१ शमूएल 18
18
जोनाथनं दाऊदयात माया याःगु
1दाऊद शाऊलनापं खँल्हाबल्हा यायेधुंकाः जोनाथन दाऊदनापं आत्माय् मिलय् जुल अले वं दाऊदयात थःत थें हे माया यात। 2उखुन्हुनिसें शाऊलं दाऊदयात थःनापं हे तल अले थः बौया छेँ लिहां वने मबिल। 3जोनाथनं दाऊदयात थःत थें हे मायायाःगुलिं जोनाथनं दाऊदनापं छगू बाचा चित। 4जोनाथनं थःम्हं न्ययातःगु गा व फिनातःगु युवराजया तपाःलं त्वयाः थःगु तरवार, धनु व पेटीनापं दाऊदयात बिल। 5शाऊलं याके छ्वःगु न्ह्याथें ज्याःगु ज्या यायेत नं दाऊद तसकं ताःलात। अले शाऊलं वयात थःगु सेनापतिया पदय् तयेत ल्यल। थुकथं वयागु मान व पद च्वन्ह्याःगुलिं फुक्क सिपाइँत व शाऊलया हाकिमत नं लय्ताल।
शाऊलं दाऊदयात डाहा याःगु
6दाऊदं गोल्यतयात स्याये धुंकाः दाऊद व सिपाइँत थथःगु छेँ लिहां वयाच्वंबलय् मिसात इस्राएलया फुक्क शहरं पिहां वल, अले इमिसं दम्फु व बाजं थाथां म्ये हालाः प्याखं हुहुँ शाऊल जुजुयात नापलायेत वल। 7मिसात लय्तातां थथे धकाः म्ये हाल,
शाऊलं द्वलंद्वःयात स्यात,
अले दाऊदं ला लखं लखयात स्यात।#१ शमू २१:११; २९:५
8थुकिं यानाः शाऊल तसकं तंम्वल अले उपिं खँग्वलं वयागु नुगः क्वतुंवन। वं धाल, “दाऊदया निंतिं इमिसं लखंलख धाल, जितः धाःसा इमिसं द्वलंद्वः जक धाल। अथेसा वयात ला जुजु हे धाःसा छुं मपानि।” 9उखुन्हुनिसें शाऊलं दाऊदयात डाहा याना हल।
10कन्हय् खुन्हु परमेश्वरयापाखें छगू सास्ती बीगु आत्मा शाऊलयाके दुहां वन। अले व थःगु छेँय् वंय् थें अगमवाणी हाला जुल। न्हापा थें दाऊदं शाऊलया निंतिं वीणा थाना तुं च्वन। शाऊलया ल्हातय् थःगु भाला ज्वनातःगु दु। 11जिं दाऊदयात अंगलय् हे तानाबी धकाः मति तयाः वयात भालां कय्कल तर निक्वः तक दाऊद चिलावनाः बचय् जुल।
12शाऊल दाऊद खनाः दाह जुल, अले ग्यात छाय्धाःसा दाऊदनापं परमप्रभु दी तर शाऊलयात परमप्रभुं त्वःतादी धुंकूगु खः। 13अथे जुयाः वं दाऊदयात थःगु लाय्कुलिं अलग तयाः द्वःछिम्ह सिपाइँत ल्यल। अले दाऊदं थः सिपाइँतय् न्ह्यलुवाः जुयाः लडाइँलय् ब्वना यंकल। 14परमप्रभु व नापं दीगुलिं वं याःगु न्ह्यागु ज्याय् नं व ताःलात 15थुकथं दाऊद ताःलाःगु खनाः शाऊल व नापं तसकं ग्यात। 16तर सकले इस्राएल वं यहूदां दाऊदयात तसकं माया यात, छाय्धाःसा लडाइँलय् वं इमित न्ह्यलुवाः जुयाः यंकूगुलिं खः।
दाऊदं शाऊलया म्ह्याय्नापं ब्याहा याःगु
17अनंलि शाऊलं दाऊदयात धाल, “जिं जिमि तःधिकःम्ह म्ह्याय् मेराबयात छनापं ब्याहा यानाबी, तर उकिया पलेसा छं जिगु सेवा यायेमाः अले परमप्रभुया निंतिं लडाइँ यायेमाः।” शाऊलं थःगु हे ल्हातं मखु तर पलिश्तीतय्गु ल्हातं दाऊदयात स्यायेगु बिचाः याःगु खः।
