१ शमूएल 21
21
दाऊदं छायेहःगु मरि काःगु
1दाऊद अहीमेलेक पुजाहारीयाथाय् नोबय् वन। अहीमेलेक थरथर खाखां दाऊदयात नापलायेत वल, अले वयात धाल, “छि छाय् याकःचा जक झायागु? छिनापं छाय् सुं नं मवःगु?”
2दाऊदं अहीमेलेक पुजाहारीयात धाल, “जितः छु ज्या यायेत जुजुं छ्वयाहःगु खः, व सुयातं धाये मते धाःगु दु। जिं थः मनूतय्त जितः छथाय् नापलाः धकाः धयागु दु। 3आः, छिके नयेगु छु दु? जितः न्यापा मरि बियादिसँ वा गुलि दु उलि बियादिसँ।”
4अले पुजाहारीं वयात लिसः बिल, “जिके छायातःगु शुद्ध मरि बाहेक मेगु मरि मदु। तर छु छिकपिनि मिजंत मिसानापं लसपस मयासें च्वनाच्वंगु खःसा छिसं थ्व यंकादीफु।”
5दाऊदं पुजाहारीयात लिसः बिल, “थौं तक जिपिं छुं ज्याया निंतिं वनीबलय् मिसातपाखें तापाक्क हे च्वनागु दु। चिचाधंगु ज्या यायेत वनीबलय् ला इमिगु अंग नं चोख जू धाःसा थौंया न्हि झन इमिगु अंगत गुलि शुद्ध जुइ।” 6अथे जुयाः अन छायातःगु मरि मेगु मदुगुलिं व पुजाहारीं वयात छायातःगु मरिसां बिल। व मरि परमप्रभुया न्ह्यःनं कयाहयाः उखुन्हु हे क्वाःगु मरि हाकनं व हे थासय् तयातःगु खः। #मत्ती १२:३-४; मर्क २:२५-२६; लूक ६:३; लेवी २४:५-९
7शाऊलया दासत मध्ये सुं छम्ह नं उखुन्हु अन परमप्रभुया न्ह्यःने च्वनाच्वंगु खः। वयागु नां एदोमी दोएग खः। व शाऊलया फैजवाःतय् मूम्ह नायः खः।
8दाऊदं अहीमेलेकयात धाल, “छुं छिके भाला व तरवार दु ला? जिगु थःगु हे तरवार वा मेगु सामान ल्हातय् मदु छाय्धाःसा जुजुं हुकुम बियादीगुलिं जि हथाय् चाचां वया।”
9पुजाहारीं लिसः बिल, “एलाहया ब्यासिइ छिसं स्यानादीम्ह पलिश्ती गोल्यतया तरवार थन दु। थ्व कापतं हिनाः पुजाहारीया भिंगु सूती कापःया लंया ल्युने तया तयागु दु। व यंकेगु इच्छा दुसा यंकादिसँ थन मेगु छुं ल्वाभः मदु।” दाऊदं धाल, “थ्व थें ज्याःगु तरवार मेगु मदु। जितः थ्व हे बियादिसँ।”
दाऊद गातय् वंगु
10उखुन्हु दाऊद शाऊलया थासं बिस्युं वनाः गातया जुजु वन। 11तर आकीशया हाकिमतय्सं वयात धाल, “छु व देय्या जुजु दाऊद मखु ला? वयागु बारे प्याखं हुलाः इमिसं थथे म्ये हाःगु खः -
“शाऊलं द्वलंद्वःयात स्यात,
अले दाऊदं लखं लखयात स्यात।”
12थ्व खँ दाऊदं मनय् तया तल अले व गातया जुजु आकीश खनाः तसकं ग्यात। 13अथे जुयाः वं उमिगु न्ह्यःने वँय् जूम्ह थें यानाक्यन। इमिगु सकसिगु न्ह्यःने मू ध्वाखाया निखें च्वंगु पःखालय् च्वच्वः अले दाह्री लाः त्वाला-त्वाला वय्काः वँय् थें पहः यानाच्वन।
14अले आकीशं थः दासतय्त धाल, “स्व, थ्व मनू ला वँय् जूगु दु। छाय् छिमिसं थ्वयात जिथाय् हयागु? 15छु जिथाय् वँय् जूपिं मदयाः जितः दुःख बीत वयात हयागु ला? छु वयात जिगु छेँय् दुकायेगु ला?”
Currently Selected:
१ शमूएल 21: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
