गन्ती 34
34
बीत्यंगु देशया लागा
1परमप्रभुं मोशायात धयादिल, 2“इस्राएलीतय्त धा, ‘छिपिं कनान देश थ्यने धुंकाः जिं छिमित सर्बयकथं बी धयागु जमिन थुकथं जुइ।
3“‘छिमिगु दच्छिन लागाय् एदोमया सिमानाय् जीनया मरुभूमिया छुं ब्व लाइ। छिमिगु दच्छिनयागु सिमाना पुर्बपाखे मृत सागर#३४:३ मृत सागर थुकियात खारा समुद्र नं धाइ सिथंनिसें न्ह्यानाः 4अक्रब्बीमया भज्याङ्ग जुयाः जीनपाखे न्ह्यज्याःनाः कादेश-बर्नेया दच्छिन तक वनी। अनंलि व हसर-अद्दर जुयाः अज्मोन तक थ्यनी। 5अनं सिमाना अज्मोनं चाःहिलाः मिश्रया ब्यासि थ्यंकाः भूमध्यसागरय् क्वचाइ।
6“‘छिमिगु पच्छिमया लागा भूमध्यसागरया सिथ तक जुइ। छिमिगु पच्छिमया सिमाना थ्व हे जुइ।
7“‘छिमिगु उत्तरया लागा भूमध्यसागरंनिसें न्ह्यानाः होर पर्वत तक थ्यनी। 8अनं लेबो-हमात जुयाः सदाद तक थ्यनी। 9सदादं पुर्बपाखे न्ह्याः वनाः सिप्रोन जुयाः हसर-एनानय् वनाः क्वचाइ। छिमिगु उत्तरया सिमाना थ्व हे जुइ।
10“‘छिमिगु पुर्बया लागा हसर-एनानंनिसें न्ह्याः वनाः सपाम तक थ्यनी। 11अनं क्वहां वनाः ऐनया पुर्बय् लाःगु रिब्ला तक थ्यनी। अनं गालीलया समुद्रया पुर्बया सिथय् च्वंगु डाँडाय् क्वहां वनी। 12अनंलि छिमिगु लागा यर्दन खुसिपाखे क्वहां वनाः मृत सागर तक थ्यनी।
“‘थ्व हे छिमिगु देशया लागा जुइ।’”
13मोशां इस्राएलीतय्त उजं बिल, “थ्व देशयात सर्बय सर्बयकथं गोला तयाः इनाका। परमप्रभुं थुकियात गुंगू व बागू कुलयात ब्यु धकाः उजं बियादीगु दु।#गन्ती २६:५२-५६; यहो १४:१-५ 14रूबेनया कुल, गादया कुल, व मनश्शेया बागू कुलया छेँजःतय्त इमिगु सर्बय दये धुंकल। 15थुपिं निगू व बागू कुलं यरीहोया मेखेपाखे यर्दन खुसिया पुर्बपाखे थथःगु सर्बय काये धुंकूगु दु।”
जमिन इनाब्यूपिनिगु नां धलः
16परमप्रभुं मोशायात धयादिल, 17“छिमित सर्बयकथं जमिन इनाबीपिं मनूतय्गु नां थथे दु, पुजाहारी एलाजार व नूनया काय् यहोशू। 18थथे इनेत इमित ग्वाहालि बीत छगू छगू कुलं छम्ह छम्ह नायः नं ल्य। 19इमिगु नां थथे दु –
“कुल – नायः
यहूदा – यपुन्नेया काय् कालेब
20शिमियोन – मीहूदया काय् शेमुएल
21बेन्यामीन – किसलोनया काय् एलीदाद
22दान – योगलीया काय् बुक्की
23मनश्शे (योसेफया काय्) – एपोदया काय् हन्नीएल
24एफ्राइम (योसेफया काय्) – शिप्तानया काय् कमूएल
25जबूलून – पर्नाकया काय् एलीजापान
26इस्साखार – अजानया काय् पल्तिएल
27आशेर – शलोमीया काय् अहीहूद
28नप्ताली – अम्मीहूदया काय् पदहेल।”
29इस्राएलीतय्त कनान देश सर्बयकथं इनाबीत परमप्रभुं ल्ययादीपिं मनूत थुपिं हे खः।
Currently Selected:
गन्ती 34: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
