गन्ती 15
15
मनूतय्सं गुकथं बलि बीगु
1परमप्रभुं मोशायात धयादिल, 2“इस्राएलीतय्त धा, ‘जिं छिमित बीत्यनागु देशय् थ्यने धुंकाः 3छिमिसं परमप्रभुयात लय्ताय्कीगु नस्वाःकथं होमबलि व विशेष देछा बीबलय् सा द्वहंया बथां वा फैच्वलय्या बथांपाखें जुइमाः, अथे हे भाकलया बलि, थःयसें छाइगु बलि व नखःचखःया बलि बीबलय् 4बलि छाइम्हय्सिनं छगू हीनया प्यब्वय् छब्व#१५:४ हीनया प्यब्वय् छब्व थ्व छगू लिटर ति खः जैतूनया चिकं ल्वाकछ्यानातःगु छगू एपाया झिब्वय् छब्व#१५:४ छगू एपाया झिब्वय् छब्व थ्व १.६ किलोग्राम ति खः भिंगु छुचुंया अन्नबलि परमप्रभुयात छायेमाः। 5होमबलिया छम्ह छम्ह चिधिकःम्ह भ्याःचानापं त्वँसाबलिकथं छगू हीनया प्यब्वय् छब्व दाखमद्य नं छायेमाः।
6“‘भ्याःचा नापं छायेगु अन्नबलिया निंतिं छगू हीनया स्वब्वय् छब्व#१५:६छगू हीनया स्वब्वय् छब्व थ्व छगू बागू लिटर ति खः चिकं ल्वाकछ्यानातःगु छगू एपाया झिब्वय् निब्व#१५:६ छगू एपाया झिब्वय् निब्व थ्व ३.२ किलोग्राम ति खः भिंगु छुचुं व 7त्वंसाबलिया निंतिं छगू हीनया स्वब्वय् छब्व#१५:७ छगू हीनया स्वब्वय् छब्व थ्व छगू व बागू लिटर ति खः दाखमद्य छाये हयेमाः। थ्व फुक्क छिमिसं परमप्रभुया निंतिं नस्वाःकथं देछा।
8“‘होमबलि, भाकल बलिकथं वा मेलबलिकथं परमप्रभुयात द्वहंचा छायेबलय् 9बच्छि हीन#१५:९ बच्छि हीन थ्व निगू बागू लिटर ति खः चिकं ल्वाकछ्यानातःगु छगू एपाया झिब्वय् स्वब्व#१५:९छगू एपाया झिब्वय् स्वब्व थ्व ५ किलोग्राम ति खः भिंगु छुचुंयागु अन्नबलि नं छायेमाः। 10अले बच्छि हीन#१५:१० बच्छि हीन थ्व निगू बागू लिटर ति खः दाखमद्ययागु त्वँसाबलि नं छायेमाः। थ्व विशेष देछाया नस्वालं परमप्रभु लय्ताइ। 11छम्ह छम्ह द्वहं वा भ्याःचा, चिधिकःम्ह भ्याःचा वा दुगुचाया निंतिं थथे हे यायेमाः। 12छिमिसं ग्वम्ह पशुबलि बीगु खः, फुक्कसित थथे हे यायेमाः।
13“‘परमप्रभुयात लय्ताय्कीगु नस्वाःगु विशेष देछा छायेबलय् इस्राएलीतय्सं थुकथं हे यायेमाः। 14छिपिंनापं च्वनाच्वंपिं परदेशी वा लिपा च्वंवइपिं पिनेयापिं सुनानं परमप्रभुयात लय्ताय्कीगु नस्वाःगु विशेष देछा छायेगु मनंतुन धाःसा इमिसं नं थुकथं हे यायेमाः। 15छिमिगु व छिपिंनापं च्वनाच्वंपिं मेगु जातियापिं मनूतय्गु लागिं खलःया सदां सदांया नियम छगू हे जुइमाः। परमप्रभुया न्ह्यःने छिपिं व मेगु जातियापिं मनूत उथें खः। 16छिमित व छिपिंनापं च्वनाच्वंपिं मेगु जातियापिं मनूतय्त छगू हे नियम व छगू हे विधि जुइ।’”#लेवी २४:२२
न्हापांगु मरि छायेगु
17परमप्रभुं मोशायात धयादिल, 18“इस्राएलीतय्त धा, ‘जिं यंकेगु देशय् थ्यने धुंकाः 19छिमिसं व देशया अन्न नइबलय् छगू ब्व परमप्रभुयात छायेमाः। 20छिमिसं न्हापां लःगु बालिं दक्वसिबय् न्हापां मरि छुइबलय् न्हापां छूगु मरियात खलां हःगु बाली थें परमप्रभुयात छायेमाः। 21पुस्तां पुस्ता तकं छिमिसं न्हापां मरि छुइबलय् परमप्रभुयात थुकथं हे छायेमाः।
मसीकं याःगु पाप
