लेवी 17
17
बलि बीगु नियम
1परमप्रभुं मोशायात धयादिल, 2“परमप्रभुं थ्व उजं बियादीगु दु धकाः हारून, वया काय्पिं अले सकलें इस्राएलीतय्त धा, 3-4‘इस्राएलीत मध्ये सुनानं सा वा द्वहं, चिधिकःम्ह भ्याःचा वा दुगुचापाखें जिगु निंतिं बलि बीबलय् नापलायेगु पालया ध्वाखाय् महःसें अन बाहेक मेगु गुगुं थासय् बलि बिल धाःसा वं परमप्रभुया नियम त्वःथुगु जुइ, वं हिबाः वय्कूगु थें खः। वयात थः मनूतपाखें पितिना छ्वयेमाः। 5इस्राएलीतय्सं खुल्लागु थासय् बियावयाच्वंगु बलि आवंलि नापलायेगु पालया ध्वाखाय् पुजाहारीतय्थाय् परमप्रभुया लागि हयाः वय्कःया लागि मेलबलिकथं छायेमाः धकाः थ्व आज्ञा ब्यूगु खः। 6पुजाहारीं व हि नापलायेगु पालया ध्वाखाय् परमप्रभुया वेदीइ छ्वाकेमाः, दाः धाःसा परमप्रभुया निंतिं नस्वाः यायेत छ्वय्केमाः। 7इमिसं आवंलि दुगुया ख्वाः वःपिं द्यःतय्त पुजा यानाः थःत हे वेश्या मदय्केमाः धयागु आजुं थ्व विधि दय्कूगु खः। इमि पुस्तौं पुस्ताया निंतिं थ्व न्ह्याबलेंया नियम खः।’
8“अले छं इमित थथे धा, ‘इस्राएलीत व इपिं नापं च्वनाच्वंपिं परदेशीत मध्ये सुनानं होमबलि वा मेगु न्ह्यागुं बलि छायेबलय्, 9थ्व नापलायेगु पालया ध्वाखाय् जक छायेमाः। सु मनुखं थथे याइ मखु वयात थःगु पुचलं पितिना छ्वयेमाः।
हि नये मज्यू
10“‘इस्राएलीत वा इपिं नापं च्वनाच्वंपिं परदेशीत मध्ये सुनानं हि नल धाःसा जिं व हि नइम्ह मनूयागु विरोध याये, अले वयात थः मनूतपाखें पितिनाछ्वये।#उत ९:४; लेवी ७:२६-२७; १९:२६; व्य १२:१६,२३; १५:२३ 11छाय्धाःसा प्राणीतय्गु प्राण हिलय् दयाच्वनी अले जिं उकियात छिमित वेदीइ प्रायश्चित यायेत बियागु खः। छाय्धाःसा उकी प्राण दुगुलिं हिपाखें हे प्रायश्चित जुइ।#हिब ९:२२ 12अथे जुयाः जिं इस्राएलीतय्त धयागु दु, “छिपिं सुनानं हि नये मज्यू, अले छिपिंनापं च्वनाच्वंपिं सुं परदेशीं नं हि नये मज्यू।”
13“‘अथे जूगुलिं सुं इस्राएली वा सुं परदेशीं शिकार म्हिताः नये ज्यूम्ह पशु वा झंगः ज्वन धाःसा दकलय् न्हापा वं वयागु फुक्क हि पिकयाः हिया द्यःने चा तयाः त्वपुयाबीमाः। 14छाय्धाःसा म्हयागु प्राण हिलय् दु। अथे जुयाः जिं इस्राएलीतय्त धयागु दु, “सुनानं प्राणीयागु हि नये मज्यू छाय्धाःसा फुक्कं प्राणीतय्गु प्राण इमिगु हि हे खः। सुनां उकियात नइ वयात पितिना छ्वयेमाः।”
15“‘सुं इस्राएली वा परदेशी मनुखं सुं थःगु कालं स्यूम्ह वा जंगली पशुं स्याःम्ह पशुया ला नल धाःसा वं थःगु वसः हीमाः, लखं म्ह छम्हं म्वःल्हुइमाः अले सन्ध्याकाः ईतक व अशुद्ध जुइ। अनं लिपा व शुद्ध जुइ। 16वं वसः महिल धाःसा अले म्वः नं मल्हुल धाःसा वं याःगु पापया दोष वयात हे लाइ।’”
Currently Selected:
लेवी 17: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
