१ शमूएल 4
4
1अनंलि शमूएलया वचन सकल इस्राएलीतय्गु निंतिं वल।
पलिश्तीतय्सं बाचाया सनू थःगु कब्जाय् काःगु
इस्राएलीत पलिश्तीतय्नापं लडाइँ यायेत न्ह्यज्यात। अले इस्राएलीतय्सं एबेन-एजेरय् व पलिश्तीतय्सं धाःसा अपेकय् थथःगु पाल ग्वल। 2पलिश्तीतय्सं इस्राएलीतय् नापं लडाइँ यायेत सिपाइँत थाय् थासय् तल। अले इमिगु दथुइ ताहाकःगु लडाइँ जुल अले इमिसं प्यद्वः ति इस्राएली मनूत लडाइँया ख्यलय् हे स्यानाबिल थथे पलिश्तीतय्सं इस्राएलीतय्त बुकल। 3लडाइँलय् बचय्जूपिं सिपाइँत लिहांवये धुंकाः इस्राएलया थकालितय्त धाल, “थौं झीत परमप्रभुं छाय् पलिश्तीतय्पाखें बुकादीगु? वय्कः झीपिं नापं हे झायादीमा अले झी शत्रुतय्गु ल्हातं झीत बचय् यानादीमा धकाः परमप्रभुया बाचाया सनू शीलोपाखें हयेनु।”
4अथे जुयाः इमिसं शीलोय् मनूत छ्वल अले करूबतय् दथुइ च्वनादीम्ह दक्व शक्ति दुम्ह परमप्रभुया बाचाया सनू हल। एलीया निम्ह काय्पिं होप्नी व पीनहास नं व सनू नापं हे वल।
5बाचाया सनू छाउनिइ थ्यनेवं फुक्क इस्राएलीत ततःसलं हालहल। गुकिं यानाः पृथ्वी हे लिगिलिगि सन। 6पलिश्तीतय्सं नं व सः ताल अले इमिसं धाल, “हिब्रूतय्गु छाउनीइ थथे ततःसलं छाय् हाला हःगु?”
अले इमिसं परमप्रभुया बाचाया सनू हिब्रूतय्गु पालय् थ्यंके हल धकाः सीकल। 7पलिश्तीत तसकं ग्यानाः थथे धाल, “इमिगु छाउनिइ द्यः दुहां वःगु दु! आः झीत बांलाइ मखुत! थथे जूगु ला न्हापा गुबलें नं मखंनि। 8आः झीगु भिं जुइ मखुत! सुनां झीत उपिं दकलय् तःधंपिं द्यःतपाखें बचय् याइ? मिश्रीतय्त थीथी कथंया महामारी हयाः मरुभूमिइ नाश याःपिं थुपिं हे द्यःत खः। 9हे पलिश्तीत, बल्ला व साहसी जु! तसकं बल्लाःपिं मनूतय्सं थें ज्या या, मखुसा गथे झीसं हिब्रूतय्त दास दासी यानागु खः अथे हे झीपिं हिब्रूतय्गु दास दासी जुइमाली। तसकं बल्लाःपिं मनूतय्सं थें लडाइँ या!”
10थुकथं पलिश्तीतय्सं थःपिनिगु तःधंगु बलं लडाइँ यात अले इस्राएलीतय्त बुकल। अले इस्राएलीत फुक्कं थथःगु पालय् बिस्युं वन। थुपालय् यक्वः मनूत स्यात। स्विद्वः इस्राएली सिपाइँत स्यात। 11अले पलिश्तीतय्सं परमेश्वरया बाचाया सनू थःपिनिगु कब्जाय् कयाः एलीया निम्ह काय्पिं होप्नी व पीनहासयात नं स्यात।
एली सीगु
12उखुन्हु बेन्यामीन कुलया छम्ह मनू लडाइँ जूगु थासं ब्वांय् वयाः शीलोय् थ्यंकवल। वं थःगु दुःख क्यनेत थःगु लं खुनाः छेनय् धू बुलातःगु दु। 13एली धाःसा परमप्रभुया बाचाया सनूया निंतिं तसकं धन्दा कयाच्वन। अले लँसिथय् थः च्वनेगु थासय् च्वनाः त्वलय् जुयाच्वन। व मनुखं शहरय् न्यंकभनं खबर थ्यंकल, अले फुक्क मनूत ग्यानाः तसकं हाला हल।
14थ्व सः तायाः एलीं न्यन, “थ्व छुकिया हाःसः खः?” खबर न्यंकेत हथाय् चाचां व मनू एलीयाथाय् वल। 15एली गुइच्यादँ दये धुंकूम्ह खः अले वया मिखा नं मछुइ धुंकल। 16व मनुखं धाल, “जि लडाइँनं बिस्युं वयाम्ह खः। थौं छिथाय् तक नं थ्यंकः वया।” एलीं न्यन, “हे जिमि काय्, छु जुल?”
17व खबर ज्वनावःम्ह मनुखं लिसः बिल, “इस्राएलीत पलिश्तीतपाखें बिस्युं वन। थ्व झीगु निंतिं तसकं ग्यानापुगु बूगु खँ खः। थुलि जक मखु छिकपिनि काय् होप्नी व पीनहासयात स्यानाः परमेश्वरया बाचाया सनू नं लाकायंकल।”
18व मनुखं परमेश्वरया बाचाया सनूया बारे खँ ल्हाःबलय् एली ध्वाखाया लिक्कसं दुगु थः च्वनाच्वनागु थासं लिउनेपाखे ग्वार्तु वन। व बुरा जुइ धुंकूम्ह व तसकं ल्ह्वंगुलिं ककु लद्यानाः सित। व पिइदँ तक इस्राएलीतय् नायः जुइ धुंकूम्ह खः।
पीनहासया कलाः सीगु
19एलीया भौ पीनहासया कलाः प्वाथय् दुम्ह खः, अले वया मचाबुइगु ई वये धुंकूगु खः। वं परमेश्वरया बाचाया सनू लाकायंकूगु अले थः ससःबौ सीगु व थः भाःत सीगु खँ न्यँसेंलि वया मचाबुइ बेथा जुल, अले मचा बुइकल। 20व ब्यथा जुयाः सी थें च्वंबलय् वयात सुसाःकुसाः याइपिन्सं वयात धाल, “साहस या! छं काय् बूगु दु!” तर वं थ्व खँय् वास्ता नं मयाः अले लिसः नं मब्यू।
21मचाया नां ईकाबोद#४:२१ ईकाबोद थुकिया अर्थ महिमा मदयावन तयाः वं थथे धाल, “इस्राएलपाखें परमेश्वरया महिमा तनावंगु दु।” थुकथं वं परमेश्वरया बाचाया सनू लाकायंकूगु अले थः ससःबौ व भाःतयात स्याःगु खँ प्वंकल। 22वं धाल, “परमेश्वरया महिमां इस्राएलीतय्त त्वःता वंगु दु छाय्धाःसा परमेश्वरया बाचाया सनू लाकायंकूगु दु।”
Currently Selected:
१ शमूएल 4: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
