अले दुग्यांया निंतिं
इनाप यात धाःसा
4छं उकियात वहः माले थें
व सुचुकातःगु धन माले थें
माल धाःसा
5छं परमप्रभुयागु भय
छु खः धकाः सी,
अले परमेश्वरया ज्ञान लाइ।
6छाय्धाःसा परमप्रभुं हे बुद्धि बियादी।
अले वय्कःया म्हुतुं ज्ञान व
दुग्यांया खँ पिहां वइ।
7इमान्दार व वय्कःयागु खँ
न्यनीपिन्त
वय्कलं ग्वाहालि
व रक्षा यानादी।
8वय्कलं न्यायया लँपुयात
रक्षा यानादी,
अले थःत विश्वास याइपिनिगु
लँ बिचाः यानादी।
9अले छं छु ज्यू, छु मज्यू,
छु भिं, छु मभिं, छु न्याय,
छु अन्याय धकाः सी।
10छंके बुद्धि जायावइ,
ज्ञानं छन्त आनन्द बी।
11छंगु दुग्यां व थुइकेगुलिं
छन्त रक्षा याइ।
12-15थुकिं छन्त
मभिंगु ज्याखँ यानाजुइपिंपाखें
तापाक तइ।
अले भिंगु लँ त्वःताः
मभिंगु खिउँगु लँय् जुयाच्वंपिं,
मखुगु व दुष्ट ज्याय्
लय्तायाजुइपिं,
विश्वास याये बहःमजूपिं
फताहातय्पाखें बचय् याइ।
16बुद्धिं छन्त व्यभिचारी
मिसातय्पाखें व इमिगु
पिचुगु खं बचय् याइ।
17अज्याःपिं मिसातय्सं
थः ल्याय्म्हबलय्या भाःतयात त्वःती,
अले परमेश्वरया न्ह्यःने यानागु
बाचा नं ल्वःमंकी।
18इमिगु छेँय् वनेगु हे
मृत्युया म्हुतुइ दुहां वनेगु खः।
इमिगु लँय् वंपिं सीपिनिगु देशय् थ्यनी।
19इमिथाय् वनीपिं सुं नं
लिहां वये फइ मखु।
अले जीवनया लँ नं
लुइके फइ मखु।
20उकिं भिंपिं मनूतलिसे जु,
अले धर्मीपिं मनूतय्गु लँय् जु।
21छाय्धाःसा धर्मीपिं देशय् च्वने खनी,
अले द्वंमदुपिं अन दयाच्वनी।
22परमेश्वरं दुष्टतय्त
थनं पितिनाछ्वइ
अले पापीतय्त
घाँय् लये थें लयाछ्वइ।
© 2024 Nepal Bible Society, Newa Christian
Literature Center and Wycliffe Bible Translators, Inc.