FAA WULOAI KƐNƐ MA 18
18
Babelɔ̃ lai wolo ʋai é vɛɛ su
1Tei sa nii wuloni ba, gè wɛlɛni Gala ta ɣeelai ta va kɔnɔ kuloai gee‐zuvɛ yíɛ va gaa‐ƃaa ƃakpa wala zéea. Maʋoloi kɛɛni zui maa wodo. 2É boni sa ga doba yíɛ ɣɛ tea,
“Golovɛ, golovɛ, Babelɔ̃ laa ƃakpa walai wolovɛ!
Towa é ɣɛɛ ga gɔʋɛ yowũa ɣɛɛ‐zuvɛ,
é ga maa‐yɛ̃ɛlɛ gɔʋɛ nɛpɛ dii‐zu.
Wɛ̃nii nɛpɛgi wɔnɔ maa yɛ̃ɛlɛi bɛlɛ ziɣiai nu vɛ
ná ɣa ná ga te lii‐zuvɛ.
3Su‐wulo‐zu ɣa ga zii pɛ ge ŋasa vai mayiɛi ƃoalea
nii é ga tai nii na maa‐wuo lala ŋɛni‐wõi‐leve‐mai.
Na ɣa ɣɛɛ na máʋai wulovɛ è ɣɛ ŋaza nui nii
ta zui‐ɣa ɣalasoga te wɛ̃ɛ‐ziɛ boga.
Tai nii zu yii‐ma‐ɣɛɛ zɔɔlaitiɛ te zui‐ɣa wodi‐lɔɔ
vea ƃɛtɛɛ.”
4Na ɣɛɛzu gìɛ woo ta ƃɔnɔ mɛni é wulo Gala ta yíɛ ɣɛ tea,
“Nà numaitiɛ, a wulo tai ƃɔɔ va wo va,
wo mɛ lɛ va wɔɔ laa ziɣizu ná faa yowũi zu,
wa dɔ laa ɔ́ ɣɛ ná faa ƃoeitiɛ va nà mavele ma.
5Ƃɔvɛlaale ná faa yowũitiɛ maziɣi togɛ sa
gáa wooza é ziiti gee wɔlɔgi ma.
Tɔwɔ Gala ki ka ná faa yowũitiɛ ma.
6Nii nɔ é kɛɛ ga wiɛ, a na ɣɛɛ la. Kɛ́ɛ‐zɔgi é kɛɛ
ga wiɛ, wo pɛɛ da wo su loo bɛ́.
Kɔpui nii é ŋɛni wɔ̃ɔga su é supu, a kɔ̃ɔ mawɔpui zu
fele wo supu máʋaa ma.
7È ɣɛ velei é ƃaa laa la ƃɔɔ ma é zii‐ma‐ɣɛɛ
ƃakpa‐wo tuoi wo,
a kɛ é na liigo laƃai wo, wo nà liigo ƃee
lɔ da.
Tei tɔwɔ é bosu ɣigi zu yíɛ ɣɛ tea, ‘Gà ga ŋaza nu
ɣalaso gè zeini masa kpɔkpɔ ga,
gɛ̀ lɛ ga po ŋazai nii zini gɛ lɛ bɛ́,
kpee lɛ wɔlɔ‐wɔlɔ màʋaa ma,’
8vele wɔ nɔwɔ na ná faa ƃoeitiɛ ta ziiti la má
folo ɣilekpu zee wu.
Natiɛ ta ga siɛ‐ziɛ seeƃɛ, kpee, é vɛɛ pulu va.
Na ɣa ɣɛɛ na ŋabu ɣa gala.
Toku ge zei ga de maliɣii Gala nii é ná faa‐wogi
ɣaa levezu gwala ɣee ɣaa ƃaavɛ.”
9Zui‐ɣa ɣalasogi niitiɛ te wɛ̃ɛ‐ziɛ boga ta tiɛni te vɛɛ teve‐daa‐wulu yii‐ma‐ɣɛɛ luoi zu, ta wɛlɛ ná gala luulii va, ta wɔlɔ tiɛ loba maazu ga kpee. 10Ta lo ƃɔɔ woozala duo maazu taƃai nii ʋaa ma yá ɣɛ bosu tiɛ ɣɛ tea,
“Edei! Edei! Yài è ga taa wala ƃakpai na,
yài è ga taa ɣee ɣaa ƃai è ga Babelɔ̃,
faa yɛga yìɛ ɣalava ɣilekpu kpẽi zee wu.”
11Na ɣa ɣɛɛ na zui‐ɣa wodi‐lɔɔ vea ɣaazɔ te yii ɣa ɣɛ zuulizu tiɛ wɔlɔ máʋaa ma, ƃɔvɛlaale nu ta nɛpɛ gɛ lɛ sa ɣɛɛ wɔnɔ ta wodi ŋɛniitiɛ ɣeeazu. 12Podi ŋɛnii natiɛ ta ga: Zɛni, kani, tɔnɔ‐ba wɔti, ʋolo‐ʋolo, gbaza pa‐pa, seɣe ƃoei diizɔ, siliki, seɣe ƃoei kpake‐kpake, gulu wũ‐nɛɛ‐nɛɛ mazii ɣaazɔ, gulu zɔɔla mazii ɣaazɔ niitiɛ te zɔ̃wɔ ƃai, sɔɔlaitiɛ te ƃɛtɛi ga kpaaʋa, kolu‐ʋɔɔ ƃɔga tɔnɔ‐ba wɔti wele, 13mii wulu‐wɔlɔgi nii dáa ga “senemɔ”, kize, ŋɛni wũ‐kũ‐nɛɛ‐nɛɛgi nii ta gala, gulu mala kũ‐nɛɛ‐nɛɛ mazii zei‐zu felegɔ, ŋasa vai mayiɛi, gulo, felava ʋukɛ ƃɔga mɔlɔ, nikɛ ƃɔga baala, soo vɛɛ kai nii va soo ɣa mãi, é vɛɛ dua va. Tiɛ ƃalaa nu ƃuse yɛʋui zɔ̃wɔ wulo. 14Podi‐lɔɔ veaitiɛ ƃɔɔ ta ɣɛɛzu má.
