गन्ती 31
31
मिद्यानीत लिसे ल्वाःवंगु
1परमप्रभुं मोशायात धयादिल, 2“इस्राएलीतय्गु निंतिं मिद्यानीतय्त बदला का! अनं लिपा छ सिनाः थः पुर्खातनापं मिलय् जू वनी।”
3अथे जुयाः मोशां मनूतय्त थथे धाल, “मिद्यानीतलिसें ल्वायेत व इपिं नापं परमप्रभुया बदला कायेत छिपिं मध्ये छुं मिजंतय्त ल्वाभः ज्वंकि। 4इस्राएलया छगू छगू कुलं द्वःछिम्ह द्वःछिम्ह मनूत लडाइँ यायेत छ्व।” 5अथे जुयाः इस्राएलीतय् फुक्क वंशपाखें द्वःछिम्ह द्वःछिम्ह यानाः झिंनिद्वःम्ह ल्वाभः ज्वनातःपिं मनूत ल्यल। 6मोशां छगू छगू कुलं द्वःछिम्ह द्वःछिम्ह मनूतय्त लडाइँलय् छ्वत। एलाजार पुजाहारीया काय् पीनहास इमि नायः जुल। मोशां पीनहासयात पवित्र लागाया सामान व लडाइँ घोषणा याइगु तुरहीतय्गु जिम्मा बिल।
7परमप्रभुं मोशायात उजं बियादीगु थें इपिं मिद्यानीतलिसें लडाइँ यात। इमिसं इमि दक्व मिजंतय्त स्यानाबिल। 8स्यूपिं मनूत मध्ये मिद्यानया न्याम्ह जुजुपिं एवी, रेकेम, सूर, हूर व रेबा नं दुगु जुयाच्वन। इमिसं बओरया काय् बालामयात नं तरवारं स्यात। 9इस्राएलीतय्सं मिद्यानी मिस्तय्त व मस्तय्त ज्वनाः कुन अले इमि दक्व सा द्वहं, फैच्वलय्त व फुक्क सम्पत्ति लाकाकाल। 10अले इपिं च्वनाच्वंगु फुक्क शहरतय्त व छाउनीतय्त छ्वयेकाबिल। 11अले इपिं थःपिन्सं लाकाकाःगु सामान व थःपिन्सं ज्वंपिं मनूत व पशुत ज्वनाः वन। 12अले उपिं ज्वनातःपिं मनूतय्त, पशुतय्त व लाकाकाःगु सामान यरीहो शहरया उखे यर्दन खुसिया सिथय् मोआबया ख्यलय् दुगु छाउनीइ मोशा, एलाजार पुजाहारी व इस्राएलया फुक्क खलःयाथाय् हल।
लडाइँनं लिहां वःगु
13अले इपिं नापं नापलायेत मोशा, एलाजार पुजाहारी व खलःया फुक्क नायःत छाउनी पिने वल। 14लडाइँनं लिहांवःपिं द्वःछि द्वःछिम्ह सिपाइँतय् नायःत व सछि सछिम्ह सिपाइँतय् नायःत खनाः मोशा तंचाल।
15मोशां इमित धाल, “छु! छिमिसं सकल मिस्तय्त म्वाका हे तयागु ला? 16थुमिसं हे बालामया खँ न्यनाः इस्राएलीतय्त पोरय् परमप्रभुयागु विरोधय् विश्वासघात याकूगु खः। अथे जुयाः खलःया दथुइ महामारी वःगु खः।#गन्ती २५:१-९ 17अथे जुयाः आः फुक्क मिजंमस्त व मिजंनापं द्यने धुंकूपिं मिसातय्त स्यानाछ्व। 18तर सकल कन्या मिस्तय्त धाःसा छिमिसं थःपिनिगु लागिं म्वाकाः हे ति।
19“छिपिं मध्ये ग्वःम्हय्सिनं सुं मनूयात स्याःगु दु वा ग्वःम्हय्सिनं सीम्ह थ्यूगु दु इपिं फुक्क न्हय्न्हु तक छाउनीं पिने च्वनेमाः। स्वन्हु खुन्हु व न्हय्न्हु खुन्हु छिमिसं थःपिन्त व थः कैदीतय्त शुद्ध या। 20छिमिसं फुक्क वसः, छेंगूयागु फुक्क ज्वलं, दुगुचाया सँ, अले सिँयागु फुक्क सामान शुद्ध या।”
21अले एलाजार पुजाहारीं लडाइँलय् वंपिं मिजंतय्त धाल, “परमप्रभुं मोशायात थ्व विधि बियादीगु दु। 22लुँ, वहः, कँय्, न, जस्ता व म्हः 23अले मिं भस्म मयाइगु फुक्क ज्वलंयात मिइ तयाः शुद्ध यायेमाः। उकियात शुद्ध यायेगु लखं नं शुद्ध यायेमाः। मिइ भस्म जुयाः वनीगु ज्वलं व लखं शुद्ध यायेमाः। 24न्हय्न्हु खुन्हु छिमिसं थःगु वसः हीमाः। अले छिपिं शुद्ध जुइ। अनं लिपा छिपिं छाउनीइ वःसां ज्यू।”
