गन्ती 8
8
त्वाःदेवा च्याकेगु खँ
1परमप्रभुं मोशायात धयादिल,#प्रस २५:३१-४०; ३७:१७-२४ 2“हारूनयात धा, ‘छं न्हय्प्वाः मत तइबलय् त्वाःदेवाया न्ह्यःनेपाखे जः खइकथं ति।’” 3हारूनं अथे हे यात। परमप्रभुं मोशायात उजं बियादीगु थें त्वाःदेवाया न्ह्यःने जः खइकथं पाल्चा तल। 4परमप्रभुं मोशायात क्यनादीगु त्वाःदेवा थें हे च्वंक बांलुइक च्वंनिसें क्वथ्यंक मुगलं दायातःगु लुँयागु त्वाःदेवा दय्कातःगु खः।
लेवीतय्त विधिकथं शुद्ध यानाः परमप्रभुयात अर्पण याःगु
5परमप्रभुं मोशायात धयादिल, 6“इस्राएलीत मध्ये लेवीतय्त कयाः विधिकथं शुद्ध या। 7इमित शुद्ध यायेत छं थथे या – इमित च्वख याइगु लखं छ्वाकि, अले इमिसं थःपिनिगु म्हय् च्वंगु सँ खानाः थथःगु वसः हियाः थःपिन्त विधिकथं शुद्ध यायेमाः।#गन्ती १९:१-२२ 8अले इमिसं छम्ह द्वहंचा व चिकं ल्वाकछ्यानातःगु भिंगु छुचुंया अन्नबलि हयेमाः। अले छं पापबलिया निंतिं मेम्ह छम्ह द्वहंचा हजि। 9छं लेवीतय्त नापलायेगु पालया न्ह्यःने हजि, अले इस्राएलया फुक्क खलःयात अन मुंकि। 10छं लेवीतय्त परमप्रभुया न्ह्यःने हजि। अले इस्राएलीतय्सं थथःगु ल्हाः लेवीतय्गु म्हय् तयेमाः। 11परमप्रभुया ज्या यायेत लेवीत तयार जुइमाः धकाः हारूनं लेवीतय्त इस्राएलीतपाखें संकाबीगु बलिकथं परमप्रभुया न्ह्यःने छायेमाः।
12“अले लेवीतय्सं द्वहंतय्गु छेनय् थथःगु ल्हाः तयेमाः, अले लेवीतय्गु निंतिं प्रायश्चित यायेत छम्ह द्वहंचायात पापबलिकथं व निम्हय्सित होमबलिकथं छं परमप्रभुयात बलि छायेमाः। 13छं लेवीतय्त हारून व वया काय्पिनिगु न्ह्यःने थनाः परमप्रभुयात संकाबीगु बलिकथं इमित देछा। 14थथे छं लेवीतय्त इस्राएलीतपाखें अलग या, अले लेवीत जिगु जुइ।
15“छं लेवीतय्त विधिकथं शुद्ध यानाः संकाबीगु बलिया निंतिं इमित देछाये धुंकाः पवित्र पालय् ज्या यायेत इपिं वनेमाः। 16इस्राएलीत मध्ये इपिं जितः देछाःपिं खः। दकलय् न्हापां प्वाथं पिहांवःपिं इस्राएलीतय् न्हापां बूपिंनिगु पलेसा जिं इमित कयागु दु। 17इस्राएलीतय् मनू जूसां पशु जूसां न्हापां बूपिं फुक्क जिम्ह हे खः। मिश्रीतय् सकल न्हापां बूपिन्त जिं स्यानागु दिं इमित जिं अलग याना।#प्रस १३:२ 18थुकथं इस्राएलीतय् न्हापां बूपिनिगु पलेसा जिं लेवीतय्त कयागु खः। 19फुक्क इस्राएलीतय्गु निंतिं जिं हारून व वया काय्पिनिगु निंतिं लेवीतय्त ल्ययागु दु। इमिसं नापलायेगु पालय् इस्राएलीतय्पाखें ज्या याइ, अले प्रायश्चित यायेत बलि बी। गुकिं यानाः पवित्र लागाया न्ह्यःने इपिं वनीबलय् इमित छुं नं विपत्ति मजुइमा।”
20परमप्रभुं लेवीतय्गु बारे मोशायात उजं बियादीगु थें मोशा, हारून व इस्राएलया फुक्क खलकं लेवीतय्त अथे हे यात। 21लेवीतय्सं थःपिन्त शुद्ध यानाः थथःगु वसः हिल। अले हारूनं इमित संकाबीगु बलिकथं परमप्रभुया न्ह्यःने देछाल। अले वं इमित शुद्ध यायेत इमिगु निंतिं प्रायश्चित यात। 22अनंलि दक्व लेवीत हारून व वया काय्पिनिगु न्ह्यःने नापलायेगु पालय् ज्या यायेत वल। परमप्रभुं लेवीतय्गु बारे मोशायात बियादीगु उजंकथं इमिसं यात।
23हानं परमप्रभुं मोशायात धयादिल, 24“लेवीतय्सं ज्या यायेगु नियम थथे दु – निइन्यादँ व वस्वयां च्वय्यापिं नापलायेगु पालय् ज्या यायेत वयेमाः। 25अय्नं नेय्दँ दये धुंकाः इमिसं न्हिन्हिं यायेमाःगु ज्या त्वःतेमाः। अले हानं ज्या मयायेमाः। 26इमिसं नापलायेगु पालया ज्याय् थः दाजुकिजापिन्त ग्वाहालि बी फु, अय्नं छुं कथंयागु ज्या थःपिन्सं मयायेमा। अथे जुयाः लेवीतय्सं यायेमाःगु ज्याया बारे छं इमित थथे हे या।”
Currently Selected:
गन्ती 8: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
