प्रस्थान 3
3
च्यानाच्वंगु झाः
1मोशा थः ससःबौ मिद्यानया पुजाहारी यित्रोया फैच्वलय् ज्वयाच्वंगु जुल। अले मरुभूमिइ फैच्वलय् ज्वज्वं परमेश्वरया पर्वत होरेबय् थ्यंक हे यंकल। 2अन छगू झाःया दथुइ मि जलय् परमप्रभुया दूत खनेदत। मोशां व झालय् मि च्यानाच्वंसां झाः छुं मजूगु खन।#प्रे ७:३०-३४ 3अथे जुयाः मोशां, “जि लिक्क हे वनाः थ्व अजू चायापुगु मि स्वये, व झाः छाय् छुं मजूगु” धकाः मतिइ तल।
4च्यानाच्वंगु मि स्वयेत व लिक्क वःगु खनाः परमप्रभु परमेश्वरं वयात च्यानाच्वंगु झालं, “मोशा, अय् मोशा” धकाः सःतादिल।
अले मोशां धाल, “जि थन हे दु।”
5परमेश्वरं धयादिल, “थुखे लिक्क वये मते। थःगु लाकां त्वः, छाय्धाःसा छ दनाच्वंगु थाय् पवित्रगु खः।” 6वय्कलं हानं धयादिल, “जि छिमि पुर्खाया परमेश्वर खः, अब्राहाम, इसहाक व याकूबया परमेश्वर खः।” अले मोशां थःगु ख्वाः त्वपुल, छाय्धाःसा परमेश्वरयात स्वयेत व ग्यात।
7परमप्रभुं धयादिल, “जिं धात्थें हे मिश्रय् च्वंपिं जि थः मनूतय्त तसकं सास्ती जूगु खनागु दु। अले मिश्रीतय्सं यानाः इपिं ख्वःगु सः जिं न्यनागु दु। इमिगु दुःख जिं स्यू, च्यूताः नं कयाच्वनागु दु। 8अथे जुयाः इमित मिश्रीतय्गु ल्हातं त्वःतकाः व देशं मेगु भिंगु व तःधंगु दुरु व कस्ति बाः वयाच्वंगु कनानी, हित्ती, एमोरी, परिज्जी, हिव्वी व यबूसीतय्गु देशय् हयेत जि क्वहां वयागु दु। 9आः इस्राएलीत तःसलं ख्वःगु सः जिथाय् थ्यंगु दु। मिश्रीतय्सं इमित गुलि सह याये मफय्क दुःख ब्यूगु दु व नं जिं खनागु दु। 10अथे जुयाः छ हुँ, जिं थः मनू इस्राएलीतय्त मिश्रं पित हयेत छन्त फारोयाथाय् छ्वये।”
11मोशां परमेश्वरयात धाल, “फारोयाथाय् वनाः इस्राएलीतय्त मिश्रं पित हये फुम्ह जि सु खः धकाः?”
12परमेश्वरं धयादिल, “जि छनापं दइ। अले जिं हे छन्त छ्वयागु खः धयागु खँया चिं थ्व जुइ, छं थः मनूतय्त मिश्रं पित हये धुंकाः छिमिसं थ्व हे पर्वतय् परमेश्वरयात आराधना याइ।”
वय्कःया नां छु खः?
13मोशां परमेश्वरयात धाल, “जिं इस्राएलीतय्थाय् वनाः इमित ‘छिमि पुर्खाया परमेश्वरं हे जितः छिमिगु निंतिं छ्वयाहःगु खः’ धकाः धायेबलय्, इमिसं ‘वय्कःया नां छु खः?’ धकाः न्यन धाःसा जिं इमित छु धायेगु?”#प्रस ६:२-३
14परमेश्वरं मोशायात धयादिल, “जि सु खः व हे खः। वय्कलं हाकनं धयादिल, छं इस्राएलीतय्त थथे धा, ‘जि खः धाःम्हय्सिनं जितः छिमिथाय् छ्वयाहःगु खः।’”#प्रका १:४,८
15परमेश्वरं हानं मोशायात धयादिल, “इस्राएलीतय्त धा, ‘परमप्रभु#३:१५ परमप्रभु हिब्रू भाषां थुकिया अर्थ “जि हे खः” छिमि पुर्खाया परमेश्वर आर्थात अब्राहाम, इसहाक, याकूबया परमेश्वरं जितः छिमिथाय् छ्वयाहःगु खः।’
“न्ह्याबलेंया निंतिं जिगु नां थ्व हे खः।
जिगु थ्व हे नामं जितः
छिमिसं पुस्तां पुस्ता तक लुमंकेगु याइ।
16“छ वनाः इस्राएलयापिं थकालित मुंकाः इमित थथे धा, ‘छिमि पुर्खा अब्राहाम, इसहाक, याकूबया परमप्रभु परमेश्वर जिथाय् न्ह्यःने खनेदय्कः झायाः थथे धयादीगु दु, जि छिमिथाय् वयागु दु, मिश्रय् छिमित गुलि दुःख ब्यूगु दु व नं जिं खनागु दु। 17अले जिं छिमित मिश्रीतय्सं याःगु दुःखं लिगनाः दुरु व कस्ति बाः वयाच्वंगु कनानी, हित्ती, एमोरी, परिज्जी, हिव्वी व यबूसीतय्गु देशय् यंकेत क्वःछिनागु दु।’
18“अले इस्राएलया थकालितय्सं छंगु खँ न्यनी। अनं लिपा छं इपिं नापं मिश्रया जुजुयाथाय् वनाः थथे धा, ‘हिब्रूतय् परमप्रभु परमेश्वरं जिमित नापलानादीगु दु। उकिं जिमित जिमि परमप्रभु परमेश्वरयात बां बीत स्वन्हुया लँपुया मरुभूमिइ वनेबियादिसँ धकाः इनाप याये।’ 19मिश्रयाम्ह जुजुं गुबलय् तक करं काइ मखु उबले तक छिमित वनेबी मखु धकाः जिं स्यू। 20अथे जुयाः जिं मिश्र देशपाखे थःगु ल्हाः ल्ह्वनाः इमित जिगु अजू चायापुगु ज्यां कय्के। अले तिनि वं छिमित वनेबी।
21“जिं मिश्रीतय्त छिमित हनाबना तइपिं यानाबी। अले छिपिं अनं पिहां वनीबलय् ल्हातय् छुं मदय्क वनी मखु।#प्रस १२:३५-३६ 22फुक्क इस्राएली मिसातय्सं थथः मिश्री जःलाखःला व इमिगु छेँय् च्वनिपिं मिसातय्के लुँ, वहः, तिसा व वसः फ्वनी, अले छिमिसं व थःकाय् म्ह्याय्पिन्त पुंकी। थुकथं छिमिसं मिश्रीतय्गु धन ज्वनाः वइ।”
Currently Selected:
प्रस्थान 3: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.