लाकाहःगु सामान इनाब्यूगु
25परमप्रभुं मोशायात धयादिल, 26“छ, एलाजार पुजाहारी व खलःया छेँजःतय् नायःतय्सं ज्वनाहःपिं मनूत व पशुत ल्याःखा। 27अले फुक्कयात बच्छि बच्छि यानाः छब्व लडाइँलय् वंपिं सेनातय्त ब्यु, मेगु ब्व खलःयात ब्यु। 28लडाइँलय् वंपिं सेनापाखें मनूत, सा द्वहं, गधा, फै-च्वलय् मध्यें न्यासःम्हय् छम्ह परमप्रभुयात करकथं ब्यु। 29इमिगु बच्छि ब्व पाखेंयागु थ्व कर कयाः परमप्रभुया भागकथं पुजाहारी एलाजारयात ब्यु। 30इस्राएलीतय्गु बच्छि ब्वपाखें मनूत, सा द्वहं, गधा, फै-च्वलय् व फुक्क पशुया नेय्म्हय् छम्ह कयाः परमप्रभुया नापलायेगु पाल स्वइपिं लेवीतय्त ब्यु।” 31परमप्रभुं मोशायात बियादीगु उजं थें मोशा व एलाजार पुजाहारीं यात।
32सेनातय्सं लाकाकाःगु बाहेक मेगु सम्पत्ति थ्व खः –
फै-च्वलय् ६,७५,००० म्ह,
33सा द्वहं ७२,००० म्ह,
34गधा ६१,००० म्ह,
35मिजंनापं मद्यंपिं मिसात ३२,००० म्ह।
36लडाइँलय् वंपिं सेनातय्त लाःवःगु बच्छि ब्व थथे दु –
फै-च्वलय् ३,३७,५०० म्ह,
37थुकिं परमप्रभुया निंतिं कर फै-च्वलय् ६७५ म्ह जुल।
38अले सा द्वहं ३६,००० म्ह।
थुकिं ७२ म्ह परमप्रभुया निंतिं कर जुल।
39अले गधा ३०,५०० म्ह।
थुकिं ६१ म्ह परमप्रभुया निंतिं कर जुल।
40मिजंत नापं मद्यंपिं मिसात १६,००० म्ह।
थुकिं परमप्रभुया निंतिं कर ३२ म्ह जुल।
41परमप्रभुं मोशायात उजं बियादी थें परमप्रभुया देछाया कर मोशां एलाजार पुजाहारीयात बिल।
42लडाइँलय् वंपिं सेनातय्के बच्छि ब्व कयाः मोशां इस्राएलया खलःयात ब्यूगु थथे दु –
43फै-च्वलय् ३,३७,५०० म्ह,
44सा द्वहं ३६,००० म्ह,
45गधा ३०,५०० म्ह,
46व मिजंपिं नापं मद्यंपिं मिसात १६,००० म्ह।
47इस्राएलीतय्गु बच्छि ब्वपाखें परमप्रभुं मोशायात बियादीगु उजंकथं वं मनूत व पशुतपाखें नेय्म्हय् छम्ह हयाः परमप्रभुया नापलायेगु पाल जिम्मा काइपिं लेवीतय्त बिल।
48अले द्वःछि द्वःछिम्ह व सछि सछिम्ह सिपाइँतय् कप्तानत मोशायाथाय् वयाः 49वयात धाल, “छि दासतय्सं जिमिगु जिम्माय् दुपिं सेनातय्त ल्याः खाःगु दु। जिमि मनूत छम्ह नं तंगु मदु। 50अथे जुयाः जिमिसं थथःपिन्सं हयागु लुँया तिसा, ल्हाः बाला, अंगूचा, मार्वरि व सिखः परमप्रभुयात छायाः जिमिगु प्रायश्चित यायेत परमप्रभुयात देछाकथं हयागु दु।”
51मोशा व पुजाहारी एलाजारं इमिगु ल्हातं फुक्क तिसा काल। 52द्वःछि द्वःछिम्ह सिपाइँतय् कप्तानत व सछि सछिम्ह सिपाइँतय् कप्तानतय्के कयाः इमिसं परमप्रभुयात देछाःगु लुँयागु तौल १६,७५० शेकेल#३१:५२ १६,७५० शेकेल थथे धयागु १९० किलोग्राम ति खः दु। 53लडाइँलय् वंपिं सकल मनूतय्सं लाकाहःगु सामान थथःपिन्सं हे यंकूगु जुयाच्वन। 54मोशा व पुजाहारी एलाजारं द्वःछिम्ह व सछिम्ह सिपाइँतय् कप्तानतपाखें लुँ कयाः परमप्रभुया न्ह्यःने इस्राएलीतय्गु निंतिं लुमन्ति जुइत नापलायेगु पाल दुने हल।
Currently Selected:
गन्ती 31: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
