१ शमूएल 24
24
दाऊदं शाऊलयात मस्यासे त्वःताब्यूगु
1शाऊल पलिश्तीतनापं लडाइँ यानाः लिहां वये धुंकाः इमिसं धाल, “स्वयादिसँ, दाऊद एन-गदीया मरुभूमिइ दु।” 2अथे जुयाः शाऊलं फुक्क इस्राएलीतपाखें ल्ययातःपिं बल्लाःपिं स्वद्वः सिपाइँत ज्वनाः गुँदुगु च्वनीगु ल्वहंधीया पुर्बय् दाऊद व वया मनूतय्त मालेत वन।
3वँवं लँपुइ लाःगु फैगलय् थ्यन, अन छगू गुफा नं दुगु जुयाच्वन। व हे गुफाया कुन्चाय् थ्यंक दाऊद व वया मनूत सुलाच्वंगु खः। शाऊल व गुफाय् झारा च्वनेत दुहां वन।
4दाऊदया मनूतय्सं वयात धाल, “थ्व व हे न्हि खः गुकिया बारे परमप्रभुं धयादिल। वय्कलं छि शत्रुत छिगु ल्हातय् लःल्हानादी, अले इमित छिं छु याये यः याये फु।” शाऊलं मचाय्क दाऊदं चिसकं क्वछुनाः वनाः वय्कःया गाया च्वः चानाबिल।
5तर दाऊदं शाऊलयागु गाया च्वः चाःगुलिं वया विवेकं थःत दोष बियाच्वन। 6अले वं थः मनूतय्त धाल, “परमप्रभुं जुजु अभिषेक यानादीम्ह जिम्ह मालिकयात जिं थःगु ल्हाः ल्ह्वने म्वालेमा। परमप्रभुं हे बचय् यानादीमा छाय्धाःसा व परमप्रभुया अभिषेक जूम्ह खः। जिं वयागु छुं भतिचा नं हानि याये म्वालेमा।” 7अले दाऊदं थः मनूतय्त “शाऊलयात हमला याये मते” धकाः पन।
शाऊल दनाः गुफां पिहां वयाः थःगु लँपु जुयावन।
8अनंलि दाऊद नं गुफां पिहां वयाः शाऊलयात थथे धकाः सःतल, “हे जिमि प्रभु, महाराज।” शाऊलं लिफः स्वल। अले बँय् भ्वःसुलाः दाऊदं 9शाऊलयात थथे धाल, “जिं छितः हानि याइन धकाः मनूतय्सं धाल धायेवं छिं इमिगु खँ न्यने ज्यू ला? 10थौं छपिन्सं हे खंगु दु गुफाय् दुने परमप्रभुं छितः जिगु ल्हातय् लःल्हानादीगु। जिमि गुलिखय् मनूतय्सं छितः स्यायेमाः धकाः धाःगु दु अय्नं जिं छितः मस्यासे त्वःताबिया। अले जिं धया, ‘जिं थःगु ल्हाः जिमि मालिकया विरोधय् ल्ह्वने मफु छाय्धाःसा वय्कः परमप्रभुया अभिषेक जूम्ह खः।’ 11स्वयादिसँ! हनेबहःम्ह अबु, जिगु ल्हातय् दुगु थ्व छिगु हे गाया कुचा खः। स्वयादिसँ! जिं व जक चाना, छितः मस्याना। थुकिं हे छिसं सीकादिसँ, छिगु विरोधय् विद्रोह यायेगु अले छितः मभिं यायेगु नं मति मतया। जिं छिगु छुं हे मभिं मयाना। अय्नं छिं जितः स्यायेत लिनाजुल।
12“झीपिं निम्हय्सियागु दथुइ परमप्रभुं हे न्याय यानादीमा। छिसं जिगु विरोधय् यानादीगु ज्याया निंतिं परमप्रभुं हे छितः बदला कयादीमा। अय्नं जिं धाःसा थःगु ल्हाः छिगु विरोधय् गुब्सं ल्ह्वने मखु। 13न्हापा थथे धयातःगु उखान छिसं सी हे स्यू ‘मभिंम्ह मनूपाखें मभिंगु हे पिहां वइ।’ अथे जुयाः जिं थःगु ल्हाः छिगु विरोधय् ल्ह्वने मखु।
14“इस्राएलया जुजु सुयागु विरोधय् दनावइ? छिसं सुयात लिनाच्वनागु दु? छम्ह सीम्ह खिचा, छम्ह कुसियात मखु ला? 15परमप्रभुं हे झीगु न्याय यानादी अले झीपिं निम्ह मध्ये सु ठीक जू अले सुयाके दोष दु धकाः फैसला यानादी। वय्कलं हे थुकिया जाँच यानादीमा अले जितः बचय् यानाः जि खःम्ह मनू खः धकाः थहरय् यानादीमा।”
16दाऊदं थथे धाये धुंकाः शाऊलं धाल, “छु छ धात्थें व हे खः ला, जिमि काय् दाऊद?” अले वं मिखां ख्वबि वय्कल। 17अनंलि वं दाऊदयात धाल, “छ ला जि स्वयाः नं भिंम्ह जुल, जिं छन्त मभिंगु व्यवहार याःसां तक नं छं जितः भिंगु व्यवहार हे यात। 18खः, छं थौं जितः छ जि प्रति गुलि भिंम्ह खः व क्यन। परमप्रभुं जितः छंगु ल्हातय् लःल्हानादिल अय्नं छं जितः मस्याः। 19सु मनुखं थः शत्रुयात नापलाकाः वयात छुं मयासें त्वःताछ्वइ ला? अथे जुयाः थौंयागु न्हिइ छं जि प्रति छु याःगु दु परमप्रभुं उकिया पलेसा छन्त तःधंगु इनाम बियादीमा। 20आः जिं छ हे पक्का जुजु जुइत्यंगु दु धकाः सिल। अले इस्राएलया राज्य छंगु ल्हातं हे शासन याइ। 21अथे जुयाः जिमि परिवारयात स्याये मखु अले जिगु नां जिमि अबुया घरानापाखें हुयाछ्वये मखु धकाः परमप्रभुया नामं छं पाफयाः धा।”
22अथे जुयाः दाऊदं शाऊलनापं अथे हे याये धकाः पाफल। अले शाऊल छेँ लिहां वन। दाऊद व वया मनूत धाःसा थः सुलाच्वंगु सुरक्षित थासय् तुं वन।
Currently Selected:
१ शमूएल 24: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
