LOOMƐITIƐ 15

A numai zɔitiɛ yii la, wo mɛ lɛ nɔ ƃɔɔ yii la

1Daitiɛ zobo ge de vɛ kɛni a da yii lɔ zobo‐bala‐bɛ veaitiɛ ta zobo‐bala‐bɛ luoi ɣa, a de mɛ lɛ nɔ ƃɔɔ yii la. 2Pagɛ de ɣile‐giledai de de zii yɔ̃wɔitiɛ yii la fai niitiɛ zu te vagɛi te maʋaa ma a diɛ ta ŋeteai maʋaa wũ bu ziɣi. 3Ƃɔvɛ‐laale Kolai lɛ ƃɔɔ yii‐la vele ɣaa ziɛni. Kɛ̀ ponɛvɛ Gala kɔlɔi zu è ɣɛ Kolai ɣa ɣɛ ɣɛɛzu tea, “Fai niitiɛ te te woni ga è la, nà ɣa te yɛga gàazu.” 4Nii nɛpɛgi wɔlɔ ponɛi ɣɛ Gala kɔlɔi zu é wonɛni de ɣala‐bo faa ma, kɛɛ ʋaa ma de ɣi‐to‐su ɣɛ ma de lo pele ma kpãa ta velei Gala kɔlɔi ɣa de yii lɔɔ la. 5Galagi nii yá nu lo kpãa é nu yii lɔ towaa ʋa bu fãa ga wo goo‐la‐ma ŋeteai ɣɛ ga ɣiini, è ɣɛ velei Ziizɛ Kolai na tuoi la, 6kɛɛ ʋaa ma wo pɛ wa puu na kii ma wo woo ɣɛ su ɣile wiɛ Galagi nii wɔɔlɔ ga woo, na ɣa ga nii é ga de maliɣii Ziizɛ Kolai na Galagi é wɔnɔ ga kéea.

Woo niinɛ vagɔi ɣa zii ƃalaagitiɛ vaa ma

7Na ma a yee zei ɣiini bu è ɣɛ velei Kolai yee zeiya la wo wu Gala na bɔɔlɔlai ʋaa ma. 8Gè bo wiɛ, Kolai lɔɔni niitiɛ wu te zeiyai kpoto ma ga é Gala na gaama luoi lɛ, kɛɛ ʋaa ma kitogitiɛ te woni ga de mama gwɔlɔni é te zu ʋaa ɣɛ. 9É kɛɛni wɔnɔ ga zii ƃalaagitiɛ te Gala bɔɔlɔ ná gaazu‐maa‐wõi‐ɣai ʋaa ma. È ɣɛ velei ponɛi la Gala kɔlɔi zu mawoitiɛ te ga

“Na ma gà è laa maa lɛ zii ƃalaagitiɛ zaama,

gìɛ è maa wui.”

10Na ɣa wulo na su, bogɛ wɔnɔ mawoi ga

“A kuu‐zu‐nɛɛ wulo, wai wo ga zii ƃalaagitiɛ

wa ná numaitiɛ.”

11Yíɛ wo wɔnɔ ga

“A de maliɣii laa maa lɛ,

wai wo ga zii ƃalaagitiɛ wo ɣaazɔ.

Pagɛ zii ɣaazɔ dáa maa lɛ.”

12Aizeea ɣa wɔnɔ bosu Gala kɔlɔi zu yɛ ɣɛ tea,

“Jɛsi mawulo‐bai ɣa vaazu vaazu,

nii yá wu ziɣi ga é zii ƃalaagitiɛ

maazu ʋaa wo.

Towaa é vaazu ɣɛɛzu ga zii ƃalaagitiɛ

ɣi‐to‐suvɛ.”

13Galagi nii é ga nu ƃuse ɣi‐to‐su, towaa wo yii laa ʋe ga kuu‐zu‐nɛɛ mazii ɣaazɔ ta zii‐laa ƃɔɔ fãa wo laa vele ma la, kɛɛ ʋaa ma baa ŋinɛgi na gaa‐ƃai zaala zu ki‐togi zu wɔɔlɔ ma wo ya.

