एस्तर 9
9
यहूदीतय्सं थः शत्रुतय्त नाश याःगु
1झिंनिला अर्थात अदार लाया झिंस्वन्हु खुन्हु जुजुयागु उजं पूवंकीगु दिं वल। उखुन्हु हे यहूदीतय् शत्रुतय्सं इमित थःगु अधिकारय् हयेगु आशा याःगु खः। तर उकिया अखः इमित घृणा याइपिं यहूदीतय्सं इमित अधिकार याइगु जुल। 2उखुन्हु इमित सत्यानाश यायेत स्वःपिन्त हय्कायेत यहूदीत जुजु अहासूरसया फुक्क प्रान्तय् थथःगु शहरय् छथाय् मुन। इमित सुनानं विरोध याये मफुत छाय्धाःसा मेगु फुक्क जातियापिं मनूत इपिं खनाः ग्यात। 3अले इमिके मोर्दकैया भय दुगुलिं मन्त्रीत, प्रान्त प्रान्तयापिं बडा-हाकिमत, देशया थीथी जातियापिनि नायःतय्सं यहूदीतय्त ग्वाहालि यात। 4मोर्दकै दरबारयाम्ह छम्ह मू मनू जुल अले वया शक्ति व मान अप्वया वन अले वया नां फुक्क प्रान्तय् बय्बय् जुल।
5अनंलि यहूदीतय्सं थः फुक्क शत्रुतय्त हमला यात अले तरवारं स्यानाः नाश यानाबिल। अले इमिसं थः शत्रुतय्त थःयत्थें यात। 6राजधानी शूशन शहरय् यहूदीतय्सं न्यासः मिजं मनूतय्त स्यानाः नाश यात। 7इमिसं पर्शन्दाता, दल्फोन, अस्पाता, 8पोरात, अदलिया, अरीदाता, 9पर्मशता, अरीशै, अरीदै व बैजाता, 10हम्मदाताया काय् यहूदीतय् शत्रु हामानया उपिं झिम्ह काय्पिं नं स्यानाबिल। अय्नं इमिगु धन-सम्पत्ति लुतय् मयाः।
11उखुन्हु हे राजधानी शूशनय् स्याःपिं मनूतय्गु ल्याः जुजुयात न्यंकल। 12अले जुजुं रानी एस्तरयात धाल, “यहूदीतय्सं राजधानी शूशनय् न्यासः मनूतय्त व हामानया झिम्हं काय्पिन्त स्यानाः नाश याःगु दु। जुजुया मेगु प्रान्तय् इमिसं छु छु यात जुइ? आः हाकनं छंगु मेगु छुं बिन्ति ल्यंदनि ला? जितः धा व जिं पूवंकाबी, छं छु फ्वने मास्ति वः फ्वँ व छन्त बी।”
13एस्तरं जुजुयात लिसः बिल, “छसपोलया इच्छा दु धइगु खःसा थौं उजं बियादी थें कन्हय् नं थथे हे यानाः शूशनय् यहूदीतय्सं याये दयेमाः धकाः मन्जुरी बियादिसँ। अले हामानया उपिं झिम्हं काय्पिनिगु सीम्ह फांसि बीगु थामय् यख्खाये दयेमा।”
14अले जुजुं अथे हे या धकाः उजं बिल। शूशनय् जुजुया उजं घोषणा यात अले हामानया झिम्हं काय्पिनिगु सीम्ह फांसि बीगु थामय् यख्खायाबिल 15अदार लाया झिंप्यन्हु खुन्हु हाकनं यहूदीत छथाय् मुनाः शूशनय् स्वसः ति मनूत स्यात। तर उबलय् नं इमिसं लुतय् मयाः।
16थुबलय् हे जुजुया प्रान्त प्रान्तय् ल्यंदनिपिं यहूदीत थः शत्रुतपाखें थःत बचय् यायेत फुक्क प्रान्तय् थथःगु शहरय् छथाय् मुन। इमिसं न्हयेन्याद्वः मनूत स्यात। तर इमिसं लुतय् मयाः। 17थ्व धाःसा अदार लाया झिंस्वन्हुया दिं स्याःगु खः। अले झिंप्यन्हु खुन्हुया दिंनय् इमिसं आराम काल अले व दिं इमिगु निंतिं छगू नखः व लसताया दिं जुल।
पूरीम नखः
