प्रेरित 15
15
यरूशलेमय् सभा याःगु
1अबलय् यहूदियां सुं विश्वासीतय्सं एन्टिओखियाय् वयाः मण्डलीइ च्वंपिन्त थथे धकाः स्यन – “मोशां ब्यूगु व्यवस्थाय् च्वया तः थें म्हय् चिं मतय्कूसा छिमिगु उद्धार जुइ फइ मखु।”#लेवी १२:३ 2इमिसं थथे धकाः स्यंगुलिं पावल व बारनाबासं थ्व खँय् इपिं लिसे तसकं जवाःसवाः यात। लिपा पावल, बारनाबास व अनं सुं विश्वासीतय्त यरूशलेमय् छ्वयेगु, अले प्रेरितत व थकालिपिं लिसे थुकियात कयाः खँ ल्हायेगु क्वःछित। 3एन्टिओखियाय् च्वंगु मण्डलीयापिन्सं इमित अनं बिदा बिल। अले इपिं फोनिके व सामरिया जुयाः वन। अन च्वंपिं विश्वासीतय्त इमिसं यहूदीमखुपिं मनूतय्सं नं विश्वास याःगु खँ कन। थ्व खँ न्यनाः इपिं तसकं लय्ताल।
4यरूशलेमय् थ्यंबलय् अन च्वंगु मण्डलीयापिन्सं, प्रेरिततय्सं व थकालिपिन्सं इमित लसकुस यात। अले इमित परमेश्वरं यानादीगु फुक्क खँ कन। 5अय्नं सुं फरिसी विश्वासीतय्सं दनाः थथे धाल – “यहूदीमखुपिन्सं म्हय् चिं तय्केमाः, अले मोशायागु व्यवस्था नं मानय् यायेमाः।”
6थ्व खँय् सल्लाह यायेत प्रेरितत व थकालिपिं छथाय् मुन। 7ताःहाकय्क खँल्हाबल्हा जुइ धुंकाः पत्रुसं दनाः धाल – “दाजुकिजापिं, यक्व दँ न्हापा यहूदीमखुपिन्त नं भिंगु खँ न्यंकाः विश्वास याकेत परमेश्वरं छिकपिनिगु दथुं जितः ल्ययादिल। थ्व ला छिकपिन्सं सि हे स्यू।#प्रे १०:१-४३ 8मनूतय्गु नुगलय् च्वंगु खँ स्यूम्ह परमेश्वरं झीत थें इमित नं पवित्र आत्मा बियाः इपिं नं विश्वासी जुइ ज्यू धकाः क्यनादिल।#प्रे २:४; १०:४४ 9थुकथं वय्कलं झीपिं व इपिं छुं नं मपाः धकाः क्यनादिल। विश्वासं यानाः झीगु थें इमिगु नुगः नं यचुक सिलादिल। 10अय्सा झीसं व झी तापाःबाज्यापिन्सं क्वबी मफुगु कुयात चेलातय्त क्वबिकाः छाय् परमेश्वरयागु मन स्वयेगु? 11गथे झीसं प्रभु येशूयात विश्वास यानाः झीपिं वय्कःयागु दया मायां बचय् जुल, अथे हे इपिं नं बचय् जूगु दु।”
12अले फुक्कं सुम्क च्वन। परमेश्वरं यहूदीमखुपिन्थाय् अजू चायापुगु चिं व ज्या यानादिल धकाः पावल व बारनाबासं कंगु खँ नं इमिसं ध्यान बियाः न्यनाच्वन।
13इमिसं नवाये धुंकाः याकूबं धाल – “दाजुकिजापिं, जिगु खँ न्यनादिसँ। 14परमेश्वर हे यहूदीमखुपिन्थाय् झायाः इमित थः मनूत यानादिल धकाः सिमोनं धाये हे धुंकल। 15थ्व खँ ला अगमवक्तातय्गु खँ नाप नं मिलय् जू। न्यनादिसँ, थथे च्वयातःगु दु –
16“‘अनंलि जि लिहां वने,
अले दाऊदयागु दुना वंगु छेँ
हानं दय्काबी।
स्यंगु भिंका बी।
17अले मेपिं फुक्क मनूत,
अज्ज ला जिं थः मनूत यायेत सःतापिं
यहूदीमखुपिं मनूतय्सं तक नं
परमेश्वरयात माली।
18परमप्रभुं धयादीगु थ्व खँ,
न्हापांनिसें हे धयावयाच्वंगु खः।’”#आमो ९:११-१२; यशै ४५:२१
