गन्ती 21
21
कनानीत नापं ल्वाःगु
1नेगेवय् च्वनीम्ह आरादयाम्ह कनानी जुजुं इस्राएलीत अटारीम वनीगु लँ जुयाः वयाच्वंगु दु धयागु खँ न्यनाः व इपिं नापं ल्वाः वल। अले छुं मनूतय्त ज्वनाः यंकल।#गन्ती ३३:४० 2इस्राएलीतय्सं परमप्रभुयात थथे भाकल यानाः प्रार्थना यात, “छिं धात्थें हे थ्व मनूतय्त जिमिगु ल्हातय् बियादिल धाःसा जिमिसं इमित, इमिगु शहरतय्त छितः शर्त मतसें लःल्हाये अले इमित नाश याये।” 3परमप्रभुं इस्राएलीतय्गु बिन्ति न्यनाः कनानीतय्त इमिगु ल्हातय् बियादिल। इस्राएलीतय्सं इमित व इमिगु शहरतय्त भज्यंक नाश यानाबिल। अथे जुयाः व थाय्या नां होर्मा#२१:३ होर्मा थुकिया अर्थ नाश जूगु थाय् खः धकाः तल।
कँय्याम्ह सर्प
4इपिं एदोम देशं पिने पिने चाहिला वनेत होर पर्वतं लाल समुद्रया#२१:४ लाल समुद्र लाल समुद्रया थ्व भाग इमिसं दकलय् न्हापा छीगु लाल समुद्रया पच्छिमपाखे च्वंगु तःधंगु खाडी मखु, थ्व लाल समुद्र पुर्बपाखे च्वंगु मेगु हे तःधंगु खाडी खः। लँ जुयावन। अय्नं मनूत यात्राया हुनिं आय्बुल।#व्य २:१ 5अले इपिं परमेश्वर व मोशाया विरोधय् थथे धकाः हाल, “थ्व मरुभूमिइ सीत छाय् छिकपिन्सं जिमित मिश्र देशं हयादियागु? थन मरि मदु, लः नं मदु। थज्याःगु नसा नँनं जिपिं वाक्क जुइ धुंकल।”#१ कोर १०:९
6अले परमप्रभुं इमिगु थासय् बिख दुपिं सर्प छ्वयादिल अले सर्पतय्सं मनूतय्त न्यानाः तःम्ह हे इस्राएलीत सित। 7मनूत मोशाया न्ह्यःने वयाः धाल, “जिमिसं परमप्रभु व छिगु विरोधय् खँ ल्हानाः पाप यानागु दु। जिमिगु न्ह्यःनें सर्पत चीकादिसँ धकाः परमप्रभुयात प्रार्थना यानादिसँ।” अले मोशां इमिगु लागिं प्रार्थना यात।
8परमप्रभुं मोशायात धयादिल, “छं सर्पयागु छगू झ्वाता दय्काः उकियात थामय् यख्खानाब्यु। सर्पं न्याःपिं मनूतय्सं उकियात स्वये धुंकाः इपिं म्वाइ।” 9थथे मोशां कँय्याम्ह छम्ह सर्प दय्काः उकियात छगू थामय् यख्खानाबिल। अले सर्पं न्याःपिं मध्ये सुनां सुनां व कँय्याम्ह सर्पयात स्वल व मनू म्वात।#२ राज १८:४; यूह ३:१४
इस्राएलीत मोआबपाखे वंगु
10इस्राएलीत न्ह्याः वनाः ओबोतय् पाल ग्वल। 11ओबोतं न्ह्याः वनाः मोआबया पुर्बपाखे इये-अबारीमया मरुभूमिइ इमिसं पाल ग्वल। 12अनं इपिं न्ह्याः वनाः जेरेदया गालय् पाल ग्वल। 13अनं न्ह्याः वनाः इमिसं एमोरीतय्गु देशं पिहां वःगु मरुभूमिइ दुगु अर्नोन खुसियागु उखेपाखे पाल ग्वल। अर्नोन खुसि मोआब व एमोरीतय् दथुइच्वंगु सिमाना खः। 14अथे जुयाः परमप्रभुया युद्धयागु सफुलिइ थथे च्वयातःगु दु,
“सूपाया वाहेब, न्हसिकापत
व अर्नोन खुसि,
15अले तःगाःयागु पाचा,
गुगु आर नांयागु शहरपाखे जुयाः
मोआबयागु सिमानाय् तक वंगु दु।”
16अनं इपिं बेअरय्#२१:१६ बेअर थुकिया अर्थ लः खः। वन। परमप्रभुं मोशायात “मनूत मुं अले जिं इमित लः बी धकाः धयादीगु तुं अन हे दु।” 17उबलय् इस्राएलीतय्सं थ्व म्ये हाल,
“हे तुं, लः पिका!