18शूशनया यहूदीतय्सं धाःसा व लाया झिंस्वन्हु खुन्हु व झिंन्यान्हु खुन्हु सकलें छथाय् मुन। अले झिंन्यान्हुया दिंखुन्हु आराम काल। व दिं नखः व लसताया दिं जुल। 19अथे जुयाः तापाक गामय् च्वनिपिं यहूदीतय्सं अदार लाया झिंप्यन्हुया दिंखुन्हु लसता व नखः हन। अले उखुन्हु इमिसं छम्हय्सिनं मेम्हय्सित कोसेलि बीगु यात।
20मोर्दकैनं धाःसा थुपिं फुक्क खँ च्वयाः ल्याःचाः तल, अले जुजु अहासूरसया लिक्क व तापाक्क लाःगु फुक्क लागाय् च्वंपिं यहूदीतय्त थथे पौ च्वायाछ्वत, 21दँय् दँसं अदार लाया झिंप्यन्हु खुन्हु व झिंन्यान्हु खुन्हु लसताया नखः हनेगु या। 22उबलय् यहूदीतय्त थः शत्रुपाखें बचय् जुयाः न्हूगु जीवन दुगुलिं इमिगु दुःखपाखें खुशी व लसताय् हिउगु दु धकाः नं च्वल। अले इमिसं उपिं दिंखुन्हु लसताया नखःकथं छम्हय्सिनं मेम्हय्सित नयेगु नसा बीगु व नये मखंपिन्त नं कोसेलि बीगु दिंकथं हनय् यायेमाः धकाः वं च्वल।
23थुकथं मोर्दकैनं च्वःगु पौकथं शुरु याःगु थिति न्ह्याबलें हनेत यहूदीत मानय् जुल। 24यहूदीतय् शत्रु अगाग वंशयाम्ह हम्मदाताया काय् हामानं यहूदीतय्त नाश यायेगु दिं पक्का यायेत चिट्ठा तःगु खः। थुकियात “पुर” (अथवा चिट्ठा) धाइगु खः। 25जुजुं थ्व खँ सीवं यहूदीतय्गु विरोधय् हामानं याःगु मभिंगु ज्यात वयागु हे छेनय् तयेत व वया काय्पिन्त फांसिया थामय् यख्खायेत जुजुं च्वयाः उजं बिल। 26(अथे जुयाः व दिंयात “पूर” खँग्वः कथं “पूरीम” धाइगु खः) व पती च्वयाकथं व थ्व खँयात कयाः व इमिसं खंगु व इमित जूगु खं यानाः, 27यहूदीतय्सं थः सन्तान व इपिं मिलय् जूपिन्त थुपिं निन्हु नखःचखः दँय्दसं क्वःछिनातःगु बिधिकथं पक्का यानातःगु दिंनय् हे मानय् यायेगु धकाः बचं बिल। 28अले पुस्तां पुस्ता तक फुक्क घराना व परिवारं फुक्क प्रान्त व शहरय् यहूदीतय् दथुइ पूरीमया दिंया नखः हनेमाः। अले थुकिया लुमन्ति इमि सन्तानतय् दथुइ गुबलें मदीमाः धकाः पक्का यात।
29अथे जुयाः अबीहेलया म्ह्याय् रानी एस्तरं व यहूदी मोर्दकैनं पूरीमया खँय् निगूगु पौ च्वयाः अधिकारकथं पक्का यात। 30थथे जुयाः यहूदी मोर्दकैनं जुजु अहासूरसया सच्छि व निइन्हय्गु प्रान्तय् शान्ति व सुरक्षाया भिंतुना बियाः फुक्क यहूदीतय्त पौ च्वयाछ्वत। 31उकी यहूदीतय्त गथे इमिसं अपसं व विलापया नियमत मानय् याना वयाच्वंगु खः, अथे हे इपिं व इमि सन्तानतय्सं पूरीमया दिंत नं मानय् या धकाः उजं ब्यूगु दु। मोर्दकै व एस्तर रानी निम्हाय्सिनं अथे उजं ब्यूगु खः। 32पूरीमया निंतिं थुपिं नियमत एस्तरं उजं पक्का यात अले उपिं फुक्क खँत छगू सफुलिइ च्वयाः ल्याःचाः तल।
© 2024 Nepal Bible Society, Newa Christian
Literature Center and Wycliffe Bible Translators, Inc.