“Nii è yɛga máa‐wõi‐wõi kulozu è ɣigi zu
ga è su‐lɔnɔ zɔlɔ wo, é wuloa è ya é li.
Na ɣa ɣɛɛ na è valaga è maa‐ziɣi ŋɛnii
ɣaazɔ ma ta yà zaala‐ma ŋɛniitiɛ.
Tɛ lɛ sa wɔlɔ‐wɔlɔ vɛtɛga!”
15Podi‐lɔɔ veaitiɛ te ɣɛni sɔɔlai niitiɛ zɔ̃wɔ wulozu é yɛsu te kpɛtɛ maa zɔlɔ wo, ta lo woozala tiɛ luo taƃai va yá ɣɛ bosu tiɛ wɔlɔ ga woo wala te ɣaazu maa yiɛi yìɛ wu. 16Ta ɣɛ ɣɛɛzu tea,
“Edei! Edei! Taa ƃakpa walai nii maa ɣiliai ɣɛ
ga gbaza pa‐pa, seɣe ƃoei diizɔ ge ma
ta maƃoei kpele‐tete,
máa ɣiliai ga zɛni ta tɔnɔ‐ba wɔtia é vɛɛ ʋolo―
ʋologa va.
17Kpɛtɛ ŋɛnii nii ɣaazɔ zu ŋala‐ŋalaga ɣalava
ɣilekpu kpẽi zee wu.”
Yuwu‐ɣa ŋee gwala maazu vea vɛɛ niitiɛ va ta zei ziɛi ɣa tiɛ li siɛ ma, ta kẽe‐siɛ vea é vɛɛ niitiɛ ɣaazɔ va ta ta lii ɣɛ yuwu ɣa, te loni woozala. 18Tei te wɛlɛni tai ɣala luulii va, te ɣɛni lobasu tiɛ ɣɛ tea,
“Taa wala zɛƃɛ ɣa é ɣɛni ga taa ƃakpa walai
nii ɣavele?”
19Te ɣɛni sa fifili puuzu wũmɔ tiɛ wɔlɔ te ɣaazu maa yiɛi yiɛ wu tiɛ loba tiɛ ɣɛ tea,
“Edei! Edei! Taitiɛ nɛpɛ kẽe ge te ya yuwu ɣa,
taa ƃakpa walai nii zu‐ƃɛtɛ‐ŋɛniitiɛ ɣa
te ta ƃɛtɛi maa zɔlɔ woni su.
Tɔ wɔ ka tai nii zu ŋala‐ŋalaga ɣalava
ɣilekpu kpẽi zee wu.
20Ee, wai wo Gala ta, a mawuu‐zu‐nɛɛ wulo.
Wai wo ga Gala na dɔ numai zɔitiɛ é vɛɛ Ziizɛ na
keelaitiɛ va ta Gala daa woo‐wo beaitiɛ,
a kuu‐zu‐nɛɛ wulo.
Ƃɔvɛlaale Gala ge faa vɛɛ tai nii va wo ʋaa ma.”
21Tei sa na ɣɛɛni, kee‐ɣaa‐ƃaa Ɣala ta ɣeela ta fasa ƃakpa wala ziɣini ɔ̀ ka è ɣɛ kpazi‐ʋukɛ kwɔti. É zɛba é píli yuwu wu yíɛ ɣɛ tea,
“Vele ɣa na Babelɔ̃ laa ƃakpa walai nii ɣa vili da
ga ŋada‐zei vele bá.
Na ɣa ɣɛɛ na ɛ́ lɛ sa wɔlɔ‐wɔlɔ vɛtɛga.
22Yài è ga Babelɔ̃ lai, kweni, gui‐loo vea,
koole é vɛɛ puu va te ta woo lɛ sa
wɔlɔ‐wɔlɔ lɛɛ è zu.
Ŋɛɛ lii ta nɛpɛ kɛɛ nu lɛ sa vɛtɛga è zu.
Kwɔda‐ziɣɛ li gɛ lɛ sa lɛɛ è zu.
23Gulo labo lɛ sa wɔlɔ‐wɔlɔ ŋada wodoa è zu.
Ŋaza‐wulo vea vɛɛ máŋazaa va te ta nɛpɛ goo
lɛ sa lɛɛ è zu.
Ƃɔvɛlaale è zu wodi‐lɔɔ veaitiɛ ɣa te ɣɛni ga
zui‐ɣa nu ƃaazagitiɛ.
Na ɣa ɣɛɛ na yà maa‐wɔlɔ‐wɔlɔ sale yeke‐kɛi
é zii pɛ gaa wɔlɔni.”
24Tɔwɔ Gala daa woo‐wo beaitiɛ vɛɛ Gala na dɔ numai zɔitiɛ va é vɛɛ niitiɛ ɣaazɔ va te te vaani zui ɣa, tai nii zu ɣa te te maŋamai vɛtɛni na.
Currently Selected:
FAA WULOAI KƐNƐ MA 18: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
