यशैया 2
2
परमप्रभुया पर्वत
1आमोजया काय् यशैयायात यहूदा व यरूशलेमया बारे परमेश्वरं ब्यूगु दर्शन थ्व हे खः#मीका ४:१-३ –
2लिपांगु दिनय् परमप्रभुया देगः पलिस्था यानातःगु पर्वत
मेगु फुक्क पर्वत स्वयाः
मू वंगु जुयाः थापं जुइ।
व हिमालत स्वयाः तसकं तःजाः जुइ,
अले फुक्क जातित अन मूंवइ।
3अले यक्व मनूत वयाः थथे धाइ,
“वा, झीपिं परमप्रभुया पर्वत,
याकूबया परमेश्वरयागु देगलय् वनेनु।
अनंलि वय्कलं हे झीपिं वय्कःयागु लँपुइ वने फयेमा धकाः
झीत थःगु लँपु स्यनादी।”
अले व्यवस्था सियोनं व
परमप्रभुया वचन यरूशलेमं पिहां वइ।
4वय्कलं जाति जातितय्गु दथुइ न्याय यानादी।
अले यक्व मनूतय्गु ल्वापुख्यापु मिलय् यानादी।
इमिसं थःगु तरवारयात मुगलं दायाः हलोया फालि व भालायात ईंचा दय्की।
जाति जातितय् दथुइ ल्वापुख्यापु जुइ मखु,
अले लडाइँया निंतिं सुनानं स्यनेकने याइ मखु।#योए ३:१०; यशै २:१-४
5अय् याकूबया सन्तानत,
वा, झीपिं परमप्रभुया जःलय् न्यासि वनेनु।
परमप्रभुया दिं
6हे परमप्रभु, छिं थः प्रजा याकूबया सन्तानयात त्वःतूगु दु,
इमिसं थःगु देशयात पुर्बयागु थितिकुतिं जाय्कूगु दु,
इमिसं पलिश्तीतय्सं थें जादु क्यनी
अले इमिसं बिदेशीतनापं स्वापु तइ।
7इमिगु देश लुँ व वहलं जाःगु दु
अले अन च्वंपिन्त धन-सम्पत्ति छुं हे मगाःमचाः जूगु मदु।
इमिगु देश सलया सलं जक जाःगु दु
अले इमिगु रथला ल्याः खाये हे मफु।
8इमिगु देश मूर्तिया मूर्ति जक जाःगु दु,
इमिसं थःगु हे ल्हातं दय्कूगु मूर्तियात पुजा याःगु दु।
9उकिं यानाः फुक्कसिगु हेला व बेइज्जत जुइ।
हे परमप्रभु, इपिं सुयात नं क्षमा यानादी मते।
10परमप्रभुया दण्डपाखें बचय् जुइत व वय्कःया महिमा,
तःजिगु शक्तिपाखें सुपिलेत इपिं तग्वःगु ल्वहं व गुफाय् दुहांवनी।#प्रका ६:१५; २ थेस १:९
11परमप्रभुया दिं वयाः मनूतय्गु फुइँ
व तःधंछु नाश जुयावनी।
थ्व दिंखुन्हु परमप्रभुयात जक तःधंकेगु जुइ।
12उखुन्हु दक्व शक्ति दुम्ह परमप्रभुं फुइँ यानाजुइपिं
व तःधंछुया जुइपिं सकसित क्वमिलु यानादी।
13वय्कलं लेबनानया ततःमागु स्वसिमा व
बाशान देशया बबल्लाःगु स्वसिमा थें च्वंपिं फुक्क तःधंछु मनूतय्त नाश यानादी।
14वय्कलं ततःजाःगु पर्वत
व डाँडात थें च्वंपिं फुक्कसित माथं वंकादी।
15वय्कलं ततःजाःगु धरहरा
व बबल्लाःगु पःखाःत थें च्वंपिं फुक्कसित थुनाबी,
16वय्कलं दक्वसिबय् तःधंगु
व तसकं बांलाःगु जहाज थें च्वंपिं फुक्कसित नाश यानादी।
17-18वय्कलं मनूतय्गु घमण्डयात क्वमिलु यानादी।
व दिंखुन्हु मूर्तित फुक्कं मदय्का छ्वइ।
अले परमप्रभुयात जक तःधंकेगु जुइ।
19परमप्रभुं पृथ्वीइ ग्यानापुगु छ्वया हयादीबलय्
परमप्रभुया दण्डपाखें बचय् जुइत
व वय्कःया महिमा व तःजिगु शक्तिपाखें सुपिलेत
इपिं तग्वःगु ल्वहंया गुफाय् व जमिनया प्वालय् दुहांवनी।
20व दिंखुन्हु मनूतय्सं आराधना यायेत
थःम्हं दय्कूगु वहः
व लुँया मूर्तित छुं
व चिकंलापाया न्ह्यःने वान्छ्वया बी।
21पृथ्वीयात लिगिलिगि संकेत
परमप्रभु दनादीबलय्, परमप्रभुया दण्डपाखें बचय् जुइत
व वय्कःया महिमा व तःजिगु शक्तिपाखें सुपिलेत
इपिं तग्वःगु ल्वहंया गुफाय् व जमिनया प्वालय् दुहांवनी।
22छम्हू जक सासः दुम्ह मनूतय्के भलसा तये मते।
व छु हे मू वंम्ह खः धकाः?
© 2024 Nepal Bible Society, Newa Christian
Literature Center and Wycliffe Bible Translators, Inc.