उकिया बारे म्ये हा,
18व तुं शासकतय्सं म्हूगु खः।
अले मनूतय् थकालितय्सं,
लाय्कू कथिं व थःपिनिगु कथिं म्हूगु खः।”
अले मरुभूमिं मत्तानाय् वन। 19मत्तानां नहलीएलय्, नहलीएलं बमोत तक वन। 20अनं इपिं मोआबया गालय् वन। अन दुगु पिसगाया च्वकां मरुभूमि खने दु।
एमोरीतय् जुजुयात बुकूगु
व्य २:२६-३७
21इस्राएलीतय्सं एमोरीतय् जुजु सीहोनयाथाय् थथे धयाः दूतत छ्वत,
22“जिमित छिगु देश जुयावने बियादिसँ। जिपिं बुँ व दाखक्यबपाखे वने मखु। जिमिसं छिगु छगू नं तुंयागु लः त्वने मखु। छिगु देशं पिहां मवंतले जुजुया मू लँ जुयाः जक वने।”
23अय्नं सीहोनं इस्राएलीतय्त थःगु देशं जुयावने मब्यू। वं थः सेना मुंकाः इस्राएलीतनापं ल्वायेत मरुभूमिइ वयाः यहसाय् थ्यंकाः अन हे इपिं नापं ल्वात। 24अय्सां इस्राएलीतय्सं वयात तरवारं स्यात, अले अर्नोन खुसिंनिसें यब्बोक खुसि तक इमिगु देश त्याका काल। अम्मोनीतय्गु सिमाना तक जक त्याका काल, छाय्धाःसा इमिगु सिमाना बल्लाःगु खः। 25इस्राएलीतय्सं एमोरीतय्गु फुक्क शहर त्याका काल। इपिं एमोरीतय्गु फुक्क शहरय्, हेश्बोन व उकिया लिक्क लिक्क च्वंगु गामय् च्वन। 26हेश्बोन धाःसा एमोरीतय् जुजु सीहोनयागु शहर खः। छुं ई न्ह्यः वं मोआबया जुजुनापं ल्वानाः अर्नोन तक वयागु फुक्क देश वयागु ल्हातं लाकाकाःगु खः।
27अथे जुयाः चिनाखँमितय्सं थथे धाइगु,
“हेश्बोनय् वा अले थ्व हानं दय्केमा,
सीहोनया शहरयात हानं बांलाक दय्केमा।
28हेश्बोनं मि पिहां वल,
सीहोनयागु शहरं छगू मिप्वाःला पिहां वल।
उकिं मोआब देशयागु आर शहरयात
अर्नोन खुसि च्वय्या ततःजाःगु थासय्यापिन्त भस्म यात।#यर ४८:४५-४६
29हे मोआब, छन्त धिक्कार दु!
कमोश द्यःया प्रजा, छ नाश जुल!
वं थः काय्पिन्त बिस्युं जूपिं थें
व थः म्ह्याय्पिन्त दासी थें
एमोरी जुजु सीहोनयात बिल।
30अय्नं आः ला जिमिसं इमित त्याकाःगु दु,
हेश्बोननिसें दीबोन तक नाश जुइ धुंकल।
जिमिसं नोपा व मेदबा तक नं इमित
भज्यंक स्यंकाबी धुन।”
31थुकथं इस्राएली मनूत एमोरीतय्गु देशय् बाय् च्वन।
32मोशां याजेरय् चिवा काइपिं मनूत छ्वये धुंकाः इस्राएलीतय्सं उकिया प्यखेरं च्वंगु गां त्याका काल। अले अन दुपिं एमोरीतय्त लिनाछ्वत।
बाशानया जुजुयात बुकूगु
व्य ३:१-११
33अनंलि इपिं लिहां वयाः बाशान पाखेयागु लँ जुयाः थहां वन। बाशानयाम्ह जुजु ओग धाःसा इपिं नापं लडाइँ यायेत एद्रईलय् थः फुक्क सेनानापं पिहां वल।#व्य ३:१-११
34अले परमप्रभुं मोशायात धयादिल, “व खनाः ग्याये मते, छाय्धाःसा जिं वया फुक्क सेना व देशनापं छंगु ल्हातय् तयाबियागु दु। अले छं एमोरीतय् जुजु हेश्बोनय् च्वंम्ह सीहोनयात गथे यानागु खः वयात नं अथे हे या।”
35अथे जुयाः इमिसं वयात, वया काय्पिन्त अले वया फुक्क मनूतय् सुं छम्ह नं ल्यं मदय्क फुक्कसित स्यानाः इस्राएलीतय्सं इमिगु देश त्याका काल।
Currently Selected:
गन्ती 21: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
