१ शमूएल 27
27
पलिश्तीतय्गु दथुइ दाऊद
1दाऊदं थथे बिचाः यात, “छन्हु ला छन्हु शाऊलं जितः स्या हे स्याइतिनि। अथे जुयाः पलिश्तीतय्गु लागाय् बिस्युं वनेगु हे जितः बांलाइ। अले शाऊलं जितः इस्राएलय् दक्व थासय् मालेगु त्वःती। थुकथं जि वयागु ल्हातं बचय् जुइ।”
2अथे जुयाः दाऊद व वया खुसः मनूत माओकया काय् गातया जुजु आकीशयाथाय् वन। 3दाऊदं थः मनूत व इमि परिवारत, थः निम्ह कलाः यिजरेली अहीनोम व कर्मेलयाम्ह सी धुंकूम्ह नाबालया कलाः अबीगेलयात ज्वनाः आकीशनापं गातय् च्वनेत वन। 4दाऊद गातय् बिस्युं वन धकाः शाऊलयात कनाबिल, अले शाऊलं दाऊदयात मालेगु त्वःतल।
5दाऊदं आकीशयात धाल, “छिसं थः दासयात यय्कागु दु धइगु खःसा छिगु देशय् जिपिं च्वनेत छगू शहर बियादिसँ। छाय् जि छिकपिनि दास राजधानीइ छिनापं च्वनेगु?”
6अथे जुयाः आकीशं उखुन्हु वयात सिक्लग शहर बिल। आः तक नं व यहूदीतय् जुजुपिनिगु शहर खः। 7दाऊद पलिश्तीतय्गु देशय् दच्छि व प्यला तक च्वन।
8दाऊद व वया मनूत हमला याः वनीगु अले गशूरीत, गिज्रीत व अमालेकीतय्त लुतय् याइगु। इपिं न्हापांनिसें हे शूर व मिश्रय् थ्यंकाच्वनाः च्वंपिं खः। 9दाऊदं देय्त लुतय् याइबलय् वं मिजं वा मिसा सुयातं म्वाका तइ मखु। अले वं फै-च्वलय् व सा-द्वहंत, गधा व ऊँट व वसःत नं यंकाः आकीशया थासय् तुं लिहां वइगु खः।
10आकीशं वयात थथे धकाः न्यनेगु, “थौं छं गन लुतय् यानाहया?” अले वं थथे धाइगु, “यहूदाया नेगेव देशय्” वा “यरहमेलीतय्थाय् वा केनीतय्गु नेगेव देशय्।” 11दाऊदं म्वाःपिं सुं नं मिजं वा मिसात गातय् मह छाय्धाःसा सुं मनूयात म्वाकातःसा वं आकीशयात जिं छु यात व कनाबी फु धकाः वं बिचाः यात। पलिश्तीतनापं च्वनाच्वंतले वयागु पहःचहः थथे हे खः। 12तर आकीशं दाऊदयात पत्याः यानाः थथे धाल, “व थः इस्राएली मनूतय्गु न्ह्यःने तसकं मभिंम्ह जूगु दु, अथे जुयाः व जिवंकाःछि जिगु दास जुयाच्वनी।”
Currently Selected:
१ शमूएल 27: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