Pɔɔ na tii zii ƃalaagitiɛ ʋaa ma

14Nà numaa, nà dɛi zìi laavɛ wo maʋaa zu ga tei wo ɣagi wo yii laa ʋegɛi ga faa vagɔ ta faa‐ɣaa‐ɣaa ʋaa mazii ɣaazɔ, zobo ge wɔnɔ wo vɛ ga wo ɣiini tɛnɛ. 15Kɛ̀ gè faa ta wonɛɛ wo wɔ ga duo lala vele kɔlɔi nii zu ga gè wo loo ɣi su, toku ge zei maa‐wõi‐ɣaa ƃɔ‐bai va Gala ge boga gàazu 16ga gè ɣɛ ga Ziizɛ Kolai na tii‐ɣɛɛ nu zii ƃalaagitiɛ ʋaa ma gìɛ laa‐ʋaale tii ɣɛ Gala na goo vagɔi‐woga zu. Gà nii ɣɛɛzu kɛɛ ʋaa ma zii ƃalaagitiɛ te ɣɛ ga numaitiɛ Gala baa ŋinɛgi ɣa te wulo su ga tee Gala faa ma ga é yee zei te wu. 17Tei tɔwɔ gá Ziizɛ Kolai gé su ɣilekpu, kìgi zu tii gè kɛɛzu Gala bɛ bɔ̀ɔlɔvɛ bɛ́. 18Ƃɔvɛlaale gɛ̀ lɛ zooga gɔ̀ faa wo ɔ́ vile ŋɛni ta nɛpɛ ba é wulo niitiɛ wulu Kolai ɣɛɛ ga zaƃu ga te ɣɛ ga zii ƃalaagitiɛ te ɣɛ ga goo‐mɛni‐kulo vea Gala zeea. Gè nii ɣɛɛni ga dàa woo ta kɛ̀ɛ ʋai. 19Gè kɛɛni ga faaniga‐ɣɛɛ ga seelea ta faa maa‐wɔlɔ‐wɔlɔga‐ɣɛɛ. Gè kɛ wɔnɔ Gala baa ŋinɛgi na gaa‐ƃai zaala zu. Nii mavele ma é ziɣi Yɛlusulɛɛ é yɛsu é ziiti Ileelikɔ̃ ligi zu gè Kolai mawoo niinɛ vagɔi woga natiɛ ƃɔɔ kpowũ 20gè woo vagɔi‐woga ɣɛ ga zɔƃɛlɛ na mavele ma. Ɛ́ lɛ ga gìɛ bo vɛtiɛ Kolai na daa‐zeigi wogɛi sa na, gè mɛ lɛ va siɣizu nu taƃɔnɔ zee‐wo da. 21Kɛ̀ gà kɛ è ɣɛ velei ponɛi la Gala kɔlɔi zu mawoi ga

“Niitiɛ tɛ dɛ wɔlɔ‐wɔlɔ máʋai woni te ma

ta kẃɛ̃ɛ,

niitiɛ wɔnɔ tɛ dɛ wɔlɔ‐wɔlɔ máʋai mɛnini,

natiɛ te maʋai ɣaa ɣa.”

Pɔɔ kpɛtɛni ɣigi zu ga é li Loomɛ lai zu daali‐ma ma

22Nii ɣa é kɛɛ pàa ʋai wo wɔ vɛ su yìɛ ƃala‐ƃala wɔ. 23Kɛ̀ tei tɔwɔ ŋada nɛpɛ gɛ lɛ sa zèea vɛ ligi zu ʋaa va ga gè tii ɣɛ na, tɔwɔ pàa ʋai wo wɔ vɛ gè ná maa‐wõi‐wõi kuloa kwena tamaa yee wu, 24kì ka na ga gà ɣɛ na levesu ga gè li Sepĩi yui zu a de wɛlɛ ɣii va. A da wõi wulo na ga ta wolo, wa tève gè li nà siɛi ma. 25Kɛ̀ na ɣɛɛvɛ pɛ gà dɛ liizu Yɛlusulɛɛ ga kpɔ‐ba‐wo ŋɛni numai niitiɛ ʋaa ma te na ga Gala na dɔa. 26Ƃɔvɛlaale Masadoonia veaitiɛ ƃɔga Akeea veaitiɛ te yii laavɛ ga te ŋɛni maa kpɔ maa‐wõi veaitiɛ ʋaa ma te Gala na dɔ numaitiɛ zaama Yɛlusulɛɛ lai zu. 27Te yii lai ɣɛ ga te kɛ. Ƃɔɔƃɔɔ su natiɛ te maʋai ɣa te ma ga kui. Toku ge zei ga tei tɔwɔ zii ƃalaagitiɛ te wɔɔ laa ɣɛɛ tuuyiɛi va Gala ge toa numaitiɛ ma Yɛlusulɛɛ, kɛni ta ƃalaa te ƃɔ te va ga ŋetea‐nii‐zu zɔɔlaitiɛ. 28Na ma gà wolo na nii ma, ŋɛnii te gaa kpɔga gè fe te ya, gà sa gà leve ga wo wɔ vɛ vele gè li Sepĩi. 29Tɔwɔ gà ɣɛ na vaazu, gà va ga Kolai na tuuyiɛi ɣaazɔ.

30Nà numaa, gà daazu wo vɛ de maliɣii Ziizɛ Kolai mavele ma gìɛ da wo vɛ Gala baa ŋinɛgi na wõilai mavele ma ga wo ƃɔ su wo ɣaa ƃaa wo vɛɛ bà a de Gala feli màʋaa ma 31kɛɛ ʋaa ma niitiɛ te Yudiiya tɛ lɛ Kolai maʋaa ziɣini ga gaama, gà lii na te mɛ lɛ laa lɛ bù. Na ɣa ɣɛɛ na Gala na dɔ numaitiɛ te kɛ te yee zei nà tii wu gà ɣɛ kɛɛzu Yɛlusulɛɛ ʋaa ma. 32A de Gala feli kɛɛ ʋaa ma gè va wo wɔ ga kuu‐zu‐nɛɛ gè loowo wo zaama saala zu. 33Zii‐laa Ɣalagi ɣa ɣɛ wo pɛ wo woba fãa. Towaa ɣɛ ŋɛ na.

Currently Selected:

LOOMƐITIƐ 15: DN1971

Highlight

Copy