18तर दाऊदं लिसः बिल, “जि सु खः? अले जिमि परिवार सु खः? जिमि थःथितित इस्राएलय् सु दु? छु जि जुजुया जिलाजं जुइ फइ ला?” 19शाऊलया म्ह्याय् मेराब दाऊदनापं ब्याहा यायेगु ई वल तर मेराबया ब्याहा ला छम्ह महोलाय् च्वनीम्ह अद्रीएल नांयाम्ह मनूनापं जक जुल। 20तर शाऊलया मेम्ह म्ह्याय् मीकल दाऊदनापं मतिनाय् फसय् जुल। थ्व खँ शाऊलया न्हय्पनय् थ्यनेवं व तसकं खुसी जुल। 21वं थःगु मनय् थथे धकाः बिचाः यात, “जिं मीकलयात हे दाऊदनापं ब्याहा यानाबी। व दाऊदया निंतिं छगू जाः जुइमा अले पलिश्तीतय्सं वयात स्यायेमा।” अथे जुयाः शाऊलं दाऊदयात थः जिलाजं यायेत निक्वः खुसि इनाप यात।
22दाऊदयात सुनानं मसीक थथे धा धकाः शाऊलं थः भारदारतय्त हुकुम यात, “जुजु छिनापं तसकं लय्तायादीगु दु, अले छि जिपिं सकसित तसकं यल। अथे जुयाः आः छि जुजुया जिलाजं जुयादिसँ।”
23अले शाऊलया मनूतय्सं दाऊदनापं थथे खँ ल्हात। वं इमित धाल, “जुजुया म्ह्याय्नापं ब्याहा यायेगु चिधंगु खँ बिचाः यानादिया ला? जि छुं मदुम्ह मनू जक खः। जिगु लागिं ला थ्व तसकं तःधंगु खँ खः।”
24दाऊदं धाःगु खँ भारदारतय्सं शाऊलयात न्यंकल। 25अले वं धाल, “दाऊदयात थथे धा, ‘शत्रुतय्त ब्वलासाय्गु निंतिं जुजुं भम्चाया मूकथं सःछि पलिश्तीतय्गु च्वफायेगुलिइ च्वंगु छेंगू जक फ्वंगु दु।’” थुकथं पलिश्तीतय्गु ल्हातं दाऊदयात स्यायेमा धकाः शाऊलं मति तःगु खः।
26शाऊलं धाःगु खँ भारदारतय्सं दाऊदयात न्यंकल। अले दाऊद थ्व नियमकथं हे जुजुया म्ह्याय्नापं ब्याहा यायेत मानय् जुल। ब्याहा याये न्ह्यः, 27दाऊद व वया थः मनूतनापं वनाः निसः पलिश्तीतय्त स्यानाः इमिगु च्वफायेगुलिइ च्वंगु छेंगू ध्यनाः जुजुयाथाय् हल, गुकिं यानाः दाऊद जुजुया जिलाजं जुइ फयेमा। अनंलि शाऊलं थः म्ह्याय् मीकलयात दाऊदनापं ब्याहा यानाबिल।
28थुकथं परमप्रभु दाऊदनापं दी धइगु खँ शाऊलं खन, अले थः म्ह्याय् मीकलं वयात मतिना याना तुं च्वन धकाः नं सीकल। 29अथे जुयाः व दाऊदनापं अझ अप्वः ग्यात अले थःगु ल्यं दुगु जिवंकाछि हे व दाऊदया शत्रु जुल।
30पलिश्तीतय् सिपाइँत व हाकिमत लडाइँ यायेत वया तुं च्वन तर फुक्क लडाइँलय् दाऊद हे त्यात। शाऊलया मेपिं हाकिमत स्वयाः अप्वः व हे त्याइगु खः। थुकथं दाऊदया नां फुक्क थासय् बय्बय् जुल।
Currently Selected:
१ शमूएल 18: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
