JĨI 3

Nu nɛgi

1Nà numaa, wo lamaa a mɛ lɛ ɣɛ ga kala‐mɔa. Toku ge zei ga wa ƃɔɔ wo kwɛ̃ni ga gái gé kala‐bo bosu faa‐wo gaa‐leve ʋai wala ɣa ƃaa gé maazu. 2Ƃɔvɛlaale de pɛ da faa lamaa ɣɛɛzu lɛ pele ma. Tɔwɔ ani nu ta nɛpɛ ka na ɛ́ lɛ ziɣia pele va daa woi zu, a kɛ tii tɔ ga nui maa‐wulo‐zu lɛ maʋaa va. Manui ɣa zoo é lɔtɔi ɣaazɔ maa wolo ƃalaa pɛ. 3Ani da kolu vili na soitiɛ la ga te goo‐mɛni kulo de ya, a da ɣɛ pele wulozu ga soi ɣagi. 4A wɛlɛ lɛɛ kẽe gwalaitiɛ va. Velei ƃalaa te wala ƃaazai la na ɣa ɣɛɛ na fãga zu‐ƃaa‐ƃaa giɛ li ga tiɛ, gulu lɛʋɛ wolo ɣa yá te wũ tete vɛ vele nɛpɛ kẽe‐siɛ nui ɣa ɣɛ liizu la ga tiɛ. 5Nu nɛgi ɣa ga nu lɔtɔi lo‐suvɛ ta pɛnɛi, kɛ̀ towaa ŋɛni ƃaazaga mayoka teve.

Goia ƃala ta wala ɣa ƃakpa, ŋabu wolo zo ba é gala! 6Nu nɛgi wɔ ka ga ŋabu. Nu lɔtɔi lo‐suvɛtiɛ ʋaa va nu nɛgi ɣa é te zaama ga ŋeteai nii zu lele‐bo tala luoi mawo‐kɔ̃ɔ. Towa é nu lɔtɔi ɣaazɔ wɔtɔsu yíɛ ŋabu zei da ŋeteai zu ziɛ‐wo pelei va yíɛ kɛ ga ŋabui yá wulo daa‐nɔwɔ‐wo ŋada laavɛ é ziiti ma. 7Ƃɔvɛlaale dɔƃɔ zuo mazii ɣaazɔ vɛɛ wɛ̃ni va ta kpokpo sua é vɛɛ wɔnɔ yuwu‐wu zuo mazii ɣaazɔ va nu ƃuse ɣa zoo é te maa wolo. Tɔwɔ nu ƃuse nà ɣɛɛ wɔlɔ. 8Kɛ̀ nu ƃuse ta nɛpɛ gɛ lɛ zooga ɔ́ nu nɛ maa wolo. Tɔ ga faa‐ŋala‐ŋala‐kɛɛ ŋɛnii nii doowo gɛ lɛ maʋaa va, daa ʋegɛi ga sale yowũi nii ɛ́ lɛ luulua ga nu vaa. 9De nɛgi nɔ ɣa da de maliɣii nii laa maa lɛɛ la é ga de ɣeeai. Tɔ nɔ ɣa kɔnɔ da numai niitiɛ woto la te ƃɛtɛi Gala maa niinigi zu. 10Laa vele zu ɣilekpugi nɔ daa‐maa‐lɛɛ woi wulozu su tɔ nɔ ɣa kɔnɔ koto‐loo woi wulozu su. Nà numaa, maa lɛ nɛɛni ɔ́ ɣɛ ŋɛ na. 11?Ziɛ wolo ɣa ɣɛ wulozu zeɣe zii ɣilagi zu ná ta ɣaa zekagɛi ga kpoale yiɛ ná ta lɛ ga kpoale yiɛ? 12?Nà numaa, gului nii daa ga “fi” towaa zoo é vaa ga “ale” wului mavaa, ƃaa ŋasa ɣa zoo é vaa ga “fi” mawului mavaa? Kpolo yiɛ ƃalaa lɛ zooga ɔ́ ɣɛ ga kpoale yiɛ.

Kele‐ɣelegi kuloai de wũ maazuvɛ

13Ƃɛ ɣa kele‐ɣelegɛi yíɛ faa ɣaa ɣa wo zaama? Manui na tuo vele vagɔi mavele ma, maa nɛɛvɛ é ná tii lɛ kolo‐wulo ɣele‐ɣele tuoi zu. 14Kɛ̀ ani tolo ɣa wo ɣigi zu ga gaa wãlaa, ani wɔnɔ wo lɔwɔi‐wulo ʋai ɣa wo ɣigi zu ga wo ƃala vele nɔ ƃɔɔ ʋaa ma, a mɛ lɛ mayoka teve wɔ ɣɛ ga zɛɛ ʋaa vea fai nii zu é ga gaama. 15Na ɣavele ɣele‐ɣelegi lɛ wulozu ga de wũ maazuvɛ vele, kɛ̀ tɔ ga ŋeteai nii zu ʋaa. Ɛ́ lɛ ga Gala tuo, tɔ ga dɛvele luo. 16Toku ge zei ga vɛ tolo na ta nu ƃalaa nɔ ƃɔɔ ʋaa ma, goo‐la‐ma lala ɣa ɣɛ na ta faa‐ŋala‐ŋala mazii ɣaazɔ‐ɣɛɛ ʋaa. 17Kɛ̀ mamaa wũgi pa, kele‐ɣelegi kuloai ga de wũ maazu vele maʋaa maa wuovɛ yawo. Na ɣa ɣɛɛ na tɔ ga zii‐laa ʋaa ta sɛ‐sɛ‐bo tuo, é ga nu ɣavele ƃɛtɛi ga é goo‐mɛni kulo. Daa ʋegɛ wɔnɔ ga maa‐wõi‐ɣaa tɔnɔ vagɔ ba. Kilaa‐ʋaa‐zu ʋaa lɛ maʋaa va ɔ́ nɔ ɣɛ ga zɛɛ ʋaa ʋaa. 18Tele‐bo tuoi zu‐lɔnɔi zeivɛ zii‐laa zu ga sii‐zii ŋɛni. Seivɛ numai niitiɛ vɛ te vaazu ga zii‐laa.

Currently Selected:

JĨI 3: DN1971

Highlight

Copy

Compare