प्रस्थान 22
22
पलेसा पुलेगु नियम
1“सुनानं द्वहं वा फै खुयाः स्यात वा मिल धाःसा वं छम्ह द्वहंया पलेसा न्याम्ह द्वहं व छम्ह फैया पलेसा प्यम्ह फै पुलेमाः।
2“चान्हय् छेँय् खुयाच्वंबलय् खुँयात ज्वनाः दाःबलय् व सित धाःसा वयागु हियागु दोष दाःम्हय्सित लाइ मखु। 3निभाः त्वयेधुंकाः स्याःगु जूसा वयागु हिया दोष लाइ।
“खुं खुयायंकूगु फुक्कं लितबीमाः। लित बीत वयाके छुं हे मदुसा वयात मियाछ्वयेमाः। 4खुया यंकूम्ह द्वहं, गधा वा फै म्वाःम्ह हे लुल धाःसा खुं निदुगं अप्वः द्वहं वा गधा पुलेमाः।
5“सुनानं थः पशुयात त्वःताछ्वःबलय् उम्ह पशु मेपिनिगु बुँइ वा दाखक्यबय् न वन धाःसा व मनुखं थःगु बुँ वा दाखक्यबया दक्व भिंगु बालिं उकिया पलेसा पुलेमाः।
6“कंझालय् मि च्याकूबलय् मि न्यनाः मेपिनिगु अन्न मुनातःगु थाय्, बुँयागु अन्न वा फुक्क बुँयात भस्म यानाबिल धाःसा मि च्याकूम्हय्सिनं उकिया पलेसा पुलाबीमाः।
7“सुनानं थः जःलाखःलायात धिबा वा बसजाः तयेबियातःबलय् खुया यंकाः खुँयात ज्वन धाःसा खुं उकिया निदुगं पलेसा पुलेमाः। 8खुँ ज्वने मफुत धाःसा छेँथुवाःनं तयेबियातःम्हय्सिगु बसजालय् ल्हाः तःगु दु ला कि मदु धकाः स्वयेत न्याय याइम्हसिथाय् वनेमाः।
9“सम्पत्तियागु खँय् जुइगु न्ह्यागु कथंयागु कचिंगः थजु, चाहे द्वहंयागु खँय् थजु, फैयागु खँय् थजु, चाहे वसःयागु खँय् थजु वा मेगु छुं नं सम्पत्तियागु खँय् थजु निम्हय्सिनं नं वं नं ‘जिगु’ वं नं ‘जिगु’ धाल धाःसा निम्हं न्याय याइम्हय्सिथाय् वनेमाः। न्याय याइम्हय्सिनं सुयागु दोष क्यनी वं थः जःलाखःलायात निदुगं पुलेमाः।
10“सुनानं थः जःलाखःलायात गधा, द्वहं, फै वा छुं नं पशु तयेबियातःबलय् सुनानं मसीक सित, घाःपाः जुल वा सुनानं लाका यंकल धाःसा 11अले निम्हय्सिया दथुइया थ्व ल्वापु उम्ह जःलाखःलां मेम्ह मनूयागु पशु जिं खुयागु मदु धकाः परमप्रभुया न्ह्यःने वनाः पाफयाः ल्वापु मिलय् यायेमाः। अले पशु तयातःम्हय्सिनं छुं नं पलेसा पुलेम्वाः। 12जःलाखःलां खुया काःगु हे खःसा वं पशुया थुवाःयात पलेसा पुलेमाः। 13पशुयात गुँपशुत स्यानाब्यूगु खःसा साक्षीया निंतिं क्वँय् हयेमाः। अले पशु तयातःम्हय्सिनं पलेसा पुलेम्वाः।
14“सुनानं थः जःलाखःलायाके पशु त्यायेकयाहयाः वया थुवाः न्ह्यःने मदुबलय् घाःपाः जुल वा सित धाःसा त्यायेकयाहःम्हय्सिनं वयागु पलेसा पुलेमाः। 15पशुया थुवाः नापं दुसा पलेसा पुलेम्वाः। त्यायेकयाहःम्ह पशु जूसा पशुया बाः जक पुसा गाः।
छु याये त्यः छु याये मत्यः
16“सुनानं सुंनाप नं क्वःछिना मतःम्ह मिसामचायात हेय्काः स्यंकाबिल धाःसा वं भम्चाया मू पुलाः व मिसामचालिसे ब्याहा यायेमाः।#व्य २२:२८-२९ 17छुं जुयाः मिसामचाया बौनं वयात थः म्ह्याय् बी मखु धाल धाःसा वं भम्चाया मू पुलेमाः।
18“तन्त्रमन्त्र सःम्ह मिसायात म्वाये बी मते।#व्य १८:१०-११
19“सुं नं मनुखं पशुनाप मत्यःगु ज्या यात धाःसा वयात स्याना छ्वयेमाः।#लेवी १८:२३; २०:१५-१६; व्य २७:२१
20“सुनां परमप्रभु बाहेक मेपिं द्यःतय्त बलि छाइ, वयात नाश यायेमाः।#व्य १७:२-७
21“पिनेंवःपिन्त बांमलाःगु व्यवहार याये मते, इमित क्वत्यले मते, छाय्धाःसा छिपिं नं मिश्र देशय् अथे हे जुयाः च्वनेधुंकूपिं खः।#प्रस २३:९; लेवी १९:३३-३४; व्य २४:१७-१८; २७:१९
22“भाःत सीम्ह मिसा व मांबौ मदुम्ह मचापाखें लबः कायेगु ज्या याये मते। 23छुं जुयाः छिमिसं अथे यात, अले इमिसं जितः ग्वाहालिया निंतिं प्रार्थना यात धाःसा जिं इमिगु प्रार्थना धात्थें न्यने। 24जितः तं पिहां वइ। जिं छिमित तरवारं स्याये। छिमि कलाःपिनि भाःत दइ मखु छिमि काय् म्ह्याय्पिनि बौ दइ मखु।
25“छिमिथाय् च्वंपिं मगाःमचाःपिं जिमि मनूतय्त छिमिसं त्यासा बीबलय् साहुतय्सं थें याये मते, इमिके ब्याज काये मते।#लेवी २५:३५-३८; व्य १५:७-११; २३:१९-२० 26छिमिसं थः जःलाखःलायागु गा बरः कथं तयागु दुसा निभाः बी न्ह्यः लितब्यु।#व्य २४:१०-१३ 27छाय्धाःसा वयाके थःगु म्ह त्वपुयेत छपु हे जक गा दु। मखुसा वं छु फायाः द्यनी? वं जितः प्रार्थना यात धाःसा जिं वयागु प्रार्थना न्यने। छाय्धाःसा जि माया याइम्ह खः।
28“परमेश्वरयात क्वह्यंके मते, अले छिमि मनूतय् शासकतय्त नं सराः बी मते।#प्रे २३:५
29“जितः थःगु बुँयागु बाली व दाखरस छायेत लिबाके मते।
“छिमिसं थःपिनि न्हापां बूपिं काय्पिं जिगु निंतिं फ्यायेमाः।
30“छिमिसं थःपिनि सा व फैच्वलय्या न्हापां बूपिं मस्तय्त नं अथे हे या। न्हय्न्हु तक इपिं थः मांलिसे च्वनी, च्यान्हु खुन्हु जितः छा।
31“छिपिं जिमि पवित्र मनू जुइ। उकिं छिमिसं जंगली पशुतय्सं स्याःम्ह पशुयागु ला नये मते, वयात छिमिसं खिचातय्त वान्छ्वया ब्यु।”#लेवी १७:१५
Currently Selected:
प्रस्थान 22: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
