प्रस्थान 25
25
नापलायेगु पाल दय्केत बी हःगु देछा
1परमप्रभुं मोशायात धयादिल,#प्रस ३५:४-९ 2“जिगु निंतिं देछा हयेमाः धकाः इस्राएलीतय्त धा, जिगु निंतिं दुनुगलंनिसें बीगु मनदुपिं मनूतय्सं बी हःगु देछा छं का। 3इमिगुपाखें कायेगु देछा थथे दु – लुँ, वहः, कँय्, 4वँचुगु, प्याजीगु, ह्याउँगु का व सूती कापः, च्वलेचिया सँ, 5ह्याउँगु रंग छिनातःगु फैचायागु छेंगू, डल्फिनया छेंगू, खयःसिँ, 6पाल्चाया निंतिं जैतूनया चिकं, अभिषेक याइगु चिकं व नस्वाःगु गुँगू दय्केत मसला। 7अले एपोद व छाती-पाताय् घाकेत थीथी मू वंगु थी।
8“जि इमिगु दथुइ च्वनेत इमिसं जिगु निंतिं छगू नापलायेगु पाल दय्केमाः। 9जिं छन्त क्यनेत्यनागु नमूनाकथं छं नापलायेगु पाल व उकियागु फुक्कं ज्वलं दय्कि।
बाचा चिनादीगु सनू
10“छं खयःसिँयागु १.१ मि. हाकः, ६६ से.मि. ब्या व ६६ से.मि. तःजाःगु छगः सनू दय्केमाः।#प्रस ३७:१-९ 11उकियागु दुने व पिने भिंगु लुं भुनाब्यु। अले उकिया प्यखेरं लुँया बाला दय्कि। 12उकिया निंतिं लुँयागु प्यचाः चाः दय्काः उकियात सनूया प्यंगू ख्वःलय् तयाब्यु। थ्व छखे निचाः व मेखे निचाः तयाब्यु। 13अले खयःसिँयागु निपु न्वः दय्कि अले उकियात लुं हिनाब्यु। 14सनू क्वबीत न्वःत निखें दुगु चालय् ति। 15उपिं न्वःत सनूया चाकलय् हे दयाच्वनेमाः। उपिं अनं लिकाये मते। 16अले जिं छन्त बीत्यनागु बाचाया पौतय्त सनूइ तयाब्यु।
17“अले भिंगु लुँयागु १.१ मि. हाकः, ६६ से.मि. ब्या दुगु छगू प्रायश्चितया कृपा-आसन दय्कि।#हिब ९:५ 18मुगलं दायाः लुँया निम्ह करूब दय्कि। 19करूबतय्त प्रायश्चितया कृपा-आसनया निखें सिथय् तयाब्यु। करूबतय्त व प्रायश्चितया कृपा-आसनयात छधी हे लुं दय्कि। 20उपिं करूबतय्सं थथःगु पपू च्वय्पाखे चकंका च्वंगु व प्रायश्चितया कृपा-आसनयात थःगु पपूं त्वपुयातःगु जुइमाः। इमिगु ख्वाः चुलिंचू प्रायश्चितया कृपा-आसनपाखे स्वय्कातःगु जुइमाः। 21जिं छन्त बीत्यनागु बाचाया पौ सनूया दुने ति। अले प्रायश्चितया कृपा-आसनयात सनूया द्यःने तयाब्यु। 22अन जिं छनापं नाप लाये। प्रायश्चितया कृपा-आसन च्वय् निम्ह करूबतय्गु दथुं इस्राएलीतय्गु निंतिं फुक्कं उजं जिं छन्त बी।
छायेहःगु मरि तइगु तेबिल
23“छं खयःसिँयागु ८८ से.मि. हाकः, ४४ से.मि. ब्या व ६६ से.मि. तःजाःगु छगू तेबिल दय्कि।#प्रस ३७:१०-१६ 24उकियात भिंगु लुं भुनाब्यु, अले उकिया प्यखेरं लुँया बाला दय्कि। 25उकिया प्यखेरं ८ से.मि. ब्या दुगु बाला नं दय्कि। अले प्यखेरं सिधालय् लुँयागु मेगु बाला दय्कि। 26तेबिलया निंतिं लुँयागु प्यचाः चाः दय्काः चाःतय्त प्यंगू तुति च्वय् प्यखें कुन्चाय् तयाब्यु। 27तेबिल ल्ह्वनीगु न्वःत कताकेत चाः बाला लिक्कसं दयेमाः। 28थ्व न्वःत खयःसिँयागु दय्कि, अले लुं भुनाब्यु। व हे न्वलं जक तेबिल क्वबीगु यायेमाः। 29उकियागु पाःचागु थल, आम्खुरा व त्वँसाबलि प्वंकेगु करुवा व ख्वल्चा भिंगु लुँयागु जुइमाः। 30तेबिलय् जिगु न्ह्ययःने न्ह्याबलें देछाःगु मरि तयेगु या।#लेवी २४:५-८
लुँयागु त्वाःदेवा
31“छं भिंगु लुँयागु छगू त्वाःदेवा मुगलं दायाः दय्कि। उकियागु लिधंसा, चु, स्वां थें च्वंगु ख्वल्चा, चुलि व स्वांफ्वः फुक्कं भिंगु लुँयागु छगू हे कुचां दय्कि।#प्रस ३७:१७-२४ 32उकियागु खुपु कचा पिनेपाखे पिहां वःगु जुइमाः। स्वपु कचा त्वाःदेवाया छखेपाखे अले स्वपु कचा मेखेपाखे। 33छगू कचाय् मर्स्या बरांयागु स्वांफ्वः थें च्वंगु स्वंगः ख्वल्चा व नापं मुखू वयाच्वंगु स्वां व स्वांफ्वः दयेमाः। अले मेगुपाखे नं व थें हे स्वपु कचात पिहां वयाच्वनेमाः। थुकथं अन खुपु कचा दयेमाः। 34त्वाःदेवाया चुइ मर्स्या बरांया स्वांफ्वः थें च्वंगु प्यंगः ख्वल्चा, मुखू वयाच्वंगु स्वां व स्वांफ्वः नापं दयेमाः। 35चूं पिहां वःगु स्वज्व कचात मध्ये न्हापांगु ज्वः काचाया दथुइ छगूगु ग्वः, निगूगु ज्वःया दथुइ निगूगु ग्वः, स्वंगूगु ज्वःया दथुइ स्वंगूगु ग्वः दय्कि। 36त्वाःदेवा, उकियागु मुखू व कचात मुगलं दायातःगु भिंगु लुँयागु छगू हे कुचायागु जुइमाः।
37“उकी न्हय्पाः पाल्चा दय्कि। उपिं पाल्चाय् त्वाःदेवाया न्ह्यःनेपाखे जः बीत मत च्याका ब्यु। 38त्वाःदेवायात माःगु चिम्ता व किस्ति नं भिंगु लुँयागु जुइमाः। 39स्विन्यागू किलोग्राम#२५:३९ स्विन्यागू किलोग्राम स्विन्यागू किलोग्राम धयागु छगू तोडा खः भिंगु लुं त्वाःदेवा व उकियात माःमाःगु ज्वलं दय्कि। 40जिं छन्त गुँच्वकाय् क्यनागु नमूनाकथं थ्व फुक्कं बांलाक दय्कि।” #प्रे ७:४४; हिब ८:५
Currently Selected:
प्रस्थान 25: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
