गन्ती 19
19
शुद्ध यायेगु लः
1परमप्रभुं मोशा व हारूनयात धयादिल, 2“परमप्रभुं बियादीगु व्यवस्थाया छगू नियम थ्व हे खः। ककुइ जुवा मलानिम्ह, खू मदुम्ह ह्याउँम्ह साचा छन्थाय् हजि धकाः इस्राएलीतय्त धा। 3छं एलाजार पुजाहारीयात व साचा ब्यु। वयात छाउनीं पिने यंकाः वयागु न्ह्यःने वयात स्यायेमाः। 4अनंलि एलाजार पुजाहारीं थःगु पतिंचां वयागु हि भतिचा कयाः नापलायेगु पालपाखे न्हय्कः छ्वाकेमाः। 5वं खंक हे व साचित, वयागु छेंगू, ला, हि व आतापुतिनापं छ्वयेका छ्वयेमाः। 6अले पुजाहारीं देवदारुया सिँकचा, हिसपमा व ह्याउँगु का कयाः च्यानाच्वंम्ह साचाया च्वय् वांछ्वया बीमाः। 7अनंलि पुजाहारीं थःगु वसः हियाः लखं म्वःल्हुइमाः। अनंलि व छाउनीइ दुहां वयेफु। अय्नं व सन्ध्याकाः इलय् तक अशुद्ध जुइ। 8साचित छ्वय्कुम्हय्सिनं नं थःगु वसः हीमाः अले लखं म्वःल्हुइमाः। सन्ध्याकाः इलय् तक व नं अशुद्ध जुइ।
9“सुं छम्ह शुद्धम्ह मनुखं व साचायागु नउ मुंकेमाः, अले उकियात छाउनीं पिने छगू शुद्ध जूगु थासय् तयेमाः। थ्व नउ इस्राएली खलकं शुद्ध याइगु लखय् छ्यलेत तया तयेमाः। थ्व लः पाप चीकाछ्वयेगु ज्याझ्वलय् छ्यली।#हिब ९:१३ 10साचाया नउ मुंम्हय्सिनं थःगु वसः हीमाः अले सन्ध्याकाः इलय् तक व नं अशुद्ध जुइ। इस्राएलीत व इपिं नापं च्वंपिं परदेशीतय्गु निंतिं थ्व सदांया विधि जुइ।
11“सीम्ह थ्यूम्ह मनू न्हय्न्हु तक अशुद्ध जुइ। 12वं थःत उगु लखं स्वन्हु खुन्हु व न्हय्न्हु खुन्हु शुद्ध यायेमाः, अले व शुद्ध जुइ। वं स्वन्हु खुन्हु व न्हय्न्हु खुन्हु थःत शुद्ध मयात धाःसा व शुद्ध जुइ मखु। 13सुनां सीम्ह थियाः थःत शुद्ध याइ मखु वं परमप्रभुया पवित्र पालयात अशुद्ध याइ। व मनूयात इस्राएलीतपाखें नाश याना छ्वयेमाः। शुद्ध यायेगु लखं वयात मछ्वाकूगुलिं व अशुद्धम्ह हे खः। वयागु अशुद्धता वयाके दया हे च्वनी।
14“सुं मनू पालय् सित धाःसा उकियागु नियम थ्व हे खः, पालय् वइपिं व पाल दुने दुपिं मनूत न्हय्न्हु तक अशुद्ध जुइ। 15अले पुसां त्वपुयामतःगु थल फुक्क अशुद्ध जुइ।
16“हानं सुं मनुखं पिने तरवारं स्याःम्ह मनू वा थःगु कालगतिं सीम्ह मनूयात थिल धाःसा वा सीम्हयागु क्वँय् वा सीगाः थिल धाःसा व न्हय्न्हु तक अशुद्ध जुइ।
17“व अशुद्धम्ह मनूयात शुद्ध यायेत शुद्ध जुइगु बलिकथं छ्वयेकूम्ह साया नउ कयाः थलय् तयाः उकी नीलः तयेमाः। 18अले छम्ह शुद्धम्ह मनुखं हिसपमा कयाः व लखय् थुनाः पाल, पालय् दुगु थलबल व अन दुपिं मनूतय्त छ्वाकेमाः। सीम्हया क्वँय्, स्याःम्ह मनूया सीम्ह, थःगु कालगतिं सीम्ह मनूयात वा सीगाःयात थ्यूम्ह मनूयात नं अथे हे छ्वाकेमाः। 19शुद्धम्ह मनुखं अशुद्ध जूम्ह मनूयात स्वन्हु खुन्हु व न्हय्न्हु खुन्हु व लखं छ्वाकेमाः। न्हय्न्हु खुन्हु वं अशुद्धम्ह मनूयात शुद्ध यायेमाः। अले शुद्ध जूम्हय्सिनं थःगु वसः हियाः म्वःल्हुइमाः, अले सन्ध्याकाः इलय् व शुद्ध जुइ। 20अशुद्ध जूम्ह मनुखं थःत शुद्ध मयात धाःसा वयात खलःया दथुं नाश याना छ्वयेमाः, छाय्धाःसा वं परमप्रभुया पवित्र पालयात अशुद्ध यात। वयागु म्हय् शुद्ध यायेगु लखं मछ्वाकूगुलिं व अशुद्धम्ह हे जुइ। 21इमिगु निंतिं थ्व लिपा थ्यंकया नियम जुइमाः।
“शुद्ध यायेगु लः छ्वाकूम्हय्सिनं नं थःगु वसः हीमाः। शुद्ध यायेगु लः थ्यूम्ह मनू नं सन्ध्याकाः इलय् तक अशुद्ध जुइ। 22अशुद्धम्ह मनुखं न्ह्यागु हे थ्यूसां व अशुद्ध जुइ। अले व थ्यूगु खँ मेम्हय्सिनं थिल धाःसा व नं सन्ध्याकाः इलय् तक अशुद्ध जुइ।”
Currently Selected:
गन्ती 19: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
