LOOMƐITIƐ 10

1Nà numaa, nii ƃɔɔ mawõi levegɛi zìi zu é ga nà Gala‐feliai Yezɔi veaitiɛ ʋaa ma tɔ ga te valo. 2Gà seele woo ʋeezu te ʋaa ma ga te wɔɔlɔvɛ Gala fai zu, kɛ̀ maʋai ɣaa lɛ wodoni te ya. 3Toku ge zei ga Gala na tele‐bo tuoi maʋai tɛ lɛ gaa ɣaani te vɛɛ ga pele ɣaa zia ga te ƃɔɔ ɣele maala leve, towa é kɛɛ tɛ lɛ ʋaani bu ga te tele‐bo tuoi nii wo Gala ge daa te ya. 4Su‐wulo‐zu ɣa ga Kolai ɣa é ga tɔgi maʋaa mawɛ̃ɛ pele ma. Nii ɣɛɛvɛ ga nui nɛpɛ zee‐la‐ma ɣa ɣɛ zéea kɛɛ‐zɔ yowũi mɛ lɛ ɣɛ ba ga faa.

Baiolai ɣa nu pɛ faa ma

5Mooze ponɛni ga nui nɛpɛ yá tele‐bo tuoi nii wo maʋai ziɣiai Gala na tɔgi la manui ɣa zɛʋu zɔlɔ wo tɔgi maazu‐vɛtɛ pele ma bɛ́. 6Kɛ̀ tele‐bo tuoi nii maʋai ziɣiai zee‐la‐ma la su‐wulo‐zu ɣa ga “È mɛ lɛ bo ɣigi zu ɔ̀ ɣɛ tea, ‘Ƃɛ ɣa a lɛ gee wɔlɔgi zu?’ Na zu‐wulo‐zu ɣa ga é lɛ é vile ga Kolai. 7Ɔɔ è mɛ lɛ bo ɣigi zu ɔ̀ ɣɛ tea, ‘Ƃɛ ɣa yá yii zeɣei nii zu kpo‐ma lɛ ba?’ Na zu‐wulo‐zu ɣa ga é Kolai wulo saa vea ɣɛɛ‐zuvɛ é vaa la.” 8Kɛ́ zɛƃɛ ɣa tele‐bo tuoi dɛɛzu?

Tɔ dɛɛzu ga yiɛ ga woi ɣa è woba, é è la é è yii zu.

Na ɣa ga zee‐la‐ma woi nii gé bosu wiɛ Gala goi zu. 9Ƃɔvɛ‐laale ani yà kulo na la è bo ga woo ga Ziizɛ ɣa é ga de maliɣii, na ɣa ɣɛɛ na è siɣi ga gaama è ɣigi zu ga Gala ge bu ziɣini saa ya, yà valo. 10Toku ge zei ga nu ɣa Kolai maʋaa ziɣi ga gaama ɣigi zu, na ɣɛ ga zaƃu manui ɣɛɛ‐zɔ yowũi lɛ ɣɛɛ ba ga faa. É maʋai wulo la é bo ga woo, na ɣɛ ga zaƃu é valo. 11Gala kɔlɔi ɣa bosu yíɛ ɣɛ tea, “Nu ta nɛpɛ gɛ lɛ maʋaa ziɣia ga gaama manui ɔ́ wũfe.” 12Toku ge zei ga Dusi nu lɛ ga tee Geliiki nu ɔ́ ɣɛ ga tee. De maliɣi gilagi nɔ ɣa é ga zɛ‐sɛ pɛ maliɣi yíɛ weli tama‐tamagi ɣɛ ga faa‐nɛɛ niitiɛ ɣaazɔ vɛ te ná daa‐zeigi lilisu. 13Ƃɔvɛlaale “Nui nɛpɛ é de maliɣii na daa‐zeigi lilisu towaa valo.”

14Kɛ̀ numaa ta leve ɣɛ le te nu na daa‐zei tili nii tɛ dɛ maʋaa ziɣini ga gaama? Ta leve ɣɛ le te nui nii maʋaa ziɣi ga gaama tɛ lɛ dɛ wɔlɔ‐wɔlɔ faa mɛnini ɔ́ vile ba? Tɔwɔ ta leve ɣɛ le te faa mɛni é vile ba ani Gala goo‐wo nu lɛ na? 15Numaa wɔ ta Gala goi wo ɣɛ le ani tɛ lɛ te leveni na ma? È ɣɛ velei ponɛi la Gala kɔlɔi zu mawoi ga “Taitiɛ te vaazu tiɛ woo niinɛ vagɔi wo te wɔwɔitiɛ maʋaa wala maa nɛɛvɛ siɛi nii zu!” 16Kɛ̀ nui pɛ gɛ lɛ dɛ wui toni woo vagɔi ma. Ƃɔvɛlaale Aizeea ɣa bosu Gala kɔlɔi zu yiɛ ɣɛ tea, “Gé maliɣii, ƃɛ ɣa é nii ziɣia ga gaama é mɛniga gé la?” 17Na ma zee‐la‐ma ɣa wulo fai nii zu nu mɛniga. Nii wɔgi nu mɛniga maʋai ɣa wulo Kolai mawoi‐wogai zu. 18Kɛ̀ gà gaa‐zaɣa‐kɛɛ wosu gìɛ ɣɛ tea, tɛ lɛ dɛ mɛnini ʋaa ve? Ƃɔɔƃɔɔ su te mɛniga. Ƃɔvɛlaale ponɛvɛ Gala kɔlɔi zu mawoi ga

“Te woi zia zuu ɣaazɔ zu

te woi ziiti zui wɛ̃ɛ ma.”

19Gà gaa‐zaɣa‐kɛɛ wosu wɔnɔ ga Yezɔitiɛ tɛ lɛ gaa ɣaani ʋaa ve? Mamaa wũgi pa ka ga Gala daa woi wonɛvɛ Mooze na kɔlɔi zu Gala giɛ ɣɛ tea,

“Niitiɛ tɛ lɛ ga zii, gà tolo vili wo wuu zu

te maʋaa ma,

na ɣa ɣɛɛ na zii niitiɛ te litigɛi gè wom yii

yowũ te maʋaa ma.”

20Aizeea ɣa mu ga duo lala nu ga velei é bosu la Gala kɔlɔi zu yíɛ bo ga Gala ka ɣɛɛzu tea,

“Pɛ̀tɛgɛ niitiɛ vɛ tɛ lɛ gàa ziɛni.

Gè ƃɔɔ lɛɛ ga niitiɛ tɛ lɛ màɣaa‐zaɣa‐kɛɛ woni.”

21É ƃɔɛni é vile Yezɔitiɛ va yiɛ ɣɛ tea, “Gè lua yee zu zakpazu ga gè numai niitiɛ vɛɛ yii la te ga goo‐mɛni tala vea te ga numai niitiɛ te logɛi dà.”

Currently Selected:

LOOMƐITIƐ 10: DN1971

Highlight

Copy