19“अय्जूगुलिं परमेश्वरपाखे स्वया वःपिं यहूदीमखुपिन्त झीसं दुःख बी मज्यू धयागु जिगु धापू दु। 20अथे खःसां इमित मूर्ति पुजायागु प्रसाद नये मते, व्यभिचार याये मते, हि मम्हुकुसे स्याःगु ला नये मते, छुकियागुं हि त्वने मते धकाः च्वःसा बांलाइ।#प्रस ३४:१५-१७; लेवी १७:१०-१६; १८:६-२३ 21न्हापांनिसें शहर पतिकं धर्मशास्त्र स्यनीगु छेँय् विश्रामबार पतिकं मोशायागु व्यवस्था ब्वनाः न्यंका वयाच्वंगु दु।”
च्वःगु पौ
22अले प्रेरितत, थकालिपिं व मण्डलीयापिं फुक्कसिनं जानाः यहूदा धाःम्ह बारसाबास व सिलासयात ल्ययाः इमित पावल व बारनाबास नाप एन्टिओखियाय् छ्वयेगु क्वःछित। 23जिमित थथे पौ च्वया बियाछ्वल –
“थनच्वंपिं प्रेरितत व थकालिपिनिपाखें एन्टिओखिया, सिरिया व किलिकियाय् च्वंपिं यहूदीमखुपिं दाजुकिजापिन्त ज्वजलपा दु।
24“जिमिगु पुचलं पिहांवःपिं सुं मनूतय्सं छिकपिन्त म्वाःमदुगु खँ ल्हानाः दुःख बियाः मन स्यंकेत स्वल धकाः जिमिसं न्यना। इमित जिमिसं छ्वयाहयागु मखु। 25अय्जूगुलिं थन च्वंगु मण्डलीयापिं फुक्कं मुनाः निम्ह मनूयात ल्ययाः झी यःपिं पावल व बारनाबास नाप छ्वयाहयेगु भिं ताल। 26पावल व बारनाबासं झी प्रभु येशूयागु निंतिं ज्यान तकं पात। 27जिमिसं यहूदा व सिलासयात छिकपिन्थाय् छ्वयाहया च्वना, इमिसं नं थ्व हे खँ छिकपिन्त कनी।
28“मयासें मगाःगु ला याये हे माल, थ्व बाहेक छिकपिन्त मेगु म्वाःमदुगु कु क्वमबीकेगु हे जिमित व पवित्र आत्मायात भिं ताल। 29अय्नं छिकपिन्सं मूर्ति पुजायागु प्रसाद नये मते, छुकियागुं हि त्वने मते, हि मम्हुकुसे स्याःगु ला नये मते, अले व्यभिचार याये मते। थुलि जक छिकपिन्सं होश यानाः मयात धाःसा गाः। छिकपिनिगु भिं जुइमा।”
30थथे मण्डलीं छ्वःपिं मनूत एन्टिओखियाय् वन। अले अन च्वंपिं विश्वासीतय्त मुंकाः इमिसं व पौ लःल्हाना बिल। 31साहस बियाः च्वयातःगु व पौ ब्वनाः इपिं फुक्कं लय्ताल।
32हानं यहूदा व सिलास थः हे अगमवक्तात जूगुलिं इमिसं अन च्वंपिं विश्वासीतय्त यक्व खँ धयाः साहस बियाः बल्लाकल। 33तःन्हु तक च्वने धुंकाः अन च्वंपिं विश्वासीतय्सं इमित याउँक बिदा बियाः यरूशलेमया मण्डली छ्वल। 34सिलासं धाःसा अन हे च्वनेगु क्वःछित। 35पावल व बारनाबास मेपिंनापं प्रभुयागु खँ न्यंका जुयाः एन्टिओखियाय् हे च्वन।
पावल व बारनाबास बाःगु
36छुं दिं लिपा पावलं बारनाबासयात धाल – “झीसं प्रभुयागु खँ न्यंका वयागु शहर पतिकं हानं वनाः अन च्वंपिं विश्वासीत छु छु यानाच्वन स्वःवनेनु।” 37बारनाबासं मर्कूस धाःम्ह यूहन्नायात थःपिं नाप ब्वनायंकेत स्वल। 38न्हापा प्रभुयागु खँ न्यंका जूबलय् व इमित पामफिलियाय् त्वःताः लिहां वंगुलिं पावलं वयात ब्वना मयंकेगु खँ ल्हात।#प्रे १३:१३ 39थुकिं यानाः इमि दथुइ कचकच जुल। अले इपिं निम्हं बायावन। बारनाबास मर्कूसयात ब्वनाः साइप्रसपाखे वन। 40पावलं थःनाप वनेत सिलासयात ल्यल। अन च्वंपिं दाजुकिजापिनिगु आशिष कयाः इपिं बिदा जुयाः वन। 41इमिसं सिरिया व किलिकिया जुयावंबलय् मण्डली पतिकं वनाः विश्वासीतय्त विश्वासय् बल्लाका थकल।
Currently Selected:
प्रेरित 15: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