22“‘छिमिसं मसीकं परमप्रभुं मोशापाखें बियादीगु उजंत मध्ये छुं नं उजं मानय् मयात धाःसा,#लेवी ४:१३-२१ 23लिपा छिमि सन्तानतय्सं नं मसीकं परमप्रभुं मोशापाखें बियादीगु उजं मानय् मयात धाःसा, 24अले खलकं मसीकं मचायेकं व मभिंगु ज्या याःगु जूसा, फुक्क खलकं परमप्रभुयात यःगु नस्वाःकथं होमबलिया निंतिं छम्ह द्वहंचा, उकिया अन्नबलि व त्वँसाबलि नापं विधिकथं छायेमाः। अले नापं पापबलिया निंतिं छम्ह दुगु नं छायेमाः। 25अले पुजाहारीं इस्राएलया फुक्क खलःया लागिं प्रायश्चित यायेमाः, अले इमित क्षमा याइगु जुइ। छाय्धाःसा व मसीकं मचायेकं याःगु मभिंगु ज्या खः। इमिसं थःगु पापया निंतिं परमप्रभुया न्ह्यःने विशेष देछा व पापबलि हःगु दु। 26थुकथं इस्राएलीया फुक्क खलः व इपिं नापं च्वनाच्वंपिं मेगु जातियापिं मनूतय्त नं क्षमा दइ। छाय्धाःसा थ्व मभिंगु ज्या मनूतय्सं मसीकं मचायेकं याःगु खः।
27“‘सुं मनुखं मसीसें मचाय्कं व मभिंगु ज्या यात धाःसा वं दच्छि दुम्ह च्वलय्चा शुद्ध जुइगु बलिया लागिं छायेमाः।#लेवी ४:२७-३१ 28व मसीकं मचाय्कं व पाप ज्या याःम्ह मनूया प्रायश्चितया निंतिं पुजाहारीं परमप्रभुया न्ह्यःने प्रायश्चित यायेमाः, अले वयात क्षमा दइ। 29इस्राएली जूसां इपिं नाप च्वनाच्वंम्ह मेगु जातियाम्ह मनू जूसां फुक्कसितं मसीकं मचाय्कं याःगु मभिंगु ज्याया निंतिं छगू हे नियम जुइ।
30“‘इस्राएली वा मेगु जातियाम्ह मनू न्ह्याम्हय्सिनं जूसां सीकं चायेकं पापयात धाःसा वं परमप्रभुयात हेला याःगु खः। वयात वया मनूतपाखें पितिना छ्वयेमाः। 31छाय्धाःसा वं परमप्रभुयागु वचनयात हेला याःगु दु, अले वय्कःयागु उजंयात हाचांगाःगु दु। वयात नाश यानाः छ्वयेमाः अले वं थःगु पापया सजाँय फयेमाः।’”
विश्रामबारयात मानय् मयाःगु
32इस्राएलीत मरुभूमिइ दुबलय् इमिसं विश्रामबार खुन्हु सिँ मुनाच्वंम्ह छम्ह मनूयात खन। 33सिँ मुनाच्वंम्हय्सित इमिसं मोशा, हारून व फुक्क खलःयाथाय् हल। 34वयात बीमाःगु सजाँय मसियाः इमिसं वयात कुनातल। 35अले परमप्रभुं मोशायात धयादिल, “व मनूयात स्याना हे छ्वयेमाः! फुक्क खलकं वयात छाउनीं पिने ल्वहँतं कय्काः स्यायेमाः!” 36परमप्रभुं मोशायात उजं बियादीगु थें फुक्क खलकं वयात छाउनीं पिने हल, अले वयात ल्वहँतं कय्काः स्यानाबिल।
गाय् फुर्का तयेगु
37परमप्रभुं हानं मोशायात धयादिल, 38“इस्राएलीतय्त धा, ‘लिपाया पुस्ता तकं छिमिसं थथःपिनिगु गाया सिथय् प्यकुनय् हे फुर्काय् वँचुगु का तयेमाः।#व्य २२:१२ 39थ्व फुर्कां छिमित परमप्रभुया उजं लुमंकेबी। अले छिमिसं थःगु मन व मिखाया ल्वभया बसय् लानाः वेश्या थें मजुसें परमप्रभुया उजं मानय् याइ। 40थ्व फुर्कां छिमित जिगु उजं मानय् यायेमाः धकाः लुमंके बियाः ग्वाहालि याइ, अले छिपिं थः परमेश्वरया निंतिं पवित्र जुइ। 41छिमि परमेश्वर जुइत छिमित मिश्र देशं पितहयाम्ह परमप्रभु छिमि परमप्रभु परमेश्वर जि हे खः।’”
Currently Selected:
गन्ती 15: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
